Strzelecki-moordsaak: Geen borgtog

Jessica Botes en Adolf Kaure op Swakopmund - Die drie beskuldigdes in die moordsaak van die bejaarde Strzelecki-egpaar is gister in die landdroshof op Swakopmund borgtog geweier.Dít terwyl 'n menseketting teen geweld op dié kusdorp gevorm is.Die staatsaanklaer, mnr. Dalon Quickfall, het weens die erns van die misdaad borgtog aan die beskuldigdes, mnre. Jerobeam Simon Shidute (23), Fabianus Lazarus (24) en Daniel Stephanus Nghifila (26), teengestaan.“Daar is duidelike openbare verset teen sulke grudade en weens openbare belang en verdere ondersoek is ons gekant teen die toestaan van borgtog aan die beskuldigdes,” het Quickfall gesê. Die verhoor is tot 6 Desember uitgestel vir verdere ondersoek.'n Menseketting is gisteroggend van die landdroshof af tot by die middedorp gevorm in protes teen die onlangse vlaag van geweldmisdade in die Erongostreek.Inwoners het ook in stille protes tydens die verskyning van drie beskuldigdes voor die landdroshof bymekaargekom. Die beskuldigdes het na bewering me. Rosvietha Sieglinde Strzelecki (79) se kop teen ’n muur gekap voordat sy verwurg is tydens 'n rooftog op 2 Augustus by hul huis in die Venita-woonbuurt. Haar man, mnr. Siegfried Paul Hermuth Strzelecki (82), is vasgebind en aangerand en het 'n paar weke later in die intensiewesorgeenheid van die Marie Douglas-sorgsentrum aan sy beserings beswyk.Mnr. Clinton Lang, organiseerder van die optog, het Swakopmunders gevra om hande te vat as simbool van die dorp se solidariteit. “Die idee van die menseketting is om te wys ons gee vir mekaar om. Baie mense kan nie vandag by die hof wees nie, maar die ketting gee hulle 'n kans om deel van hierdie monumentale en geskiedkundige stille protes te wees," het hy gesê. Sommige skole het leerlinge en onderwysers toegelaat om 'n pouse om 10:00 te hê om hul eie menseketting te vorm. “Hoewel ons vir geregtigheid in die onlangse moordsake betoog en vir geen borgtog aan die gewelddadige oortreders, deel ons ook hoop, vrede, liefde en voorspoed tussen mekaar," het Lang gesê.Daar is 'n toename in moorde op bejaardes soos die Strzelecki-egpaar en mnr. Manfred Hartmann (78) op Swakopmund. INWONERS REAGEEROp die vraag waarom inwoners aan die stille protes deelneem, het me. Linda Laubscher geantwoord: "Ek is enkellopend en bo 60. Ek voel skielik nie veilig nie, want ek bly nie in 'n ouetehuis nie, maar op my eie. Ek hou daarvan om op die strand te loop, maar nou voel ek 'n bietjie bang. Dit is my plig om aan die protes deel te neem, want hierdie dinge het nooit op Swakopmund gebeur nie." Mnr. Shapwa Vicent het gesê hy neem deel aan die stille protes vir die slagoffers wat vermoor is, want hulle is ou en onskuldige mense."Ek het hierheen gekom om te luister wat aangaan. Ek wil nie hê bejaardes moet vir niks vermoor word nie," het mnr. Gabriel Saltiel gesê.

Strzelecki-moordsaak: Geen borgtog

Kommentaar

Republikein 2025-05-02

Meld asseblief aan om kommentaar te lewer

Strzelecki-moordsaak: Geen borgtog

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie