'Stad se water uitstekend'

Elvira Hattingh - Die gehalte van altesaam 10 000 monsters van water uit verskillende dele van Windhoek word maandeliks, volgens hoë internasionale standaarde, deur die munisipaliteit se laboratorium vir wetenskaplike dienste getoets. Dit sluit in toetse vir chemikalieë, parasiete, virusse, stowwe wat met die werking van hormone in mense kan inmeng, asook mikrobiologiese organismes. Die water wat vanuit Windhoek se waterherwinningsaanlegte kom, ondergaan meer toetse as byvoorbeeld dié wat deur nasionale damme verskaf word. Daarom kan die munisipaliteit met sekerheid bevestig dat die stad se herwinde water van uitstekende gehalte is.Windhoek se munisipaliteit het gister 'n mediatoer van hul laboratorium by die Gammams-aanleg vir waterwerke aangebied om te demonstreer hoe die hoogste standaarde gehandhaaf word. Die laboratorium se hoofwetenskaplike, Kosmas Nikodemus, sê verskeie parameters word getoets omdat die water herwin word. Waar die plaaslike laboratorium nie die vermoë het om sekere toetse te doen nie, word monsters weggestuur. “Ons toets byvoorbeeld vir virusse deur monsters weekliks na die Universiteit van Pretoria te stuur. Dis die enigste instansie in Afrika wat daarvoor kan toets. Monsters word ook na 'n ander laboratorium in die buurland gestuur om vir gevaarlike parasiete te toets, soos byvoorbeeld dié wat in dieremis voorkom. “Ons toets vir stowwe wat die menslike hormoonstelsel kan ontwrig en stuur monsters hiervoor na 'n laboratorium in Frankryk,” het Nikodemus gesê.Oor die moontlike opbou van byvoorbeeld hormone in die water, het hy gesê die munisipaliteit slaag in die bekamping daarvan.“Ons metode van waterherwinning verlaag dié vlakke suksesvol. “By die herwinningsaanleg word sekere prosesse soos osonisering en suiwering deur korrel-geaktiveerde koolstof gevolg - wat dit heeltemal verwyder. Ons laboratoriumtoetse bewys dit.”Nikodemus het verder gesê die hormoonvlakke wat in NamWater se water voorkom, is onbeduidend.ISO-STANDAARDE GEHANDHAAFMe. Maria Ndafyaalako, 'n wetenskaplike wat by die laboratorium se afdeling vir gehaltebestuur betrokke is, sê daar word by die internasionale ISO/IEC 17025 gehou – 'n akkreditasiestelsel wat vir die meeste laboratoriums wêreldwyd geld om te verseker dat resultate geldig, konsekwent en akkuraat is. “Die handhawing van dié standaarde is vir ons baie belangrik, want Windhoek is die eerste stad ter wêreld wat drinkwater direk herwin. Daarom moet ons seker maak dat ons aanlegte reg funksioneer,” het sy gesê. Volgens Ndafyaalako word hul laboratorium vyfjaarliks deur Sadcas, die akkreditasieliggaam vir laboratoriums in Suider-Afrika, geëvalueer voor 'n nuwe akkreditasie-sertifikaat uitgereik word. Verder word hulle ook jaarliks besoek om seker te maak die voorskrifte word reg uitgevoer. Sy het gesê sodra die laboratorium resultate bekend maak, word 'n akkreditasiemerk daarop gedruk wat oral oor die wêreld erken word.

'Stad se water uitstekend'

Kommentaar

Republikein 2025-11-05

Meld asseblief aan om kommentaar te lewer

'Stad se water uitstekend'

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.