Stropers getuig in Rust se verhoor

Jacqueline Louw - Die getuienis van stropers wat teenwoordig was tydens 'n noodlottige skietvoorval verlede jaar op die familieplaas van Kai Rust, is gister tydens die moordverhoor afgehandel.Landdros Alexis Diergaardt het gister gehoor dat Ntsamba Nikanor en Morongo Hausiku, twee wilddiewe wat teenwoordig was toe hul vriend, Andreas Ukandanga (41) tydens 'n skietvoorval op mnr. Kai Rust se plaas doodgeskiet is, se aanvanklike polisieverslae geen melding maak van skote wat op hulle afgevuur is nie.Mnr. Kai Rust, wat daarvan beskuldig word dat hy 'n stroper op 27 Januarie 2016 doodgeskiet het en probeer het om drie ander onwettige jagters dood te skiet, het Dinsdag met die aanvang van sy verhoor op al die klagte teen hom onskuldig gepleit.Mnr. Jan Wessels, Rust se regsverteenwoordiger, het gister aan die hof gesê dat 'n persoon slegs skuldig bevind mag word aan poging tot moord indien die klaers beëdigde verklarings wat die klagte uiteensit, aflê en onderteken.Tydens kruisondervraging van Nikanor en Hausiku het aan die lig gekom dat die polisieverklarings wat dié twee in Januarie 2016 afgelê het, nie bewerings bevat dat skote op hul afgevuur is terwyl hulle op die vlug geslaan het nie.Nikanor het tydens kruisondervraging deur die staat gesê dat hy en die ander twee stropers, Hausiku en Ndara Ndjamba, gevlug het nadat Ukandanga geval het. Nikanor het getuig dat terwyl hulle van die toneel af weggehardloop het, hulle twee skote “wat by ons verby gons” gehoor het. Die skote het stof in die grond gemaak, het hy getuig. Tydens kruisverhoor deur Wessels het Nikanor gesê dat hy dalk nie die storie van die skote wat op hul afgevuur is aan die polisie vertel het nie, maar het getuig:“Ek het dit gesien”. 'n Rukkie later het hy weer getuig dat hy wel aan die polisie gesê het daar is op hulle geskiet, maar dat die polisie dit nie neergeskryf het nie.Volgens Wessels het die staatsaanklaer op Okahandja tydens Rust se eerste borgtogverhoor beweer dat sy in besit was van drie verklarings waarin die stropers beweer dat daar op hulle geskiet is tydens die skietvoorval op die Rusts se plaas. Nikanor het getuig dat hy nooit die aanklaer ontmoet het nie.Wessels het dit aan Nikanor gestel dat die aanklaer leuens aan die hof vertel het en dat Nikanor 10 maande ná die skietvoorval 'n nuwe verklaring afgelê het waarin hy sê dat twee skote op die voortvlugtende stropers gevuur is.'n Derde stroper, Morongo Hausiku, het ook gister getuig. Hy het getuig dat hy en sy vriende op vlug geslaan het nadat Ukandanga geval het. Op Wessels se vraag dat sy storie dat op hulle geskiet is toe hulle weggehardloop het, nie in sy eerste polisieverklaring verskyn nie, het Hausiku geen kommentaar gelewer nie. Hausiku het getuig dat die tweede verklaring wat hy in Augustus 2016 gemaak het, wel deur hom gemaak is, maar dat iemand anders dit namens hom onderteken het. Wessels het aan Hausiku gesê dat die beskuldigde nog nooit skote op 'n persoon of in hul rigting gevuur het nie.Die verhoor is tot 22 Junie uitgestel om die staatsaanklaer, mnr. Filemon Nyau, die geleentheid te gee om met 'n getuie te konsulteer.

Stropers getuig in Rust se verhoor

Kommentaar

Republikein 2025-06-19

Meld asseblief aan om kommentaar te lewer

Stropers getuig in Rust se verhoor

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie