Spioenasiebaas en regering appelleer

Ronelle Rademeyer Namibië se spioenasiebaas en die regering het vandeesweek kennis gegee dat hulle in die hooggeregshof appèl gaan aanteken teen regter Harald Geier se hofuitspraak verlede week wat 'n stokkie gesteek het voor 'n muilband-interdik teen The Patriot.Geier het die aansoek teen hierdie weekblad van die hand gewys nadat hy bevind het die spioenasiediens en die regering kan nie agter wetgewing skuil en hulle op die reg op geheimhouding beroep in 'n poging om te keer dat vermeende korrupte optrede op die lappe kom nie. Dié wetgewing is die Wet op die Beskerming van Inligting van 1982 en die Namibië Sentrale Intelligensiedienswet van 1997.Die inligting wat die koerant in berigte wou openbaar, het te doen met vermeende onreëlmatighede in die koop van plase en ander eiendom vir oudspioene en hul families. Die eiendomstransaksies het die belastingbetaler nagenoeg N$65 miljoen gekos.Die Namibia Media Trust (NMT), onder voorsitterskap van Gwen Lister, het na afloop van die hoërhofuitspraak 'n beroep op die regering gedoen om hierdie wetgewing te herroep aangesien dit gebruik kan word om onwettige optrede en korrupsie te verbloem.Die direkteur-generaal van Namibië se Sentrale Intelligensiediens (NCIS), mnr. Philemon Malima, en die regering voer in hul kennisgewing aan daar is sewe gronde ingevolge waarvan hulle teen die uitspraak wil appelleer.GEHEIMHOUDINGEen daarvan is dat die appellante die betrokke wetgewing wat geheimhouding magtig, gebruik het om sogenaamde korrupte aktiwiteite te verdoesel. Hulle voer aan daar is geen feitelike grondslag vir hierdie bevinding nie.Verder sê hulle in die kennisgewing die hof het fouteer deur te bevind die nodigheid van 'n interdik is debatteerbaar, aangesien die inligting reeds in die openbare domein is.Volgens die appellante moes die hof die werklike geskil bepaal het en dit is die geregtelike interpretasie van die wetgewing waarop hulle hul beroep. Die appellante sê verder die hof moes bevind het hulle was op grond van die feite en ingevolge die wetgewing wel geregtig op die interdik, selfs al het die hof dit na goeddunke effens gewysig.Geier se uitspraak is verlede week wyd in mediakringe verwelkom, aangesien hy bevind het vryheid van spraak “is die hartklop van ons demokrasie”.NMT het in reaksie daarop benadruk die uitspraak was 'n duidelike bewys dat hierdie twee wette die demokratiese verbintenis tot vryheid van die media ondermyn.Die Redakteursforum van Namibië (EFN) het by monde van sy sekretaris-generaal, me. Alna Dall, gesê die uitspraak stuur 'n duidelike boodskap aan diegene wat die media wil muilband deur “nasionale sekuriteit” as rede voor te hou.Intussen het die leier van die People's Democratic Movement (PDM), mnr. McHenry Venaani, Dinsdag tydens 'n nuuskonferensie versoek dat die parlementêre staande komitee op verdediging en sekuriteit die sake van die Intelligensiediens ondersoek.Verder wil hy hê pres. Hage Geingob moet intree en verhoed dat Malima en die regering se appèl teen die hoërhof se bevinding voortgaan.

Spioenasiebaas en regering appelleer

Kommentaar

Republikein 2025-11-06

Meld asseblief aan om kommentaar te lewer

Spioenasiebaas en regering appelleer

Kommentaar

Republikein 2025-11-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.