Stop oliesoektog, sê Anglikaanse biskoppe

Kerk wêreldwyd bekommerd oor gebeure in Kavango

11 March 2021 | Omgewing
Ronelle Rademeyer – Anglikaanse biskoppe van oraloor die wêreld het ’n petisie onderteken waarin hulle eis Reconnaissance Energy Namibia (ReconAfrica) moet dadelik sy oliesoektog in die Kavango-kom staak.

Biskoppe Raphael Hess en Margaret Vertue het die petisie vroeër die week in Kaapstad aan Namibië se konsul-generaal, me. Sarafina Tshilunga, oorhandig.

Dié veldtog teen ReconAfrica het begin toe biskop Luke Pato die Anglikaanse Kerk daarop gewys het dat verkenningsboorwerk suid van Rundu begin het, blyk dit uit ’n berig hieroor op die webblad van die Wêreldraad van Kerke.

“Die proses was nie deursigtig nie en toe Namibiërs hul oë uitvee, was dié mynbou-ooreenkoms onderteken en aan die gang. Daar is baie vrae wat beantwoord moet word,” het Pato gesê.

Altesaam 34 biskoppe en drie aartsbiskoppe van oraloor die wêreld het die petisie onderteken wat nie net aan die Namibiese regering oorhandig is nie, maar ook aan ReconAfrica se bestuur by dié Kanadese olie- en gasmaatskappy se hoofkantoor in Vancouver.

ReconAfrica het vroeër vanjaar met verkenningsboorwerk begin en wag ook vir ’n omgewingsklaringsertifikaat (ECC) wat hom sal toelaat om sy verkenningswerk deur middel van tweedimensionele seismiese opnames langs 450 km se bestaande roetes in die Kavango uit te brei.

Dié maatskappy se petroleum-eksplorasielisensie (nr. 73) laat hom toe om verkenningsaktiwiteite in blok 1819 en 1820 in die noordoostelike deel van Namibië te onderneem, het me. Maggy Shino, petroleum-kommissaris in die ministerie van myne en energie, vroeër die week in ’n verklaring gesê.

“Die maatskappy is tans in die vroeë eksplorasiefases en sal drie stratigrafiese gate boor. Die resultate wat verkry word, sal die uitleg van die seismiese opnames bepaal, wat die volgende stap is,” het sy verduidelik.

Volgens haar sal ’n produksielisensie eers uitgereik word as die resultate van die toetsgate en seismiese opnames op ’n kommersieel lewensvatbare olievonds dui.

VELE NATUURBRONNE
’n Luide oproep deur omgewings- en ander drukgroepe vir stappe téén die oliesoektog klink sedert verlede jaar op verskeie platforms op – enersyds omdat fossielbrandstof-ontginning indruis teen klimaatsplanne en tweedens omdat dit ’n verwoestende impak op die ongerepte Okavango-delta kan hê. Laasgenoemde is een van die mees ikoniese natuurgebiede ter wêreld, en is in 2014 as Wêrelderfenisgebied gelys.

Die Anglikaanse Kerk sê as Wêrelderfenis- en Ramsar Vleilandgebied is die Okavango-delta se biodiversiteit van onskatbare waarde. Dit is ook een van die sewe natuurlike wonders van Afrika.

Verder, sê die kerk, huisves dit die grootste oorblywende populasie Afrika-olifante, 400 voëlspesies en is dit ’n heiligdom vir baie ander diere. Dit word beskerm onder die protokol van die permanente waterkommissie van die Okavangorivier.

“Hierdie verkenning skend die San se regte onder die Verenigde Nasies-verklaring oor die regte van inheemse mense,” lui die petisie. “Water is ’n skaars en kosbare kommoditeit in Namibië, die droogste land suid van die Sahara.”

Die biskoppe wys voorts daarop Namibië is een van die mees kwesbare lande vir klimaatsverandering.

“Met ’n byna ongeëwenaarde potensiaal vir sonenergie, is dit nie sinvol om miljarde vate olie te onttrek nie,” sê hulle verder. “Die vermindering van koolstofvrystellings is ’n wêreldwye verantwoordelikheid.”

