Swapo eindelik reg vir optree teen Fishrot-hoës
Ná 'n hoëvlakvergadering verlede week gaan Swapo na verwagting binnekort die ontslag van twee voormalige ministers uit hul gesagsposisies aankondig.
Mathias Haufiku – Die topbestuur van die regerende party het glo besluit om twee voormalige leiers, mnre. Bernhard Esau en Sacky Shanghala, uit hul sentrale komitee- en politburo-ampte te verwyder.
Mnr. Austin Samupwa, Swapo se uitvoerende direkteur, het geweier om dit te bevestig toe hy Dinsdag op ons susterkoerant Namibian Sun se geselsprogram The Evening Review verskyn het, maar het wel bevestig 'n aankondiging in dié verband sal binnekort gemaak word.
Shanghala en Esau is tans verhoorafwagtend en staan tereg op klagte van korrupsie, geldwassery en bedrog in verband met die Fishrot-omkoperyskandaal.
Namibian Sun kan bevestig dat toppartyleiers, onder wie pres. Hage Geingob, verlede week in Windhoek vergader het om die lot van dié voormalige ministers te bepaal wat bedank het nadat die multimiljoendollar omkoperyskandaal oopgevlek is.
Shanghala is 'n lid van die sentrale komitee, terwyl Esau op dié struktuur sowel as in die politburo van Swapo dien.
Sedert hul inhegtenisneming in November 2019, en ondanks die feit dat hulle uit die parlement geskors is nadat die skandaal aan die lig gekom het, het Geingob en sy partyleiers die besluit heftig verdedig om die duo in hul onderskeie Swapo-ampte aan te hou, en gesê hulle kan nie optree voordat hulle nie in die hof skuldig bevind word nie.
Die skuif om hulle voor die verkiesing uit die parlement te skop, is beskou as 'n foefie om kiesers te laat glo dat die party nie hul beweerde dade goedkeur nie.
Die feit dat geen interne stappe gedoen is nie – en Shanghala en Esau hul topposte behou het – gee egter 'n ander indruk.
VIR DIE WOLWE GEGOOI
Shanghala en Esau het 'n sleutelrol in Swapo se 2017-kongres gespeel.
Hulle het Geingob en sy Harambee-span gehelp om as oorwinnaars uit die stryd te tree by die vergadering wat die party in twee mededingende kampe verdeel het.
Nou, enkele weke voor die twee se verhoor op 22 April afskop, het Swapo glo besluit om die duo uit hul topposte in die party te skop.
By 'n vergadering verlede week het die party se politburo na bewering besluit die twee se aanstellings moet herroep word, nadat leiers tevrede was dat hul besluit deur die wette gelei word.
Na wat verneem word, het Shanghala se uitgelekte dokument waarin hy die party waarsku om sy “verouderde politieke program te moderniseer of andersins uit te sterf”, die besluit bespoedig om hom en Esau uit hul genoemde ampte te verwyder.
“Die laaste strooi was daardie lang ding wat Shanghala geskryf het,” het 'n bron in Swapo se binnekring gesê.
“Die brief is nie positief deur die leierskap ontvang nie, wat gevoel het of hulle vir die wolwe gegooi word. Nou word die tronkvoëls in gelyke munt terugbetaal.”
Shanghala het in Desember 2020 deur sy prokureurs 'n aansoek by die kantoor van die prokureur-generaal (PG) ingedien om regshulp te vra. Hy wou hê die regering moet regsverteenwoordiging verskaf óf sy regskoste dek en gesê hy het in sy amptelike hoedanigheid opgetree toe hy gedoen het waarvoor hy aangekla is.
Die PG se kantoor, wat nou al dié aansoek vir maande oorweeg, kon nog nie tot 'n besluit kom nie.
Pogings om kommentaar oor die hangende aankondiging van Swapo se sekretaris-generaal, me. Sophia Shaningwa, en die party se woordvoerder, me. Hilma Nicanor, te kry, was onsuksesvol.
- [email protected]
Mnr. Austin Samupwa, Swapo se uitvoerende direkteur, het geweier om dit te bevestig toe hy Dinsdag op ons susterkoerant Namibian Sun se geselsprogram The Evening Review verskyn het, maar het wel bevestig 'n aankondiging in dié verband sal binnekort gemaak word.
Shanghala en Esau is tans verhoorafwagtend en staan tereg op klagte van korrupsie, geldwassery en bedrog in verband met die Fishrot-omkoperyskandaal.
Namibian Sun kan bevestig dat toppartyleiers, onder wie pres. Hage Geingob, verlede week in Windhoek vergader het om die lot van dié voormalige ministers te bepaal wat bedank het nadat die multimiljoendollar omkoperyskandaal oopgevlek is.
Shanghala is 'n lid van die sentrale komitee, terwyl Esau op dié struktuur sowel as in die politburo van Swapo dien.
Sedert hul inhegtenisneming in November 2019, en ondanks die feit dat hulle uit die parlement geskors is nadat die skandaal aan die lig gekom het, het Geingob en sy partyleiers die besluit heftig verdedig om die duo in hul onderskeie Swapo-ampte aan te hou, en gesê hulle kan nie optree voordat hulle nie in die hof skuldig bevind word nie.
Die skuif om hulle voor die verkiesing uit die parlement te skop, is beskou as 'n foefie om kiesers te laat glo dat die party nie hul beweerde dade goedkeur nie.
Die feit dat geen interne stappe gedoen is nie – en Shanghala en Esau hul topposte behou het – gee egter 'n ander indruk.
VIR DIE WOLWE GEGOOI
Shanghala en Esau het 'n sleutelrol in Swapo se 2017-kongres gespeel.
Hulle het Geingob en sy Harambee-span gehelp om as oorwinnaars uit die stryd te tree by die vergadering wat die party in twee mededingende kampe verdeel het.
Nou, enkele weke voor die twee se verhoor op 22 April afskop, het Swapo glo besluit om die duo uit hul topposte in die party te skop.
By 'n vergadering verlede week het die party se politburo na bewering besluit die twee se aanstellings moet herroep word, nadat leiers tevrede was dat hul besluit deur die wette gelei word.
Na wat verneem word, het Shanghala se uitgelekte dokument waarin hy die party waarsku om sy “verouderde politieke program te moderniseer of andersins uit te sterf”, die besluit bespoedig om hom en Esau uit hul genoemde ampte te verwyder.
“Die laaste strooi was daardie lang ding wat Shanghala geskryf het,” het 'n bron in Swapo se binnekring gesê.
“Die brief is nie positief deur die leierskap ontvang nie, wat gevoel het of hulle vir die wolwe gegooi word. Nou word die tronkvoëls in gelyke munt terugbetaal.”
Shanghala het in Desember 2020 deur sy prokureurs 'n aansoek by die kantoor van die prokureur-generaal (PG) ingedien om regshulp te vra. Hy wou hê die regering moet regsverteenwoordiging verskaf óf sy regskoste dek en gesê hy het in sy amptelike hoedanigheid opgetree toe hy gedoen het waarvoor hy aangekla is.
Die PG se kantoor, wat nou al dié aansoek vir maande oorweeg, kon nog nie tot 'n besluit kom nie.
Pogings om kommentaar oor die hangende aankondiging van Swapo se sekretaris-generaal, me. Sophia Shaningwa, en die party se woordvoerder, me. Hilma Nicanor, te kry, was onsuksesvol.
- [email protected]
Kommentaar
Republikein
Geen kommentaar is op hierdie artikel gelaat nie