Swanu: Etiese gedrag steun op onderwysstelsel

Henriette Lamprecht - Die kulturele, etiese en morele gedrag van ‘n nasie steun op sy onderwysstelsel.“Ons kan nie praat van inklusiewe onderwys as hulpbronne ongelyk en onbillik verdeel word nie. Dit is baie onrealisties om onderrig vir almal te predik, terwyl hulpbronne in die meeste skole endemies laag is.”Volgens die president van Swanu, dr. Tangeni C.K. Iijambo, is die nuwe leerplan só ontwerp om te verseker daar is weinig leerlinge wat universiteit toe kan gaan. Daarom moet die implementering daarvan geleidelik geskied en nie vanjaar op die Namibiese kind afgedwing word nie.“Was daar voldoende opleiding vir die tot dusver verkeerd-opgeleide, onderopgeleide en semi-opgeleide onderwysers? As daar van onderwysers verwag word om te google vir toegang tot sekere inligting, het ons landelike onderwysers voldoende toegang tot rekenaars? Het ons regering toeganklike internetgeriewe verskaf?”Hy sê voorts in 'n verklaring die onderwysstelsel se beroepsgerigte opleiding het reeds tot ‘n hoë aantal gegradueerdes gelei wat werkloos is.“Die stelsel kan nie leerlinge dwing om by beroepsgerigte skole in te skryf, terwyl daar steeds soveel potensiaal is om in die Namibiese kind te ontdek nie.”Volgens hom is die gehalte van die nuwe onderwysleerplan in die gedrang omdat toegang tot tersiêre onderwys gekaap is. Hy het voorts gesê politieke verandering in die land het tot verskeie veranderinge in die leerplan gelei.Verskeie nuwe leerplanne is bekend gestel en geïmplementeer, maar binne ‘n paar jaar was dit egter vir skole te moeilik om te implementeer. Die rede hiervoor was volgens Iijambo die “skewe struktuur en ontwerp, die swak gehalte en hoeveelheid ondersteuningsmateriaal, ‘n tekort aan personeel en hulpbronne, sowel as die onvoldoende oriëntasie, opleiding en ontwikkeling van onderwysers”. “Skole word steeds geteister deur probleme soos hoë druipsyfers, onvoldoende hulpbronne en verwarring onder onderwysers as gevolg van swak opleiding en ontwikkeling oor wat van hulle in klaskamers verwag word.”Hy het voorts gemaan skole wat dié struikelblokke in die gesig staar, is onwaarskynlik om nasionale en streeksdoelwitte te behaal en sal voortgaan om as wanfunksioneel bestempel te word. In die lig hiervan is dit volgens Iijambo noodsaaklik om die rol van skoolbestuurspanne te ondersoek in die bestuur van die implementering van die inklusiewe nasionale leerplanverandering. “Die suksesvolle omgewing vir onderrig en suksesvolle implementering van ‘n nuwe leerplan hang af van die omgewing waarin dit geïmplementeer gaan word. So ‘n omgewing behoort gekenmerk te word deur ‘n fokus op doelwitte, gedesentraliseerde mag, die doeltreffende gebruik van hulpbronne en samehorigheid.”

Swanu: Etiese gedrag steun op onderwysstelsel

Kommentaar

Republikein 2025-05-02

Meld asseblief aan om kommentaar te lewer

Swanu: Etiese gedrag steun op onderwysstelsel

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie