Storielyne met baie kinkels

Marianna Brandt bied van 25 tot 27 Februarie ? skryfkursus vir aspirantskrywers in Windhoek aan, asook ? gratis eendag kursus op 24 Februarie om mense te leer om stories neer te skryf. Dié skrywer, wat in Kaapstad gebore is en in Namibië grootgeword het, is die verbeeldingryke skepper van ? rits kinder- en jeugverhale. Uit haar pen het onder meer die Die Geheim van die Toringkamer, ? riller wat op Swakopmund afspeel, gekom. Kollig het ? paar vrae aan haar gestel.Vertel ons meer van jouself?Ek was twee jaar oud toe ek, my babasussie en ma en pa na Namibië, daardie jare se Suidwes, verhuis het van Kaapstad af. My pa was ‘n Suidwester. Hy is in 1966 in ‘n helikopterongeluk aan die Seekus van die Dood oorlede. Hy was in die polisie. My ma is toe weer getroud en ons het Namibië in 1970 verlaat.Hoe het jou liefde vir boeke en stories vertel ontstaan?Ek het grootgeword met die radio en middae het ek na al die vervolgverhale geluister. Maar van kleintyd af het my ma vir ons stories gelees en vertel. Toe ek 12 was, het ek my susters en die bure se kinders bymekaar gekry en ons het ons eie ‘radioverhaal’ op my ma se bandmasjien vervaardig. Maar ek moet byvoeg, daardie jare se boeke vir kinders was maar min en daar was nie lekker fantasie-, spook- en grilstories in Afrikaans nie. Daar was ook nie in daardie jare in Namibië boeke in Engels beskikbaar nie. Engels was vir ons ‘n uitheemse taal. Jy het dit net in flieks gehoor.Vertel ons van die boek wat op die Desert Express bekend gestel is?Die boek is al in 2001 bekend gestel. Die naam daarvan is Die Geheim van die Toringkamer. Dit speel af in die ou stasiegebou van Swakopmund wat deesdae ‘n hotel is. En natuurlik die Desert Express-trein. Dis ‘n riller-spook-speurverhaal met ‘n liefdesdraadjie. Ek het wel al twee boeke van ’n trilogie in die mark - Emma en die Geheime Gang en Emma en die Creepy Komplot. Die boeke is in boekwinkels in Namibië beskikbaar en die eerste een op die skoollys.Wat inspireer jou?Jy sal nie glo wat my inspireer nie. Ek is mal oor geskiedenis, daarom my boeke oor die koms van Jan van Riebeeck na die Kaap, die storie van Mark Shuttleworth na die internasionale ruimtestasie en die stories oor beroemde hoenders deur die jare. Behalwe geskiedenis hou ek daarvan om in ou begraafplase rond te loop en na die grafstene te kyk - soms is daar interessante boodskappe op. Hoekom dit spook op plekke inspireer my ook. Ek wil weet hoekom spook hulle daar. Ek hou ook daarvan om na interessante plekke te gaan soos die ou kastele in Engeland, museums en diesmeer. Dan is daar ook die interessante berigte in koerante. Ek knip dit uit en later, na jare, maak dit ‘n lekker storie. Wat lees jy in jou vrye tyd?Ek lees baie kinder- en jeugboeke en in Engeland bly ek op hoogte oor wat in die wêreld gepubliseer word. Ek lees ook graag boeke oor die nuwe wetenskap van kwantumfisika, die geskiedenis van Engeland en die lewensverhale van die groot skryf- en musiekmeesters.Lys drie boeke wat jy al meer as drie keer gelees het?Ek het Neverwhere van Neil Gaiman al twee keer gelees en sal dit weer lees. Rooftoppers deur Katherine Rudell kan ek ook sterk aanbeveel. Circus Mirandus deur Cassy Beasley – pragtige boek. Gravenhunger van Harriet Goodwin - ‘n lekker spookriller.Wat is die belangrikste invloed op jou werk?Die grootste invloed is die kinders wat my boeke lees - wanneer hulle vir my sê hulle het dit baie geniet en wanneer kom die volgende een. Dit vuur my aan om nog te skryf. My man, Michael, is ook ‘n groot inspirasie. Ek bespreek