Staatsgeriewe wag op Psemas-lede

Henriette LamprechtMeer as 20% van private diensverskaffers in die gesondheidsbedryf wat aan 'n landswye opname deelgeneem het, sê hulle gaan nié die nuwe kontrak met die staat se mediese fonds (Psemas) onderteken nie. Die kontrak tree Sondag in werking.Die uitgebreide opname onder private diensverskaffers is deur die Namibiese Private Praktisynsforum (NPPF) in samewerking met die Namibiese Vereniging vir Tandartse (NDA) en die Mediese Vereniging van Namibië (MAN) gedoen. In totaal het 308 respondente die opname voltooi, met 87% wat sê die Vereniging vir Namibiese Mediese Fondse (Namaf) se maatstaftariewe wat reeds die afgelope vyf jaar vir uitbetalings geld, is onvoldoende om 'n praktyk aan die gang te hou. Volgens 'n verklaring wat deur die NPPF uitgereik is, het 10% van dié diensverskaffers wat deel was van die opname reeds drie jaar terug gekies om nie 'n kontrak met Psemas te sluit nie. Dié persentasie het tot die huidige 17% gestyg wat nie by die staat se mediese fonds ingekontrakteer is nie, met 21% van die respondente wat aangedui het op 1 April gaan hulle nie die nuwe Psemas-kontrak onderteken nie. Teen volgende jaar beoog 25% om die kontrak by hulle te laat verbygaan. Van dié diensverskaffers wat tans wél kontrakte met Psemas het, het 29% van die respondente besluit om die afgelope drie jaar doelbewus hul dienste aan lede van die mediese fonds te verminder. Onvolhoubare maatstaftariewe wat deur Psemas uitbetaal word, tesame met die regering se onvermoë verlede jaar om eise van diensverskaffers vir etlike maande uit te betaal, en verskeie praktyke onder geweldige finansiële druk gelaat het, laat baie verskaffers wonder of dit nog enigsins die moeite werd is om 'n kontrak met die staat se mediese fonds te sluit. Volgens die verklaring kan die toenemende vereistes vir registrasie en eise, tesame met die nuutingestelde voortgesette belastingsertifikate en jaarlikse hernuwingsvereistes, tot 'n “beduidende afname in private diensverskaffers lei wat nog gewillig is om nog Psemas-pasiënte te bedien”.Die prentjie verdonker verder met die ondoeltreffendheid van regeringsagentskappe. Word die huidige maatstaftariewe nie in die nabye toekoms daadwerklik aangepas nie, waarsku die NPPF teen “'n beduidende afname in die beskikbaarheid van diensverskaffers vir Psemas-pasiënte” en in so 'n mate dat dié pasiënte by die staat se gesondheidstelsel vir behandeling sal moet aanklop. Om vir Psemas te registreer, moet diensverskaffers nou 'n magdom dokumente van onder meer die ministerie van gesondheid en maatskaplike dienste (MoHSS), die Raad vir Gesondheidsberoepe in Namibië (HPCNA), Namaf, die Namibiese Medisynebeheerraad (NMRC), die Ontvanger van Inkomste (RoR) en die Maatskaplike Voorsorgkommissie (SSC) verskaf. Byna 80% van die respondente het die registrasieproses as “lastig” beskryf. Met betrekking tot die doeltreffendheid van die verskillende agentskappe betrokke by die verkryging van vereiste dokumente, word die Medisynebeheerraad (NMRC) deur 38% van die respondente as “uiters ondoeltreffend” uitgesonder. Die NMRC word gevolg deur MoHSS (33%), Namaf (29%), RoR (29%) en die SSC (22%). Die HPCNA word deur die meeste respondente as die doeltreffendste beskou. Psemas het 'n ledetal van 293 250 lede waarvan sowat 124 000 hooflede en die res afhanklikes en pensioenarisse is. Dié ledetal en afhanklikheid betrek sowat 13,1% van die land se totale bevolking.

Staatsgeriewe wag op Psemas-lede

Kommentaar

Republikein 2026-06-26

Meld asseblief aan om kommentaar te lewer

Staatsgeriewe wag op Psemas-lede

Kommentaar

Republikein 2026-06-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.