Hulle is ook bekommerd oor die “gebrekkige openbare deelnameproses” tot dusver. “Kommer wat deur plaaslike aktiviste geopper word, word geïgnoreer en die koerant The Namibian is weens sy berigte met regstappe gedreig,” sê die biskoppe en voeg by dat daar ook nie voldoende omgewingsimpakstudies was nie.

“Boorwerk in die Kavango-kom sal sy geologiese struktuur versteur en die waterstelsel vernietig wat hierdie unieke ekosisteem en wildreservaat ondersteun,” voer hulle aan.

SOLIDARITEIT
Die waarnemende hoofsekretaris van die Wêreldraad van Kerke, prof. Ioan Sauca, het solidariteit met die inwoners van Namibië en met die Anglikaanse gemeenskap betoon terwyl hulle betoog teen die skade wat olieboorwerk in die Kavango-kom berokken. “Ons kan nie die regte van inheemse gemeenskappe opoffer en God se skeppingsgeskenk ter wille van olie vernietig nie,” het Sauca gesê.

“As ons die internasionale doelwit wil bereik om koolstofvrystellings teen 2030 te halveer en teen 2050 koolstofneutraliteit te bereik, moet ons ons afhanklikheid van fossielbrandstowwe beëindig en die oorgang na hernubare energiestelsels maak,” sê hy.

- [email protected]

Soortgelyk

 

Pryse van petrol, diesel styg

52 minute gelede | Energie

Die prys van petrol en diesel styg aanstaande week met onderskeidelik 50 sent elk per liter. Die verhoging tree om middernag op 7 April in...

Baie nuwelinge kry viskwotas

1 uur gelede | Visserye

Ondernemings wat tevore visvangkwotas besit het, maak 29% van suksesvolle aansoekers uit, het die minister van visserye en mariene hulpbronne, dr. Albert Kawana, vanmiddag aangekondig.Dit...

WHO vra vir verdere studies oor oorsprong van SARS-CoV-2-virus

1 uur gelede | Gesondheid

Die verslag van die internasionale span van die Wêreldgesondheidsorganisasie (WHO) oor hul ter plaatse besoek aan Wuhan is vandag bekendgemaak, met die WHO se direkteur-generaal...

Sewe sterftes, 221 nuwe gevalle

2 ure gelede | Gesondheid

Namibië het nou 520 Covid-19-verwante sterftes, nadat nog sewe - twee in Windhoek en een elk in Walvisbaai, Outjo, Omaruru, Walvisbaai en Rundu - aangeteken...

Windhoekers met agterstallige rekeninge se water en ligte gaan...

3 ure gelede | Infrastruktuur

Die Windhoekse munisipaliteit sê inwoners van die hoofstad wie se water- en ligterekeninge 30 dae en meer agterstallig is, het tot Dinsdag 6 April om...

Sluitingsdatum vir Shining Light verleng

4 ure gelede | Kuns en vermaak

Die sluitingsdatum vir die Shining Light juweliersontwerpkompetisie is tot 30 April verleng. Me. Helena Mootseng, woordvoerder van die Namibian Diamond Trading Company (NDTC) sê...

Hoërskool Rehoboth gesluit tot ná Paasnaweek

7 ure gelede | Onderwys

Hoërskool Rehoboth is vanaf vandag tot Dinsdag 6 April gesluit. Volgens die bestuur van die skool sal dié tyd gebruik word om die skoolperseel deeglik...

Waarskuwingskote stuit vermeende diewe

18 ure gelede | Misdaad

Vermeende diewe is vroeër vandag in Robert Mugabelaan naby Bank of Namibia in die hoofstad in hegtenis geneem nadat skote afgevuur is. "Twee waarskuwingskote is...

Robberts bly in aanhouding

18 ure gelede | Howe

Erwin Leuschner – Die 36-jarige mnr. Daniel (Danie) Robberts bly in aanhouding nadat hy na bewering sy vriend, mnr. Thomas Frederick (Frikkie) van Schalkwyk (69),...