Suide vier fees

Ian Nortje – Skoutyd in die Suide! Drie Suide-dorpe het onlangs hul jaarlikse skou gehou en behoorlik makietie gehou. Die grootste van die drie was sekerlik die Keetmanshoop Skou wat in die eerste week in September plaasgevind het.KeetmanshoopDié skou met die tema " Let's build a better tomorrow today" het op 2 September tydens die Extravaganza-aand amptelik afgeskop. Tydens hierdie geleentheid is Mej. Skou gekroon en die gehoor is deur optredes van Andriette vermaak. Die bekende akteur Hykie Berg was die seremoniemeester tydens dié glansaand.Volgens inwoners was die tent so vol, " die gehoor kon skaars opstaan toe die aand met die volkslied geopen is" .Me. Karlien Marais, een van die organiseerders, het gesê die skoukomitee het vanjaar probeer om iets anders as die gewone aan te bied." Ons het vanjaar 'n optrede deur Armand die singende cowboy gehad. Hy het Country-liedjies gesing terwyl sy perd toertjies en gechoreografeerde bewegings uitgevoer het," het sy gesê.Marais sê Brian Capper, 'n Suid-Afrikaanse kampioen op die gebied van motorfiets-toertjies, het ook by die skou opgetree. " Sy vertoning was veral gewild onder die jongklomp en het verseker dat jou are vol adrenalien gepomp was," sê sy.Vir dié wat hul adrenalienvlakke verder wou opjaag, was daar vermaak soos die mallemeule. Ander kindervermaak het produksies soos Rooikappe en Wolf vir laerskoolkinders en Awe Ma, ek's Cool Koos vir tieners ingesluit.Die landbouprogram was ewe opwindend, met perdekampioenskappe, die skouveiling en ’n troeteldierskou. Die trompoppies van die Privaatskool Keetmanshoop, ’n babaskou, waterkaskenades, toutrek-kampioenskappe en die 4x4 vasbyt het vir verdere vermaak gesorg.Soos tydens vorige jare was daar ook 'n wye verskeidenheid kraampies met eet- en drinkgoed, lekkernye, speelgoed en tierlantyntjies. Privaatskool Keetmanshoop het ook 'n teetuin-kuierarea gehad waar leerlinge van die skool koek, koffie, tee en ander lekkernye verkoop het.Die skou is die Saterdag met 'n Nama Rieldanskompetisie en optredes deur Gazza, S Man en Tabakan afgesluit.Die president van die skouvereniging, mnr. Leon van Wyk, sê 'n skou is byna die enigste geleentheid wat 'n gemeenskap bymekaar kan bring." Ons werk elke jaar hard om die Keetmanshoop Skou die beste ervaring vir besoekers te maak wat hulle ten volle kan geniet. Dit is die enigste geleentheid waartydens 'n gemeenskap bymekaar kom en kan saamwerk. Soms is mense lief om kritiek te lewer oor wat ander mense doen, maar 'n mens moet eerder probeer om 'n bydrae te lewer pleks van altyd foute te probeer uitwys," het hy gesê.StamprietDie jaarlikse Stampriet Skou het verlede week op die Stampriet Boerevereniging se terrein plaasgevind en 'n propvol program het skougangers besig gehou.Die skou is deur die Stampriet Boereverening moontlik gemaak en georganiseer en 'n wye verskeidenheid kraampies, musiek en skoudiere het vir genoeg vermaak gesorg.AranosDie Onder-Nossob Boerevereniging het op 7 en 8 Augustus die Kalahari Boeredagskou op die Aranos Boerevereninging se perseel gehou.Volgens die voorsitter van die boereverening, mnr. Basie van Wyk, word die geleentheid jaarliks op 'n roterende basis deur die verskillende boereverenings georganiseer.Sowat 300 feesgangers het tydens die twee dae die boeredagskou besoek. 'n Slaglamkompetisie en 'n vroueprogram waartydens 'n demonstrasie van pottebakkery gegee is, is by die geleentheid aangebied.Vir die kinders was daar vermaak soos 'n springkasteel en verskeie uitstallers het hul produkte by die geleentheid vertoon.'n Steakbraai is die aand gehou en Nick Stevens het vir musiek gesorg." Ons het net lekker gekuier, gedans en onsself geniet. Die geleentheid het suksesvol en glad afgeloop," het Van Wyk gesê.

Suide vier fees

Kommentaar

Republikein 2025-10-27

Meld asseblief aan om kommentaar te lewer

Suide vier fees

Kommentaar

Republikein 2025-10-27

Meld asseblief aan om kommentaar te lewer

MELD AAN

Advertensie