Sprokiesbestemming: Duwisib-kasteel

Yochanaan Coetzee – Die Duwisib-kasteel is een van die talle wonders in die suide van die land. Tans ’n gedenkmonument en 'n “gastekasteel” van Namibia Wildlife Resorts (NWR), het dit eintlik ’n ietwat hartseer geskiedenis wat soos ’n tragiese sprokiesverhaal lees.Aan die rand van die Namib, sowat 70 km vanaf Maltahöhe, is ’n Duitse man en sy Amerikaanse eggenote se droom destyds vernietig deur die harde realiteit in ’n gewelddadige tydperk van die wêreldgeskiedenis.In 1904-’05, toe die inheemse Nama- en Herero-bevolking in die destydse Duitse Suidwes-Afrika in opstand teen koloniale magte gekom het, het al hoe meer Duitse vrywilligers na die kolonie gereis om by die Schutztruppe aan te sluit om die veldtog te ondersteun. Dit was in dié tydperk dat Hansheinrich von Wolf die Duwisib-gebied leer ken het. Nadat die opstand tot ’n bloedige einde gekom het, het hy met vakansie na sy geboorteland teruggekeer waar hy Jayta Humphreys (1881-1963), ’n ryk Amerikaner, ontmoet het. In 1907 is die paartjie in Dresden getroud en het baron en barones Von Wolf na Suidwes-Afrika teruggekeer om 'n uiters suksesvolle perdestoetery te bedryf en hulself hier tuis te maak.In 1908 het Von Wolf die bekende argitek Wilhelm Sander die opdrag gegee om 'n woning in die vorm van 'n kasteel by Duwisib op te rig. Sander was in daardie stadium by al drie Windhoek se kastele, Schwerinsburg, Heinitzburg en sy eie Sanderburg, betrokke.Dit was ’n besondere uitdaging om op Duwisib te bou, aangesien die plaas meer as 400 km suid van Windhoek en 300 km oos van die kus af geleë is. Nietemin is al die boumateriaal, behalwe die rooi sandsteen waarvan dit gebou is, met die nodige messelaars en meubels uit Duitsland, Italië, Swede en Ierland per skip en ossewaens ingevoer. In 1914 het Von Wolf en sy vrou per skip na Engeland gereis om 'n volbloedhings vir die stoet te koop. Maar toe breek die Eerste Wêreldoorlog uit en die paartjie moes noodgedwonge via Amerika na Europa reis.Ná hul aankoms in Duitsland het Von Wolf weer as vrywilliger by die Duitse weermag aangesluit en het hy op 4 September 1916 in ’n veldslag in Frankryk gesneuwel. Die paartjie het nie kinders gehad nie en Jayta het nooit weer na Suidwes-Afrika teruggekeer nie. Aangesien sy geen aanspraak op die kasteel en grond gemaak het nie, het die kasteel daarna verskeie kere van eienaar verwissel. Sedert 1979 is dit in staatsbesit en in 1991 is dit opgeknap. In 2000 is dit aan NWR oorgedra en is dit in 2014 weer opgeknap om aan gaste die ervaring te bied van hoe die Von Wolfs ’n eeu gelede daar sou geleef het. Op die oomblik is dit ’n museum en bied dit verblyfgeriewe. Met Suiderland se besoek is dit verstaanbaar hoekom ’n man vir sy geliefde vrou ’n kasteel in dié sprokiesland wou bou. Die rit na die kasteel is onvergeetlik en die pad van Bethanie af deur Helmeringshausen word só goed in stand gehou dat dit sommige teerpaaie van ons land se kop in skaamte kan laat sak.As jy gelukkig genoeg is om in daardie dele van die land te reis, besoek gerus die afgesonderde "koninkryk". Met sy unieke karakter en gevoel van tydloosheid, meen Suiderland dis die perfekte venue vir troues of om vir die familie 'n Namibiese kasteel te wys.Skakel 063 295 030 of besoek www.nwrnamibia.com vir meer inligting.

Sprokiesbestemming: Duwisib-kasteel

Kommentaar

Republikein 2025-07-18

Meld asseblief aan om kommentaar te lewer

Sprokiesbestemming: Duwisib-kasteel

Kommentaar

Republikein 2025-07-18

Meld asseblief aan om kommentaar te lewer

MELD AAN

Advertensie