Stormweer gooi kusdorpe met modder

Des Erasmus - Die kusdorpe Lüderitz, Walvisbaai, Swakopmund en Hentiesbaai is almal deur die stormweer op land en op see gelooi.Die soutpad agter die duinegordel tussen Swakopmund en Walvisbaai is Vrydagmiddag vir ‘n onbepaale tyd gesluit weens vloedskade in die dorsland. Die ergste elektriese storm in jare het Swakopmund Donderdag om 23:30 bereik en tot om 02:40 Vrydag voortgeduur. Op see was die weerlig soos ‘n ligvertoning in die nag. Oor Swakopmund het weerligslae soos sambokslae geklink. Swakopmunders kon hulle op die stormweer instel met die aanhoudende dreuning wat uit die rigting van Langstrand gekom het. Op die vakansieoord het die donderweer met ‘n stortbui van ‘n paar minute gepaardgegaan. Daarna het ligte reën die ganse nag, deur die loop van die dag en tot Vrydagaand afwisselend geval. Die gevolg was dat die woestyndorp nooit kans gekry het om af te droog nie. Met die eerste harde buie van die nag is tot 10 mm op plekke gemeet met die ligte reën wat daarna die ganse nag en dag geval het. Die reënweer het eers laat Vrydagaand opgeklaar. Swakopmund het nie ‘n behoorlike dreineringstelsel nie omdat dit feitlik nooit reën nie. Baie van die huise het ook nie geute nie. Die gevolg was groot waterpoele wat in die strate gevorm het en die ongeteerde soutstrate wat in modderbaddens verander het. Op plekke is die seepgladde strate deur moedswillige waaghalse gebruik om al glyend in hul motors sirkels (“doughnuts”) te trek. Op Swakopmund self het van die winkels hul deure Vrydagmiddag vroeg gesluit en was plekke wat op kitskos en wegneemetes konsentreer die aand toe. Saterdagoggend het groot slaggate veral by aansluitingspunte van verkeer op teerstrate op Swakopmund en Walvisbaai ontstaan en moes versigtig bestuur word met waarskuwingstekens wat nog opgerig moes word. Saterdagoggend was daar ‘n toeloop na winkels wat in boumateriaal spesialiseer, met baie inwoners wat lapwerk aan huise moes doen.Volgens een berig Vrydag van Walvisbaai was die hawedorp so nat dat “selfs die taxi’s stadig ry”. Walvisbaai se gholfbaan was onder water en het na ‘n meerlandskap gelyk. Ligte reën het ook oor die binnelandse grensgebiede van die Namibwoestyn geval. Die pad agter die duine wat normaalweg gebruik word om vragverkeer van die soutpad te hou, was nie net weens die baie water gesluit nie. Volgens die eerste aankondiging van die padsluiting was die pad ook plek-plek verspoel. Dit was die tweede keer binne weke wat reënweer Swakopmund gelooi het. Die woonbuurte DRC, Tamariskia, Vineta en Ocean View was nog besig om uit vloedskade op die laaste dag van die Paasnaweek op te staan toe die nuwe reënweer gekom het. SUIDEVolgens mnr. Noel Marais van Lüderitz het dit 57 mm op die dorp gereën, berig Tanja Bause.“Dit het Donderdagmiddag begin reën en teen Vrydagoggend het ek 27 mm uit die reënmeter uitgegooi. Vrydag deur die dag het ons nog 30 mm ontvang,” het hy gesê. Sover hy kan onthou het dit meer as tien jaar laas soveel op dié dorp gereën. “In 2006 het ons sowat 140 mm ontvang en van daar af het ons bitter min reën gekry, slegs ’n paar millimeter per jaar.” Die openbare biblioteek op die dorp is Vrydag met water oorstroom en die gemeenskap het ingespring om te help droogmaak, maar verder was daar geen ernstige skade nie. Volgens mnr. Piet Swiegers van Klein-Aus Vista het die hele Sperrgebiet van Aus af tot in Lüderitz goeie reën ontvang.“By Garub, waar die wilde perde is, het ons 40 mm reën ontvang, wat baie goeie nuus vir die perde is,” het hy gesê. Volgens Swiegers het dit in Mei 2011 die laaste keer soveel gereën. In die daaropvolgende jare het daar slegs ’n paar druppels hier en daar geval. “’n Plaas in die Sperrgebiet het selfs 60 mm ontvang,” het hy gesê. Herfsreën het oor die naweek ook die westelike binneland en die hoofstad bereik. Reënvalsyfers soos aangemeld op die Facebook-blad "Reën in Namibia" (in millimeter) is: Garub 40, Sossusvlei Lodge 25, Walvisbaai 25, Duwiseb-kasteel 25, Maltahöhe 13, Wlotzkasbaken 10,8, Oranjemund 10, Koichab-pan by Lüderitz 9,8, Rehoboth 9, Uis 7, Karibib 5, Grootberg Lodge 4, Keetmanshoop 2,5, Outjo 1,5.Windhoek en omgewing se reënvalsyfers (in millimeter) is: Brakwater 55, Hochlandpark 26, Dorado Park, Olympia en Suiderhof 15, Cimbabasia 13, Pionierspark en Eros 12, Avis 10, Finkenstein 9, Omeya en Elisenheim 7 en Kapps Farm 5.

Stormweer gooi kusdorpe met modder

Kommentaar

Republikein 2026-02-04

Meld asseblief aan om kommentaar te lewer

Stormweer gooi kusdorpe met modder

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.