Staking kos N$2 miljoen per dag

Catherine Sasman - Die ministerie van water, landbou en bosbou sê ’n staking by die Neckartaldam-projek kos die land meer as N$2 miljoen per dag.
’n Dag ná werkers aan die projek begin staak het, het die waarnemende permanente sekretaris van water, landbou en bosbou, me. Sophia Kasheeta, in ’n omsendbrief aan Salini Impregilo (die Italiaanse hoofkon­trakteur van die projek), Knight Piésold (die raadgewende ingenieursfirma) en werkers wat deur die Metaal- en Verwante Werkersunie (Manwu) verteenwoordig word, gevra dat die partye hul arbeidsgeskille moet uitklaar.
“Die regering kan nie, mag nie en sal nie toegee op die gehalte en die waarde van die geld van dié projek nie,” het Kasheeta oor die bykans N$3 miljard-projek gemaan.
Die Manwu-vakbondverteenwoordiger by die projek, mnr. Theophilus Frederick, het gister gesê die werkers sal voortgaan met die staking totdat die maatskappy bereid is om met die werkers rondom ’n tafel te sit.
Frederick het ook ontken dat dit ’n onwettige staking is, soos Salini aanvoer.
Hy het bygevoeg dat die maatskappy nog nie probeer het om besprekings met die werkers te voer nie.
Die sekretaris van Manwu se vakbondverteenwoordigers, me. Emmie Jansen, het egter gesê die Salini-bestuur is besig met onderhandelinge met die vakbond. Manwu het per brief op 20 Junie ’n vergadering met die Salini-bestuur aangevra.
Sy het gesê Salini het egter ’n vergadering wat vir gister om 12:00 tussen die werkers en die bestuur belê was, gekanselleer en gesê dit sal slegs met die werkers vergader as hulle teruggaan werk toe. Die werkers op hul beurt sê hulle sal nie teruggaan alvorens die bestuur met hulle vergader het nie.
Salini se woordvoerder, mnr. Gilles René Castonguay, het gister gesê hy het op die oomblik geen kommentaar te lewer nie.
Die sekretaris-generaal van die Nama Tradisionele Leiersvereniging, mnr. Lazarus Kairabeb, het gister ook ’n memorandum aan Salini oorhandig wat hy vroeër vandeesmaand aan die minister van water, landbou en bosbou, mnr. John Mutorwa, gestuur het.
Dié memo gaan oor klagte van Namibiese subkontrakteurs wat gekla het dat Salini nie kontrakte nakom nie.
Die subkontrakteurs het gekla dat Salini sy posisie as hoofkontrakteur misbruik by wyse van trae betalings, summiere opskorting van kontrakte en vertragings om behoorlike ­kontrakte op te stel.