Star: ‘Kontrak met Braam bestaan nie’

Nellie Brand-Jonker - Braam van Huyssteen, stigter van Tekkie Town, sal in die hof moet toon daar bestaan ’n ooreenkoms wat hy beweer Steinhoff Africa Retail (Star) met hom vir ’n prestasiebetaling gesluit het.Jayendra Naidoo, voorsitter van Star, sê die maatskappy het nooit so ’n ooreenkoms met hom gesluit nie.’n Prestasiebetaling is ’n bepaling in ’n kontrak om die verkoper van ’n onderneming bykomende betalings te gee gegrond op die toekomstige prestasie van die onderneming wat verkoop word.Steinhoff het Tekkie Town in 2016 gekoop.Star het Maandagaand aangekondig hy het ’n dagvaarding van Tekkie Town vir ’n eis gekry vir die prestasiebetaling.’n Woordvoerder van Tekkie Town se voormalige eienaars het aan Netwerk24 gesê die prestasiebetaling sou oor ’n tydperk van drie jaar geskied en die eis kan sowat R1 miljard beloop as al die prestasiemaatstawwe bereik word.Van Huyssteen het tot onlangs by Star gewerk, maar het bedank. Hy het verlede week op radio aangevoer dit het onuithoudbaar geword by die maatskappy.Tekkie Town is in 2016 vir meer as R3 miljard gekoop van die private ekwiteitsgroep Actis en AJVH Beherend (’n maatskappy wat in daardie stadium deur Sport City Trust beheer is en wie se trustees Van Huyssteen, Bernard Mostert en Daniel Jacobus Pretorius was).AJVH is met Steinhoff-aandele betaal en hulle moes die aandele vir drie jaar hou. Actis is met kontant betaal. Steinhoff se aandeelregister toon AJVH hou 23,1 miljoen aandele.Die voormalige eienaars van Tekkie Town het reeds ’n eis teen Steinhoff gebring vir €120 miljoen (nagenoeg R1,7 miljard). Dit beteken die transaksie is ongeveer gedoen toe Steinhoff se aandeelprys R75 was. Dit sou die belang in Steinhoff toe soveel werd gemaak het. Dit is nou R25,4 miljoen werd.Naidoo sê “daar is geen kontrak met Braam vir ’n prestasiebetaling nie”.“Star het nooit so ’n ooreenkoms met hom gesluit nie. Ek glo nie daar bestaan so ’n kontrak nie. Dit sal nou van Braam afhang om met die bewyse daarvoor in die regsproses na vore te kom.”Of dit ’n ooreenkoms is wat Markus Jooste, voormalige uitvoerende hoof van Star, wat bekend is as ’n vriend van Van Huyssteen, dalk met hom gesluit het, het Naidoo gesê dit is ’n vraag wat hulle sal moet beantwoord.Van Huyssteen het verlede week by navraag of die prestasiebetaling ’n “mondelinge ooreenkoms met Markus was”, per teksboodskap laat weet: “Nee, dit was op skrif.”Jooste reageer nie op media-navrae nie.Warren Erfmann, woordvoerder namens Tekkie Town se vorige eienaars, het in ’n e-pos in Mei aan Netwerk24 gesê die ooreenkoms is met Steinhoff gesluit en later gewysig ná vergaderings en in korrespondensie tussen Van Huyssteen en Ben la Grange, voormalige uitvoerende hoof van Star.La Grange het met onmiddellike ingang bedank as uitvoerende hoof van Star op dieselfde dag as wat Jooste bedank het.Hy was van 2013 finansiële hoof van Steinhoff oor ’n tydperk waar reeds drie stelle jaarstate geraak word. Naidoo het gesê hy het simpatie met Van Huyssteen – soos hy met ander mense het wat geld met Steinhoff verloor het.“Ons erken hy is ’n entrepreneur. Ek het baie empatie met Braam en ander wat Steinhoff-aandele het en waarvan die waarde nou ’n piepklein deeltjie is van wat dit was. Baie mense het verliese gely in Suid-Afrika, insluitende hy. Ek kan verstaan dit is in belang van enigiemand wat verliese gely het om te probeer om dit te herwin.”Naidoo het gesê hy wil nie bespiegel oor wat Van Huyssteen se rede is vir die kommentaar wat hy oor Star se topbestuur en oor die maatskappy in die media gelewer het nie.“Star stel nie belang daarin om deur die media met hom te skakel nie,” het hy gesê.Volgens hom is die enigste kontrak wat Star met Van Huyssteen gehad het sy werkkontrak. “En hy het gekies om dit om sy eie redes te beëindig.” - Netwerk24

Star: ‘Kontrak met Braam bestaan nie’

Kommentaar

Republikein 2025-05-05

Meld asseblief aan om kommentaar te lewer

Star: ‘Kontrak met Braam bestaan nie’

Kommentaar

Republikein 2025-05-05

Meld asseblief aan om kommentaar te lewer

MELD AAN

Advertensie