Spyt gaan dalk erger wees as spuit

WILLEM DE WET SKRYF:Vervies ek my die naweek waar ek midde in ’n debat sit waar die een span aan my linkerkant mekaar probeer oorreed dat dit die regte ding is om die Covid-spuit te vat om jouself en ander te beskerm, terwyl die span aan die regterkant mekaar vertel dat mense wat die spuit vat rooi stickers op hul voorkoppe moet dra, sodat die nie-spuiters hulle kan uitken en van hul kan wegbly, want die spuiters is van satan en bring die boodskap van die verdoeming.En die woordewisseling is nie vriendelik nie.Ek wonner so in die stilligheid waar ek uitgemis het, want dit voel my ek is een van die klasbankers wat tydens daardie belangrike mediese klasse op skool agter die busloods gesit en ossies bou het toe die lesse oor Covid behandel is. Almal om my klink asof hulle medies beter gekwalifiseerd is as ek en al die dokters wat ek ken en hulle praat almal asof hulle self met die geboorte van die virus by was en alles van die virus weet.Ek kan my verluister aan die oorgawe en oortuiging waarmee die selfgekwalifiseerde en professionele sosialemediaprofessors Facebook en Twitter en wat ookal nog aanhaal en dit verkondig asof die aanhalings uit mediese handboeke kom.Enige fabel, vir of teen die spuit, word as bewysde waarheid voorgehou en durf jy waag om dit te bevraagteken, kan dit lelik raak. Manne wat nie eers biologie in standerd 8 kon deurkom nie is nou kenners van mRNA en DNA en hulle sweer op hul woord dat hulle die uitslae van ’n spuitdood self onder oë gehad het en dit kan bevestig al ken hulle nie regtig die persoon wat gesterf het of die omstandighede nie.En so sweer die ander weer dat as dit nie vir die spuit was nie was helfte van hul familie al ses voet onder, want hul het ’n aangetasde vir dae in hul midde gehad.Dan praat ons nie eens van die samesweringskomplotspesialiste wat alles bevraagteken. Of dit nou vir of teen is, is irrelevant, en hulle luister sonder om vir jou te kyk, maak of hul nie belangstel nie, maar hul mis niks, en hulle praat sag as hulle praat en kyk oor hul skouers wie kan hoor. Sit konstant en vergelyk dit wat jy sê op die selfoon met die feite wat hy en sy komplotgroep met mekaar en hul mediese verifiëringsgroep gedeel het en wat as die werklike feite gesien word in hul aksiegroep.As ek nog een keer hoor van ’n slim groep se slim uitsprake gaan ek in my broek groep!Ou vriendskappe word verbreek en snedige aanmerkings en dreigemente raak persoonlik van aard; dit terwyl daar in SA en Namibië reeds meer as 60 000 mense beswyk het en miljoene wêreldwyd reeds voor die virus geval het.Mense, glo wat jy wil, maar moet nie ander veroordeel oor hulle glo wat hulle wil glo nie. Sê nou net jy word op die einde verkeerd bewys? Hoe maak jy reg en trek terug wat jy alles nou kwytraak?Tyd sal leer en niemand het nou klinkklare antwoorde vir die talle vrae wat in ons almal se koppe maal nie. Ons almal hoop maar vir die beste, so bedaar en sif tussen die hoorsê, valshede en feite in jou soeke na antwoorde om jouself in ’n posisie te plaas om ’n ingeligte, anonieme en besliste keuse te maak, sonder om ander in die proses te vervreem en te verwerp.As dit so aangaan, gaan ons nog baie alleen raak, en alleen wees is erger as doodgaan, het my pa altyd gesê. Alleen wees is elke dag en dit los jou nie vir ’n oomblik alleen nie. Ons is tropdiere.Of die spuit reg of verkeerd is, sal ons hopelik in die nabye toekoms weet en ek hoop almal van ons sal dan reg gekies het.Ek hoop vir elkeen wat die keuse moet maak se onthalwe dat sy keuse die regte keuse is en ek vra dat jy ander om jou ook die geleentheid sal gun om hul keuse te maak, sonder om hul te oordeel en veroordeel. As daar een regte antwoord was, was dit maklik, maar wie hier op aarde het daardie antwoord?Ek vra dat ons in vriendskap en menswees saam sal ween oor elkeen wat in die stryd omkom, ongeag wat hul keuse was. En saam sal juig as die virus verslaan is. Ons moet mekaar postvirus weer in die oë kyk, so kom ons respekteer mekaar in die keuses wat ons maak oor 'n pes waaroor geen mens op die stadium ’n kenner is nie.Ek het gekies en ek hoop ek het reg gekies.Sterkte en voorspoed met jou keuse.

Spyt gaan dalk erger wees as spuit

Kommentaar

Republikein 2025-12-17

Meld asseblief aan om kommentaar te lewer

Spyt gaan dalk erger wees as spuit

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.