Staatspensioen staan op N$99,5 miljard

Augetto Graig - Die grootste pensioenfonds in Namibië, die staatsdienspensioenfonds (GIPF), was teen einde Maart N$99,5 miljard werd. Hulle hoop om vandeesmaand N$100 miljard te haal. Dít is Dinsdag by hul jaarlikse saamtrek vir belanghebbers aangekondig. Volgens mnr. Goms Menette, voorsitter van die GIPF-raad, ontwikkel die fonds steeds en is dit ’n gerespekteerde rolspeler in Namibië se ekonomie.Die fonds se hoofdoel is om pensioenvoordele aan staatsamptenare te verskaf.Weens die GIPF se gesonde finansiële posisie kan hy hom wel goed van hierdie taak kwyt.Ten spyte van die benarde wêreldekonomie kan die GIPF spog met ’n jaarlikse opbrengs van 5,84%, het Menette gesê.By dieselfde geleentheid het mnr. David Nuyoma, uitvoerende hoof van die GIPF, gesê die fonds het teen die einde van Maart uit sowat 136 000 lede bestaan, van wie meer as 100 000 aktiewe lede is en meer as 35 000 aktiewe voordeeltrekkers is. Vir die 2016-'17 finansiële jaar het die GIPF N$3,2 miljard se voordele uitbetaal, het Nuyoma gesê. In Maart vanjaar het die fonds reeds meer as 600 eise ter waarde van byna N$300 miljoen behartig.“Hierdie feite gee u ’n effense idee van hoe effektief die bestaan van die fonds is en hoeveel mense landwyd daardeur geraak word,” het hy gesê.Menette het ook die impak van die GIPF as plaaslike belegging in Namibië bespreek. Laas jaar is N$2 miljard beskikbaar gestel vir ’n tweede ronde ongenoteerde beleggings op die gebiede van waagkapitaal, skuldfondse, infrastruktuurfondse en algemene private ekwiteit vir plaaslike belegging, het hy gesê. Nog N$5,9 miljard is vir bates met die Bank van Namibië (BON) geruil om internasionale reserwes te versterk. Die GIPF het ook ’n interne tesourie gestig om deel van hul beleggings self te bestuur. Teen die einde van April vanjaar het die tesourie reeds N$10 miljard bestuur, waarvan N$8 miljard aan staatseffekte bestee is, het Menette gesê.Hy het bygevoeg die GIPF het laas jaar belowe om 30% van die Harambee-welvaartplan se gronddiensing, behuising en sanitasiedoelwitte ’n werklikheid te maak. Die fonds belê veral in die diens van erwe, die bou van huise en finansiering vir nuwe huiseienaars. Hiervoor is N$1 miljard deur First Capital beskikbaar gestel en versprei. Byna 200 lede het finansiering vir behuising gekry en nog 25 tot 30 lede kry maandeliks dié geleentheid. Volgens Menette is die doel is om First Capital uiteindelik in ’n wentelfonds te omskep.Hy sê die fonds het ook 2 142 erwe landwyd gekry om huise, meenthuise en woonstelle te bou vir die middel- tot lae inkomstemark. N$300 miljoen is aan die diens van grond bestee en tot dusver is 391 erwe gereed om verkoop te word teen ’n koste van N$120 000. Menette sê hulle doen als in hul vermoë om die koopbedrag te verminder. Tot dusver het die GIPF dit reggekry om 735 algemene- en enkelwooneenhede te bou. Onlangs is nog 327 enkelwooneenhede gediens en die bou van nog 180 huise vir die lae-inkomstemark goedgekeur, het hy gesê.Die tema van die saamtrek was “Samewerking: die wenformule”.Die hooffokus was die fonds se toewyding aan verbeterde dienslewering. Volgens Menette het die raad doelbewus die GIPF-bestuur opdrag gegee om dienslewering te verbeter - veral wat vinniger uitbetalings betref. Hiervoor, sê Nuyoma, het die GIPF in kliënteverhoudingsbestuur-sagteware belê. Dit word reeds in Windhoek toegepas en gaan landwyd versprei word. Gister is die fonds se nuwe webwerf ook bekend gestel.Lede kan nou self toegang tot dienste geniet, sonder om die GIPF se kantore te besoek.

Staatspensioen staan op N$99,5 miljard

Kommentaar

Republikein 2025-12-08

Meld asseblief aan om kommentaar te lewer

Staatspensioen staan op N$99,5 miljard

Kommentaar

Republikein 2025-12-08

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.