SSC skuld miljoene in begrafnisvoordele

Henriette Lamprecht – Inligting dui daarop dat die Maatskaplike Voorsorgkommissie (SSC) waarskynlik miljoene Namibiese dollar skuld in uitstaande eise vir begrafnisse wat reeds afgehandel is. Van die eise dateer so ver terug as verlede jaar. Van die begrafnisondernemers met wie Republikein gepraat het, word tussen N$200 000 en N$400 000 geskuld. Die meeste doen tot tien begrafnisse per naweek en ’n gemiddeld van twee per dag. Die voordeel-eis vir begrafnisse wat uitbetaal word, is N$4 500.Een begrafnisondernemer sê sy is een van omtrent 80 in die land en die wanbetaling van eise beteken hulle kan nie hul werknemers betaal of voorraad aankoop nie.“Jy kan nie weier as iemand na jou toe kom vir ’n begrafnis nie; jy doen dit net,” het sy gesê.Volgens haar het Hollard vroeër die eise namens die SSC uitbetaal en was dit elke einde van die maand op datum. Sedert dit egter in April deur die ministerie van arbeid, nywerheidsbetrekkinge en werkskepping oorgeneem is, is dit ’n “opdraande stryd”.Nog ’n ondernemer het beklemtoon die uitstaande bedrag is “baie geld vir ’n klein besigheid”.“Watter besigheid kan dit oorleef? Sommige het twee Covid-begrafnisse per dag, maar jy het net soveel toerusting en personeel,” het sy gesê.Vyf begrafnisondernemers in die noorde van die land het reeds op 10 Junie ’n brief aan die uitvoerende direkteur van dié ministerie, mnr. Bro-Matthew Shinguadja, oor die kwessie gerig, maar tot op hede nog geen terugvoer ontvang nie.In die brief aan Shinguadja word onder meer gefokus op die laat betaling en verwerking van eise en met ’n versoek vir ’n ontmoeting met alle begrafnisondernemers in die land om die kwessie uit te klaar.Volgens die ondernemers vertraag die laat betaling en verwerking van eise hul produksieprosesse, kan werknemers se salarisse nie betyds betaal word nie en veroorsaak die gebrek aan fondse ’n gebrek aan hulpbronne. Dit plaas hulle gevolglik met ’n hoë skuldlas en nie in staat om hul verantwoordelikhede betyds as diensmaatskappye te voltooi wat op ’n kontantbasis werk nie.Die ondernemers sê buiten dat lank op eise gewag word om verwerk te word, is verskeie kere by navrae bevestig die “eise is weg of nooit ingedien nie”.Eisvorms van die SSC word ook nie betyds uitgestuur sodat dit vinniger voltooi en gouer teruggestuur kan word nie.Die begrafnisondernemers versoek die kommissie om gouer en meer doeltreffend eise te verwerk.“Alle ingediende eise vir die maand moet ook aan die einde van dieselfde maand betaal word,” lui die brief. Skriftelike navrae in dié verband aan mnr. Castro Tjizoo van die SSC wat reeds verlede week aan hom gerig is, is teen druktyd steeds onbeantwoord. – henriette@republikein.com.na

SSC skuld miljoene in begrafnisvoordele

Kommentaar

Republikein 2026-08-03

Meld asseblief aan om kommentaar te lewer

SSC skuld miljoene in begrafnisvoordele

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.