Subsidie vir inentings: Finale somme moet nog uitgeklaar word

Private mediese fondse in Namibië het reeds tydens onderhandelinge in Februarie en Maart vanjaar - voor die derde golf van die Covid-19-pandemie - ingestem om namens hul lede ‘n bydrae te maak tot die staat se onkoste vir inentings.
Tydens die maandelikse beleidsaankondiging by Staatshuis vanmiddag het dr. Kalumbi Shangula die bedrag van N$713,68 genoem.
Dit verteenwoordig blykbaar mediese fondse se bydrae tot die staatskas vir die volledige inenting van ‘n lid en elke gedekte afhanklike.
Mnr. Steve Tjiuoro, uitvoerende hoof van die Namibiese Vereniging van Mediese Fondse (Namaf), het vanmiddag aan Republikein gesê fondse het die bydrae van die begin as ‘n goeie herbelegging in nasionale gesondheid beskou.
Die bydrae geld net vir lede van private mediese fondse; nie Psemas as staatsplan nie.
Volgens Tjiuoro wag Namaf egter nog op die regering om meer presiese berekeninge te verskaf.
Shangula het gesê data sal gereëld vir verifiëring beskikbaar gestel word om die subsidiestelstel te ondersteun.