Stadsvark, Padvark en Korrupsievark

DIRK VAN ZYL SKRYF:

Op 'n dag was daar drie varkies wat besluit het om die skool te verlaat en 'n lewe van hul eie begeerte te leef.

Hulle het vir hulle moeder gesê wat hulle besluit was. Die moeder was hartseer, sy het gekeer en gewaar­sku, maar hulle was beterwetend. (Hulle moeder is hulle eie gewete, wat nie kan lieg nie.)

Die drie het die geld wat hulle besit geneem en na die stad geloop. Elkeen met sy eie gedagtes oor die loopbaan in hul geestesoog.

Hulle was bekend as Ot, Otter en Otste. Hulle was altyd wederstrewig, en wou geen raad of leiding van ander aanvaar nie.



OT IN DIE BOTTEL

Eers het Ot 'n plek gesien wat sy hart gesteel het. Hy het besluit om daar te bly en sy lewe daar te maak, want die straat bestaan net uit drinkplekke en is vol vloekbekke, diewe, dronklappe, verkragters en moordenaars, so reg in sy “hok”.

Ot het gou 'n maat gekry wat hom gehelp het om 'n onwettige drinkplek te open. Gou was sy goedkoop drank bekend aan die drinkers, en die wynvlieë het saamgepak.

Ander plekke se klante het by hom aangesluit. Dit vloek, en vuil grappe word vertel. Daar word met messe en glasstukke gesteek. Maar almal beskerm hulle paradys.

Ot was gou bekend vir sy vuil karakter, en almal weet wie die tweebeenvark in die dorp is. Die mense het hom Stadsvark genoem. Alles in sy lewe was vuil, en waar hy kom, het hy alles en almal besmet met sy taalgebruik en optrede.

Sy huisie was van die begin af fondamentloos.

Die wolf het gekom, die geregs­dienaar wat nie hierdie gemors kan aanvaar nie, maar Stadsvark is deur sy maats gewaarsku en hy het na sy broer Otter gevlug. Stadsvark se huise is deur die wolf omgeblaas.



OTTER TEEN DIE WET

Otter het met sy geld 'n ou motor gekoop en begin om onwettig taxi te ry. Sy pryse was goedkoop, en baie het van sy dienste gebruik gemaak.

Hy het erger as die bestaande taxi's opgetree. Vir baie van die wetstoepassers het hy geen vrees gehad nie, want hy het 'n houvas op hulle gehad. Hy het hulle vervoer as hulle dronk was, die wet oortree het, gedrink was terwyl hulle diens moes doen, ens.

Hy was bekend aan baie kriminele, wat hom gebruik het om gesteelde goedere te vervoer, of hy het die diewe vervoer tydens hulle inbrake. Mense wat vir die gereg vlug het hy vervoer en saamgestem met die leuens wat vertel word.

Daar is nie 'n verkeersreël wat hy nie oortree het nie. Hy is deur die mense as Senior Padvark gedoop.

Die wolf het na hom gesoek om hom te elimineer, maar hy was ook gewaarsku deur sy trawante en het na Otste gevlug. Sy huisvesting is ook deur die wolf omgeblaas.



OTSTE VIR DIE WET

Otste het by die polisie gaan werk en het gou sy loopbaan gevestig deur die mag tot sy beskikking tot sy voordeel te gebruik. Hy het mense wat alleen is voorgekeer, hulle vals beskuldig en hulle laat verstaan dat sy woord bo hulle woord aanvaar sal word, aangesien hy 'n geregsdienaar is. Groot bedrae geld is aan hom betaal om nie 'n saak te open nie.

Soms het hy dwelms gebruik wat in bewaring was, en dit in voertuie geplant, ook in tasse, in klere se sakke, en die mense laat betaal om nie vervolg te word nie. Niemand kon 'n vinger na hom wys nie, want hy was slinks en skerp met die beplanning van hierdie vuil dade.

Die mense het hom die Korrupsievark genoem.

Die president het 'n skoonmaakveldtog begin en al wat vark is, is uitgehark en weggery om gerehabiliteer te word. Dié wat baie erg was, is na hokke met tralies en bewaarders geneem om daar te bly totdat hulle gereed is om gerehabiliteer te word.

So is die drie varke aan die wolf gegee wat hulle na die asgate geneem het om daar verbrand te word. “Ashes to ashes, dust to dust.”

Stadsvark, Senior Padvark en Korrupsievark is terug in hul moeder se sorg (hulle gewete) waar sy sonder ophou vir hulle sê: “Ek het julle gewaarsku, julle wou nie hoor nie, kyk waar sit julle nou, besig om hier op die asgate deur die vuur van julle eie gewete verteer te word, tot in ewigheid.