Stemme vir die jeug

Justicia Shipena “Julle is reeds leiers, want julle is deel van die generasie van Swede se Greta Thunberg, Suid-Afrika se Zuleika Patel en Nigerië se Elizabeth Williams.” So het mnr. Edward Ndopu die Namibiese kinderparlement beskryf wat laas week sy vyfde sitting gehou het. Ndopu is die Verenigde Nasies (VN) se welwillendheidsambassadeur vir Volhoubare Ontwikkelingsdoelwitte (SDG's), asook 'n aktivis vir mense met gestremdhede soos hyself. Hy is die jongste en enigste lid met gestremdhede wat deel is van die sekretaris-generaal se Groep van 17. Dié groep bestaan uit vooraanstaande mense wat die 17 SDG's moet mobiliseer. Een van Ndopu se hoofdoelwitte is om kinders met gestremdhede te motiveer en oortuig dat hulle net soos hy groot sukses in die lewe kan behaal. Die Namibiese parlement het in samewerking met die VN se Kinderfonds (Unicef) die kinderparlementsitting in Windhoek aangebied waaraan 98 kinders, sewe uit elke landstreek, deelgeneem het. Dit is vanaf 16 tot 23 Augustus onder die tema 'Jongmense se betrokkenheid by die wetgewende proses' in Windhoek gehou. Een van die hoofpunte was toelae. Die jong parlementslede het gesê kinders met gestremdhede moet meer geld ontvang as ander, aangesien hulle meer fisieke uitdagings het. Die belangrikheid van toeganklikheid en gelyke behandeling van mense met gestremdhede, asook die jeug se betrokkenheid by die wetgewende proses is ook bespreek. “Ek leef met 'n ernstige gestremdheid. Iets wat ek nog altyd wou doen, is om die wêreld te wys dit is ondanks my toestand steeds moontlik om na afgeleë plekke te reis en bewustheid te skep oor uitdagings wat die weerloosste mense in ons samelewing in die gesig staar,” het Ndopu gesê.Volgens hom wag jongmense nie meer vir toestemming om te mag praat of leiding te neem nie. Hulle neem self die verantwoordelikheid en dring aan op regverdigheid en geregtigheid. MENSEREGTE, BASIESE DIENSTENdopu het parlementslede aangemoedig om kinders met gestremdhede tydens besluitneming in ag te neem sodat hul menseregte en toeganklikheid tot basiese dienste ook prioriteit sal geniet.“Indien hulle nie vrylik kan rondbeweeg nie, sal die lewensuitkyk van kinders en jongmense met gestremdhede altyd beperk word tot die gemeenskappe met beperkte hulpbronne waarin hulle leef.” Volgens me. Rachel Odede, die Unicef-verteenwoordiger, kon die kinderparlement nie op 'n beter tydstip plaasvind nie, aangesien dit op 20 November die 30ste herdenking van die aanvaarding van die VN se Algemene Vergadering se konvensie op kinderregte is.Odede het gesê die aantal jongmense sal in die komende dekades, veral in Afrika en Asië, toeneem en 'n groot rol in die ekonomiese, politieke en sosiale vorming van hul lande speel. “Jongmense van vandag leef in 'n wêreld met eindelose moontlikhede.” Mnr. Peter Katjavivi, die speaker van die Nasionale Vergadering, het prestasies van vorige kinderparlemente uitgelig. Dit sluit 98 nuwe mosies in wat ter tafel gelê is. “Die insette van die vierde sitting van die kinderparlement het ook gelei tot die insluiting van klousules oor die Nasionale Adviesraad vir Kinders en die wet op kindersorg en -beskerming,” het Katjavivi gesê.

Stemme vir die jeug

Kommentaar

Republikein 2026-09-18

Meld asseblief aan om kommentaar te lewer

Stemme vir die jeug

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.