STD's: Min vooruitgang

Henriette LamprechtDaagliks word meer as 'n miljoen nuwe gevalle van behandelbare seksueel oordraagbare (STD's) siektes onder mense tussen 15 en 49 jaar oud aangeteken. Volgens inligting wat deur die Wêreldgesondheidsorganisasie (WHO) vrygestel is, dui dit jaarliks op meer as 376 miljoen nuwe gevalle van onder meer sifilis en gonorree.“Ons sien wêreldwyd 'n gebrek aan vooruitgang om die verspreiding van seksueel oordraagbare infeksies te stop, wat rede tot kommer is,” sê die WHO se uitvoerende direkteur vir universele gesondheidsdekking, mnr. Peter Salama.“Dit is 'n wekroep vir 'n gesamentlike poging om te verseker elkeen kan oral toegang tot dienste hê wat nodig is om die verlammende siektes te voorkom en te behandel,” het hy gesê.Volgens navorsing deur die WHO is 127 miljoen nuwe gevalle van chlamydia, 87 miljoen van gonorree, 6,3 miljoen van sifilis en 156 miljoen van trichomoniasis onder mans en vroue tussen 15 en 49 jaar in 2016 aangeteken. Die studie deur die WHO waarsku STD's het wêreldwyd 'n diepgaande impak op volwassenes en kinders se gesondheid. Sou dit onbehandel bly, kan dit tot ernstige en chroniese gesondheidstoestande lei wat neurologiese en kardiovaskulêre siektes, onvrugbaarheid, ektopiese swangerskap, stilgeboortes en 'n toenemende risiko vir MIV insluit. Dit hou met beduidende vlakke van stigma en huishoudelike geweld verband. STILGEBOORTES ENBABASTERFTES IN 2016Sifilis alleen is die oorsaak van 'n beraamde 200 000 stilgeboortes en sterftes van pasgebore babas in 2016 en een van die grootste oorsake wêreldwyd van sterftes onder babas. Sedert die laaste gepubliseerde data in 2012 was daar volgens die WHO geen daadwerklike afname in die koers van nuwe of bestaande infeksies nie.Gemiddeld het ongeveer een uit 25 mense in die wêreld ten minste een van die vier STD's en volgens die jongste syfers het sommige verskeie infeksies terselfdertyd. STD's versprei oorwegend deur middel van onbeskermde seksuele kontak. Dit kan ook tydens swangerskap en geboorte, of in die geval van sifilis deur middel van kontak met besmette bloed of bloedprodukte en ook die gebruik van naalde in dwelmmisbruik versprei. Dit is egter voorkombaar deur middel van veilige seksuele praktyke wat voortgesette kondoomgebruik insluit.Die WHO maan tydige en bekostigbare toetsing en behandeling is noodsaaklik om wêreldwyd die las van STD's te verminder. Mense wat seksueel aktief is, moet ook aangemoedig word om vir die siektes getoets te word. Die organisasie stel voor swanger vroue moet vir beide sifilis en MIV getoets word. Die WHO beklemtoon alle bakteriële STD's kan behandel en genees word met medikasie wat wyd beskikbaar is.Onlangse tekorte in die wêreldwye lewering van penisillien het dit volgens die verslag moeiliker gemaak om sifilis te behandel. Ook is die toenemende antimikrobiese weerstand teen die behandeling van gonorree 'n groeiende bedreiging vir gesondheid en kan dit volgens die organisasie uiteindelik daartoe lei dat die siekte onmoontlik is om te behandel. Die WHO sê meer data is vir vroue as mans beskikbaar, terwyl die voorkoms van die siektes onder mans wêreldwyd skaars is.

STD's: Min vooruitgang

Kommentaar

Republikein 2025-12-11

Meld asseblief aan om kommentaar te lewer

STD's: Min vooruitgang

Kommentaar

Republikein 2025-12-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.