die strorielyne met hom en dan kom daar sommer nog baie kinkels by. Jy het al vele gepubliseerde werke agter jou naam: Hoe pak jy die skryf van ? boek aan – vertel ons van die proses?Om ’n boek te skryf, is ‘n groot proses. Jy kry nie net ‘n idee en gaan sit en skryf nie. Die vooraf werk is die grootste en die belangrikste. Heel eerste moet jy weet vir wie jy wil skryf, want jy skryf anders vir kinders jonger as 8 as vir kinders van 9 tot 12. Jy skryf ook anders vir die tieners. Dan moet jy besluit oor ‘n idee en dan kom die navorsing. Jy moet ook besluit gaan dit fantasie, ‘n riller of ‘n spookstorie wees of al-drie-in-een-storie. Dan kom die werk van karakterontwikkeling, want jou karakters moet driedimensioneel wees. Daarna kom die storielyn waarin jy die karakters probleme gee wat hulle moet oplos. Jou storie moet ook ‘n onvoorspelbare einde hê. Al hierdie bostaande werk moet vooraf gedoen word voor jy begin skryf . . . Ja, dit is ’n proses. Die eintlike skryfdeel is maar so ‘n maand of wat. Vertel ons meer van die Emma-trilogie?Ek is op die oomblik besig met die derde boek in die reeks. Ek geniet die skryf daarvan baie, net soos die vorige twee. Die storie speel af in ‘n anderste koshuis, ‘n koshuis waarvan kinders net kan droom, maar saam met dit kom ook wat die andersheid van die koshuis bepaal. Die karakters in die trilogie, veral die skoolkinders en die onderwysers [sommige van hulle] is regdeur die drie boeke, maar elke boek het ‘n heel interessante skoolhoof. Daar speel gruwels in die koshuis af wat Emma se speurvernuf laat vlam vat. Ek het baie navorsing vir die trilogie gedoen. Kinders kan nadat hulle die boeke gelees het verder gaan lees oor die dinge wat in die boeke gebeur.Het jy reeds planne vir toekomstige projekte?Ek het ’n fantasie in Engels geskryf wat op die Seekus van die Dood afspeel, wat ek The Desert of Bones noem. Ek hoop om dit nog hierdie jaar in Amerika voor te lê aan ’n agent. ’n Projek wat my na aan die hart lê, is om Namibiese skryftalent in die skryf van kinderboeke te bevorder. Namibia is ‘n land van kontraste, soveel legendes, kulture en geskiedenis. Ek wil sien dat Namibia se stories in die wêreld vertel word. Daarom gaan ek ‘n kursus aanbied vir mense wat passievol is oor stories en oor skryf om die droom van my in Namibië af te skop. Dit gaan ook nie net bly by boeke nie, as jy ‘n storie kan skryf, kan jy ook toneelstukke, radio-verhale, TV-draaiboeke en flieks skryf.Daar sal ‘n kursus wees van drie dae vanaf 25 tot 27 Februarie in die Nasionale Biblioteek in Windhoek. Hierdie groep gaan leer hoe om die “blockbuster”-stories te skryf - rillers, fantasie, spookstories, skoolstories en al hierdie genres gemeng. Hierdie mense gaan die eerste groep skrywers wees.Dan sal ek ‘n gratis een dag kursus aanbied op 24 Februarie – dit is slegs vir mense wat wil leer hoe om hulle stories neer te skryf – die soort van stories wat hulle ouma en oupas vir hulle vertel het en legendes. Hier kyk ons na die inheemse mense, soos Ovambo’s, Damaras en Herero’s en Namia-mense. Later wil ek hierdie groep insluit in die bostaande groep.Vir verdere inligting in verband met die skryfkursusse, stuur ‘n e-pos na brandtmarianna@gmail.com. Die kursus word in Afrikaans aangebied, maar Engelssprekendes is ook welkom en konsepte sal in Engels herhaal word.

Storielyne met baie kinkels

Kommentaar

Republikein 2025-07-03

Meld asseblief aan om kommentaar te lewer

Storielyne met baie kinkels

Kommentaar

Republikein 2025-07-03

Meld asseblief aan om kommentaar te lewer

MELD AAN

Advertensie