Suburbs enigste wat klim ná Kudus vasval

Andrew Poolman - FNB Western Suburbs was die enigste klub wat sy posisie op die puntelys verbeter het na afloop van die negende naweek van die Namibië Rugby-unie se premierliga.Suburbs was Saterdag in 'n hewige stryd teen Trustco United gewikkel voordat die Khomasdallers die naelbyter met 30-27 beklink het. Deurentyd was daar min te kies, met Suburbs wat rustyd ook sy neus met net twee punte voor gehad (17-15). Albei spanne het uiteindelik vier drieë gedruk.Terselfdertyd het Kudus se nederlaag met 7-12 in sy wegwedstryd teen Rehoboth Rugbyklub hom in sy spore gestuit en bygedra dat Suburbs sy plek in die topvier oorgeneem het.Die naweek se fratsweer met sterk wind, koue en selfs reën het ook op die rugbyveld sy invloed laat geld. Al drie dié elemente was Vrydagaand ter sprake toe Unam die grootste eindtelling van die seisoen (76-7) teen Reho Falcon opgestapel het. DEURSLAGGEWENDSaterdag se wedstryd by United is beskou as van deurslaggewende belang tussen twee klubs wie se visier ferm op die halfeindronde ingestel is.Dit was nie 'n goeie dag vir skoppers pale óf kantlyn toe nie, met skewe pogings kantlyn wat soms direk uit was of agter die doellyn uitgerol het.Ricardo Swartz, ná 'n lang besering terug op buitesenter as een van Suburbs se belangrike veelsydige agterspelers, was die eerste driedrukker met goeie voetwerk om ná 'n paar fases te gaan afrond.United se skrumskakel Herman Stroh het sy krag gewys toe hy teruggeslaan het met 'n drie onder die pale nadat hy platgetrek was, maar toegelaat is om op te staan en verder te hardloop. Winmar Rust het verdoel, ná 'n vroeër strafdoel.Vir Suburbs-vleuel Nikin Cloete se gebruiklike drie het hy 'n maklike lopie doellyn toe gehad nadat die harde werk reeds gedoen was, om sy span met 14-10 voor te plaas.United was ná 38 minute oor die doellyn ná 'n lynstaandryf, maar het 'n strafskop afgestaan terwyl Suburbs geen kontak met die dryfbeweging gemaak het nie. Die Khomasdallers het met 'n tikskop wyd aangeval en ver gevorder om 'n strafskop binne trefafstand vir hul skopper Justin Nel te kry en hul telling te laat aangroei.United het voor rustyd 'n teenhou geslaan met 'n oorstootdrie deur slot Winmar Rust, wat egter nie kon verdoel nie.Western Suburbs se stut Aleck Botha was die eerste driedrukker elf minute ná rustyd, vanaf 'n vinnige ingooi by 'n lynstaan ná 'n strafskop.Nog 'n goeie periode vir Suburbs is deur die slot Uno Katjiuongua naby die regterhoek afgerond, met die skop van Nel wat weer nie oor was nie (United 20 Suburbs 27).Twee taktiese hoë skoppe wat Suburbs teruggewen het, was die aanloop tot nog 'n strafdoel vir Nel om hul dertigtal op die telbord te plaas.United het weer 'n lynstaandryf opgestel van waar stut Simon Kanime die drie gedruk het en hoewel die tuisspan in die laaste oomblikke desperaat aangeval het, kon hulle nie punte byvoeg nie.WEGHOLTELLINGDie wenlose Reho Falcon sou altyd in die moeilikheid wees teen die gedugte Unam wat ná 'n paar harde naweke 'n slag weer hul gesag wou afdwing. Die studente het 'n lang beseringslys, hoewel dit min verskil gemaak het in hul sege van 76-7.Die swart truie het onverwags die voortou geneem met losskakel Des-Lee Beukes se eerste drie, verdoel deur heelagter Casey Beukes.Dié 7-0 voorsprong was egter ook Falcon se laaste punte, voordat Unam twaalf drieë vir die aand gaan druk het.Haker Jeandre Cloete was in sy noppies om in die tweede helfte sy driekuns te behaal, oomblikke voordat hy afgehaal is en sy plaasvervanger Immanuel Samuel dieselfde gedoen het.Unam se losskakel Romano Lento het benewens twee drieë van sy eie ook met twee doelskoppe geslaag toe hy later die taak by heelagter Denver Murorua (ses doelskoppe) oorgeneem het.Ander driedrukkers vir Unam was regtervleuel Silvano Beukes, senters Camlo Martin en Milaan van Wyk, slot Nic Kotze en die plaasvervangers Freddy Puriza en Chess Lawrence. KUDUS INGEHAALRehoboth Rugbyklub het gewys dat hy ook nie sommer lig geskat kan word nie, toe hy sy tuiswedstryd teen Kudus met 12-7 beklink het (rustyd 7-7).Die Walvisbaaiers het ná nege minute 'n verdoelde drie behaal, maar kon niks byvoeg nie. Twee drieë deur die Rooi Bulle – losskakel Howard Titus ná 20 minute, wat hyself verdoel het, en Xavier van Wyk halfpad deur die tweede helfte het die skaal in hul guns geswaai.“Ons is baie opgewonde vir die res van die seisoen ná ons derde oorwinning in 'n ry. Soos die telling aandui, was dit 'n harde wedstryd. Ek is veral beïndruk met ons verdediging wat wedstryd vir wedstryd verbeter,” sê Rehoboth se spanbestuurder, Marschell Diergaardt.“Kudus het hul oosweer saamgebring, toe kom verander dit in Rehoboth na die wesweer. 'n Verskriklike wind het tydens die wedstryde gewaai. Die skeidsregter Stephan Kellerman moet ook 'n pluimpie kry vir 'n skitterende dag op kantoor met die fluitjie. Hy blaas rêrig goed.”• Die premierliga se huidige puntestand:1 Unam 7 uit 8 gewen, 39 punte2 Wanderers 4 uit 7 gewen, 27 punte3 United 4 uit 8 gewen, 23 punte4 Western Suburbs 4 uit 8 gewen, 22 punte5 Kudus 4 uit 7 gewen, 20 punte6 Rehoboth 4 uit 8 gewen, 19 punte7 Reho Falcon 0 uit 8 gewen, 1 punt

Suburbs enigste wat klim ná Kudus vasval

Kommentaar

Republikein 2026-03-20

Meld asseblief aan om kommentaar te lewer

Suburbs enigste wat klim ná Kudus vasval

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.