Spogplaas van miljoene vir Namibiese weermag

Ronelle Rademeyer Die Namibiese weermag het vier maande gelede 'n spog- wildplaas naby Okahandja wat aan oudpres. Sam Nujoma se boesemvriend, mnr. Kurt Steinhausen, behoort het, vir N$45 miljoen gekoop.Die plaas Oropoko, met sy Olimpiese standaardskietbaan en luukse lodge, was in die mark vir N$69 miljoen, “maar ons het dit ná onderhandeling vir N$45 miljoen gekoop”, het maj. Peter Shilumbu, weermagwoordvoerder, gister by navraag bevestig.Die oordrag van die titelakte het op 25 September 2017 geskied. Dit is vier maande voordat die weermag vandeesmaand groot getalle soldate en ander personeellede met verpligte verlof huis toe gestuur het, aangesien daar nie geld is om vir hulle by weermagbasisse te sorg nie.Shilumbu sê die plaas is om verskeie redes 'n aanwins vir die weermag. Een daarvan is die talle wildspesies en die geleentheid wat dit die weermag bied om sy soldate te leer om “in harmonie met die natuur te leef” en om die wildlewe te beskerm sonder om dit vir die pot dood te maak.“Die prys mag hoog klink, maar die voordele wat die weermag uit Oropoko gaan kry, is na ons mening meer as wat die plaas gekos het,” sê Shilumbu.“Verder is die plaas strategies geleë, aangesien dit nie ver van Windhoek af is nie. Daar is 'n landingsblad vir helikopters en 'n vliegveld en die weermag wil dit in 'n militêre lughawe omskep.“Die plaas het ook 'n skietbaan wat volgens Olimpiese standaarde gebou is en wat gebruik sal word om soldate se skietvaardighede te vervolmaak.” Hy gaan voort om die plaas se lof te besing en sê dit beskik oor 'n konferensiesentrum, kombuise, akkommodasiegeriewe, 'n wassery en motorwerktuigkundige geriewe waar weermagvoertuie herstel kan word.“Om alles te kroon, het die plaas 'n goed ontwikkelde, onafhanklike waterinfrastruktuur en dit is ook nie vir elektrisiteit van die nasionale netwerk afhanklik nie.” Dít sal volgens Shilumbu help om koste te bespaar.Steinhausen (85) is van Nümbrecht in Duitsland en het hom in 1990 in Namibië gevestig.Dit is wyd bekend dat hy en Nujoma reeds jare lank goeie vriende is. Groot gewag is in 2003 daarvan gemaak toe Steinhausen N$100 000 geskenk het vir die fliek oor Nujoma se lewe, Where Others Wavered – 'n projek wat die land destyds N$50 miljoen gekos het. HUIS TOE GESTUURDie weermag het einde Januarie sy personeellede by sewe basisse in die land versoek om in Februarie verlof te neem en huis toe te gaan.Mnr. Calle Schlettwein, minister van finansies, het gister aan Republikein gesê dit is nie 'n ongewone stap nie en die weermag kan dit doen indien daar nie vir daardie personeel werk is nie.Hy sê die publiek het die regering versoek om te bespaar en nou dat die regering maatreëls soos hierdie en die verbod op buitelandse reise ingestel het, sê Namibiërs dit is omdat die regering bankrot is. “Dit is nie die geval nie,” het hy benadruk. Hy sê deur die soldate met verlof te stuur, word bespaar op uitgawes soos kos, water en elektrisiteit.Die weermag het in die 2017-'18-boekjaar N$5,6 miljard van die tesourie ontvang. Hiervan is N$442 miljoen vir ontwikkeling opsy gesit en N$263 is vir geklassifiseerde behoeftes begroot.Daar is nie in die begroting vir die aankoop van sulke eiendom voorsiening gemaak nie.

Spogplaas van miljoene vir Namibiese weermag

Kommentaar

Republikein 2026-05-05

Meld asseblief aan om kommentaar te lewer

Spogplaas van miljoene vir Namibiese weermag

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.