Stoop op vaart vir Gold Cup-driekuns

Andrew Poolman - FNB Wanderers hou sy kans vir die kwarteindstryd in sy eie hande, ná sy oortuigende oorwinning op sy tuisveld Saterdag in die SA Rugby-unie se Gold Cup-reeks vir provinsiale kampioenklubs (buiten universiteite) waarby Namibië en Zimbabwe ook ingesluit is.Heelagter Léan Stoop was een van verskeie uitblinkers in ’n vasberade vertoning van die Wit Hingste om die aanslag van die Northam Platinum Rhinos af te weer. Stoop het drie van die wenspan se drieë gaan druk en was deurgaans ’n gevaar wanneer die bal in sy hande beland het.Die besoekers van die myndorpie Thabazimbi in die Limpopo-provinsie is reeds in die eerste helfte van hul voete gespeel toe die Windhoekers ’n voorsprong van 29-3 opgebou het.Met die lengte en ondervinding van Nico Esterhuyse was die lynstane ’n dodelike pyl in Wanderers se koker. Ná agt minute was die draers van die wit truie met 8-0 voor toe Stef Botha ’n lynstaandryf afgerond het om die doellyn oor te steek. Mahco Prinsloo se doelskop was mis, maar in die eerste minuut ná die afskop het hy reeds ’n strafskop vir onkantspel deur die pale gejaag.Kaptein Alberto Engelbrecht was Wanderers se volgende driedrukker ná die waterpouse. Enkele oomblikke tevore is Rohan Kitshoff agter die doellyn verhinder om te druk, maar die Wit Hingste het ’n skrum en daarna ’n strafskop gekry en van die tikskoppie af kon Engelbrecht nie gekeer word nie.Geel kaarte vir die twee vaskopstutte AJ de Klerk en Patrick Mulamba het in die 28ste minuut ná ’n onderonsie gevolg. Mulamba sou later weer ’n molesmaker wees wat ’n rooi kaart van skeidsregter Jacky Husselmann gekry het.De Klerk se tydelike plaasvervanger in die voorry, Schalk Bergh, het sy speeltyd gebruik om ’n drie te druk. ’n Giftige breekslag deur skrumskakel Enem Kritzinger en ’n swak lynskop deur die Rhinos het Wanderers opnuut op die aanval geplaas, om Bergh se drie moontlik te maak.Net voor rustyd het ’n Rhinos-skop middelveldlangs getrek om haker Gerhard Lotter op een van sy sterk lopies te stuur. Agtsteman Stef Botha het dit verder gevoer en van die grond af het sy aangee vir Stoop op volle vaart gevind vir ’n drie sonder dat hy aangeraak is.Danksy Mahco Prinsloo se drie doelskoppe het die rustydtelling tot 29-3 aangegroei.Die Suid-Afrikaners het in die tweede helfte veel beter rekenskap gegee en hul senter Danie Loots het vroeg die eerste van sy drie drieë gaan druk. Wanderers het egter nog nie hul greep verslap nie. Van ’n lynstaan af het Botha en DG Wiese buite die oopkantvleuel gaan stelling inneem. Dit was egter ’n blote fopbeweging, want die eerste ontvanger Francois Wiese (binnesenter) het sommer op sy eie deurgestorm pale toe (36-10).Die Rhinos se langste voorspeler, agtsteman Dieter Marquardt, het met ’n verdoelde drie in die 52ste minuut teruggekap. ’n Wilde grondskop deur ’n Rhino-voorspeler het vir Stoop hardloopkans gegee, wat in ’n beweging na regs sy vleuel Phillip Nashikaku weggestuur het. Toe dié voorgekeer is, het sy lugskoppie in die kwartgebied reg gewip vir Stoop om dit met een hand beet te kry en ’n drie te druk.Daar was nog tyd vir drie drieë aan Wanderers-kant. Ná ’n tikskoppie is die bal deur die hande gestuur vir die woelige flank DG Wiese om pale toe te draf. Hy het egter ’n geel kaart gekry toe hy ná ’n laat stamp deur ’n opponent teruggestamp het.’n Halwe breekslag deur Mahco Prinsloo en nog ’n dryflopie deur Schalk Bergh het die gaping geskep vir flank Rohan Kitshoff om twee verdedigers te trek en die reserwehaker Theo Coetzee los deur te stuur.Wanderers se gereedheid om met die bal te hardloop, het in die laaste minuut die kans geskep vir Stoop om sy driekuns met nog ’n mooi lopie af te rond.• Ewe welkome nuus vir Wanderers was dat een van die voorlopers, die Goue Leeus se Pirates, die naweek op George teen Evergreens van SWD vasgeval het (35-31).Afrigter JP Nel en sy Wit Hingste kom komende naweek in ’n wegwedstryd teen die onoorwonne Impala Platinum van Rustenburg te staan. Op 8 Oktober word hul laaste groepwedstryd in Windhoek teen Evergreens afgesluit.

Stoop op vaart vir Gold Cup-driekuns

Kommentaar

Republikein 2025-05-15

Meld asseblief aan om kommentaar te lewer

Stoop op vaart vir Gold Cup-driekuns

Kommentaar

Republikein 2025-05-15

Meld asseblief aan om kommentaar te lewer

MELD AAN

Advertensie