Stad se waterplan in perspektief

Die waterkrisis van 2016-2017 het tot 'n einde gekom

Op 1 Junie 2017 is die status van Windhoek se watertoestand tot in 2018 vanaf 'n krisis (kategorie E) na 'n waarskuwing verander om water steeds spaarsamig te gebruik. In die waterbestuursplan verteenwoordig dit kategorie B. Kategorie D en E is onderskeidelik droogte en ernstige droogte.

Kategorie B verwag van inwoners om vyf persent minder water te gebruik.

Hierdie hersiening was moontlik gemaak deur die beskikbare water in die hoofstad se driedam-voorsieningstelsel.

Die volledige, nuwe waterbestuursplan is op die Internet beskikbaar by die volgende skakel: http://www.windhoekcc.org.na/documents/f2c_drought_response_plan_-_2017.pdf.

Die dokument lê meer klem op die doeltreffende bestuur van waterverbruik en -aanvraag as 'n konsep wat oor die medium termyn 'n volhoubare oplossing verteenwoordig. Die konsep het aansienlike ekonomiese voordele.

Die munisipaliteit van Windhoek is bewus van die uitdagings verbonde aan volhoubare watervoorsiening, wat tans beperk is tot die bestuur van waterverbruik. Intensiewe prosesse is hiervoor ontwikkel.

Verbruikers sal daarby baat om die nuwe beleid volledig te bestudeer. Dit verskaf opnuut raad oor hoe om verbruik goed te bestuur. Die fokus val nie meer op die ontleding van jou waterrekening nie, maar om jou watermeter goed en doeltreffend te bestuur.

Hierdie belangrike verantwoordelikheid berus by verbruikers. Dit verminder die gevaar van waterverlies en verbeter waterbesparing.

Die nuwe waterbestuursplan hou bestaande tariewe vir huishoudelike waterverbruik van krag. Tydens watertekorte sal tariefblokke egter verklein. Dus sal die bestaande koste vir lewering van 30 kiloliter per maand tydens tekorte verlaag word na 20 kiloliter per maand. Terwyl die boetetarief tans by 40 kiloliter per maand in werking tree, sal dit dus reeds vanaf 30 kiloliter per maand geld.

Die bestuur van watertoevoer aan verbruikers wat water mors, sal meer doeltreffend toegepas word - met die oog daarop om die verbruiker te beskerm.

Dit is belangrik dat die verbod op die gebruik van tuinslange en die verpligting om swembaddens te bedek steeds van krag is.

WENKE VIR GOEIE WATERBESTUUR

• Implementeer 'n waterbestuursprogram by die huis en werk.

• Oorweeg om in waterbesparende tegnologie soos toilette, stortkoppe en ander huishoudelike toerusting te belê wat besparing tot gevolg het.

• Beplan 'n tuin wat min water nodig het en oorweeg slegs seisoenale plante wat meer water gebruik.

• Identifiseer waterlekkasies deur gereeld die waterverbruik te ontleed (weekliks).

• Installeer 'n reënwatertenk om die swembad vol te maak en die tuin nat te lei.

• Oorweeg prosesse om water te hergebruik waar moontlik.

Besighede behoort bestaande voorstelle vir waterbestuur so vroeg as moontlik te implementeer. Daar is 'n moontlikheid dat hierdie voorstelle 'n vereiste gaan word.

Alle verbruikers moet besparingsmetodes permanent deel van hul gedrag maak.

Die munisipaliteit sal stelselmatig riglyne ontwikkel, dit aan die publiek bekendstel en dit begin toepas sodat waterbestuur sal verbeter voordat 'n nuwe droogte die sentrale gebiede van die land tref.

'n Geïntegreerde benadering tot waterbestuur in samewerking met die gemeenskap is tot die voordeel van alle verbruikers.

* Bydrae verskaf deur die munisipaliteit van Windhoek se afdeling vir die bestuur van wateraanvraag. Lesers kan vrae oor waterbesparing aan Republikein stuur vir beantwoording deur die munisipaliteit.