Steve Smith: ‘Almal in SA was nog net gaaf’
Krieket
Tinus Van Staden - Toe hy by sy hotel in Sandton instap, het Steve Smith ’n terugflits van twee jaar gelede gekry.
“Ek het vlugtig gedink toe ek laas by hierdie hotel weg is, was dit nie mooi (tonele) nie. Dit was nie die beste tyd in my lewe nie. Maar ek het aanbeweeg,” het Smith, een van die beste kolwers in wêreldkrieket, gister by die Wanderers in Johannesburg gesê.
Maart 2018 was inderdaad nie die beste tyd in die voormalige Aussie-kaptein se lewe nie. Hy is saam met David Warner en Cameron Bancroft in skaamte huis toe gestuur weens die balpeutery-skandaal in die derde toets van daardie reeks teen Suid-Afrika in Kaapstad.
Smith en Warner het albei ’n skorsing van ’n jaar uitgedien, Bancroft een van nege maande. Eersgenoemde twee is nou vir die eerste keer terug in Suid-Afrika vir ’n reeks van drie T20-wedstryde en drie eendagwedstryde. Die aksie begin Vrydagaand met ’n kitswedstryd in Johannesburg.
“Dit het nie goed geëindig toe ek laas hier was nie, maar ek het ook lekker herinneringe daaraan om in Suid-Afrika te speel, so dis lekker om terug te wees,” sê die 30-jarige Smith.
Sedert sy terugkeer het Smith goeie krieket by die 2019 Wêreldbeker-toernooi in Engeland gespeel en daarna bykans bomenslike kolfpeil in die reeks om die As getoon. Weg van die veld het hy ook gegroei.
“Ek het baie geleer in die laaste twee jaar. Ek het geleer om dit (die spel) nie te ernstig op te neem nie en om dit te geniet,” sê Smith.
Daar was ’n siening dat die balpeutery-skandaal die voortvloeisel van ’n Aussie-ingesteldheid van wen ten alle koste was. Sedertdien het ’n nuwe afrigter, Justin Langer, ingekom en die spankultuur verander.
Die Suid-Afrikaners met wie hy tot dusver te doen gehad het, het hom nog nie aan die skuurpapier-episode herinner nie.
“Oral waar ek was, was die mense baie vriendelik. Ons was (Dinsdag) by ’n skool, Pumla-skool, en dit was ’n ongelooflike ervaring. Dis ’n ongelooflike plek om heen te toer.
“Ons was ook by ’n paar restaurante waar mense baie gaaf was. Mense het my genader en foto’s geneem, so dit was maar net soos wat dit nog al die kere was wat ek hierheen getoer het.”
Hy weet wel dit gaan verander sodra hy op die veld stap. Die Wanderers in Johannesburg, die “Bullring”, is juis berug vir die ondersteuners wat Suid-Afrika se teenstanders al hul dae gee. Vra maar vir die Engelsman Ben Stokes, wat onlangs tot sy groot ontsteltenis met die popsanger Ed Sheeran vergelyk is deur ’n ondersteuner by die Wanderers.
“Daar gaan sonder twyfel ’n vyandige houding van die toeskouers wees; dis so op die beste van tye. Ek kom dit regtig nie agter nie, veral as ek kolf, dan blok ek dit alles uit.
“Dalk ’n bietjie as ek veldwerk doen, maar selfs dan beïnvloed dit my nie. Dis net woorde. As mense iets wil sê, goed so. As hulle niks sê nie, ook goed so.
“Ek sal in die buiteveld veldwerk doen. Ek sal glimlag en waai en saamspeel. Dit gaan pret wees.”
- Netwerk24
“Ek het vlugtig gedink toe ek laas by hierdie hotel weg is, was dit nie mooi (tonele) nie. Dit was nie die beste tyd in my lewe nie. Maar ek het aanbeweeg,” het Smith, een van die beste kolwers in wêreldkrieket, gister by die Wanderers in Johannesburg gesê.
Maart 2018 was inderdaad nie die beste tyd in die voormalige Aussie-kaptein se lewe nie. Hy is saam met David Warner en Cameron Bancroft in skaamte huis toe gestuur weens die balpeutery-skandaal in die derde toets van daardie reeks teen Suid-Afrika in Kaapstad.
Smith en Warner het albei ’n skorsing van ’n jaar uitgedien, Bancroft een van nege maande. Eersgenoemde twee is nou vir die eerste keer terug in Suid-Afrika vir ’n reeks van drie T20-wedstryde en drie eendagwedstryde. Die aksie begin Vrydagaand met ’n kitswedstryd in Johannesburg.
“Dit het nie goed geëindig toe ek laas hier was nie, maar ek het ook lekker herinneringe daaraan om in Suid-Afrika te speel, so dis lekker om terug te wees,” sê die 30-jarige Smith.
Sedert sy terugkeer het Smith goeie krieket by die 2019 Wêreldbeker-toernooi in Engeland gespeel en daarna bykans bomenslike kolfpeil in die reeks om die As getoon. Weg van die veld het hy ook gegroei.
“Ek het baie geleer in die laaste twee jaar. Ek het geleer om dit (die spel) nie te ernstig op te neem nie en om dit te geniet,” sê Smith.
Daar was ’n siening dat die balpeutery-skandaal die voortvloeisel van ’n Aussie-ingesteldheid van wen ten alle koste was. Sedertdien het ’n nuwe afrigter, Justin Langer, ingekom en die spankultuur verander.
Die Suid-Afrikaners met wie hy tot dusver te doen gehad het, het hom nog nie aan die skuurpapier-episode herinner nie.
“Oral waar ek was, was die mense baie vriendelik. Ons was (Dinsdag) by ’n skool, Pumla-skool, en dit was ’n ongelooflike ervaring. Dis ’n ongelooflike plek om heen te toer.
“Ons was ook by ’n paar restaurante waar mense baie gaaf was. Mense het my genader en foto’s geneem, so dit was maar net soos wat dit nog al die kere was wat ek hierheen getoer het.”
Hy weet wel dit gaan verander sodra hy op die veld stap. Die Wanderers in Johannesburg, die “Bullring”, is juis berug vir die ondersteuners wat Suid-Afrika se teenstanders al hul dae gee. Vra maar vir die Engelsman Ben Stokes, wat onlangs tot sy groot ontsteltenis met die popsanger Ed Sheeran vergelyk is deur ’n ondersteuner by die Wanderers.
“Daar gaan sonder twyfel ’n vyandige houding van die toeskouers wees; dis so op die beste van tye. Ek kom dit regtig nie agter nie, veral as ek kolf, dan blok ek dit alles uit.
“Dalk ’n bietjie as ek veldwerk doen, maar selfs dan beïnvloed dit my nie. Dis net woorde. As mense iets wil sê, goed so. As hulle niks sê nie, ook goed so.
“Ek sal in die buiteveld veldwerk doen. Ek sal glimlag en waai en saamspeel. Dit gaan pret wees.”
- Netwerk24
Kommentaar
Republikein
Geen kommentaar is op hierdie artikel gelaat nie