Stakings bedreig Skorpion se toekoms

Augetto Graig en Ogone Tlhage - Die derde onderbreking in die Skorpion-sinkmyn se werkskedule in sewe maande het Vrydag ten einde geloop.Die myn se bestuur het Saterdag aangekondig die Basil Read-werknemers is weer op hul poste. Sowat 400 werknemers was by die staking betrokke, wat ’n impak op boor- en skietwerk, en laai- en sleepoperasies gehad het. Werknemers beweer onder meer die maatskappy buit betaling vir oortyddienslewering uit, bevorder sekere werkers onregverdig, en dat behuising en ander toelae beperk is tot werkers by die aanleg. Basil Read is die myn se besigheidsvennoot, wat vir Put 112 se uitbreiding verantwoordelik is, en dus ook vir die verlenging van die myn se werksaamhede. Sonder dié projek sou die myn in 2017 reeds gesluit het. Volgens mnr. Irvinne Simataa, die myn se hoofbestuurder, het Skorpion se bestuur reeds sy kommer oor onderbrekings in werksaamhede uitgespreek. “Die laaste staking het veroorsaak dat Skorpion-sinkmyn 14 dae agter skedule is, en ons verwag dit sal ’n algehele verlies van US$22 miljoen (N$317 miljoen) vir die myn tot gevolg hê. “Met die impak op huidige ertsvoorrade en die tyd wat nodig is om werksaamhede weer op dreef te kry, plaas dit groot stremming op die onderneming se volhoubaarheid, weens die naderende tydelike sluiting van die raffinadery as gevolg van ’n tekort aan materiaal om te verwerk,” sê hy.Simataa waarsku herstrukturering of die vroegtydige staking van mynbouaktiwiteite by Skorpion is moontlik. “Ons versoek alle werkers, of hulle vir Skorpion werk of vir ons besigheidsvennoot Basil Read, om gefokus te bly en hulself toe te wy aan die versekering van vinnige oplossings vir alle onopgeloste kwessies, sodat almal kan saamwerk om die Put 112-projek te voltooi, en die vroeë sluiting van Skorpion-sinkmyn kan keer,” sê hy.Simataa het ongelukkige werkers aangemoedig om griewe deur die Mynwerkersvakbond van Namibië (MUN) se bestaande kanale op te los en toekomstige werkonderbrekings te vermy. Die MUN se Suide-takvoorsitter, mnr. Shavuka Mbidhi, het vroeër gesê die vakbond het die staking nie aanbeveel nie. Volgens berigte het hy gesê: “Ons het vir hulle gesê dit is gevaarlik om onwettig te staak, en hulle oortuig om terug te keer werk toe, terwyl ons hul griewe oplos. As ’n vakbond keur ons nie onwettige stakings goed nie.”

Stakings bedreig Skorpion se toekoms

Kommentaar

Republikein 2025-06-18

Meld asseblief aan om kommentaar te lewer

Stakings bedreig Skorpion se toekoms

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie