Spensdeure klap oop oor kaas en kontreikos

Des Erasmus - Die bystand van deskundiges uit Suid-Afrika is ingeroep in die eerste stappe wat gedoen word om Namibië se kaasmakersbedryf te standaardiseer en om kontreikos en –drankies met en sonder alkohol te orden. Die geleentheid gaan 'n nasionale kaas- en kontreikosfees op 22 en 23 Junie op die plaas Zanja net buite Omaruru wees. Die genooide fynproewers uit Suid-Afrika is De Wet Viljoen en Joan Berning, 'n deskundige op die gebied van kaas.Uit plaaslike geledere sal die twee smulpape van oorkant die grens bygestaan word deur Elsabé Marais van Outjo, Dallas Orr van Swakopmund en David Thomas van Windhoek. Orr en Thomas is bekroonde sjefs. Van die kaas- en koskenners van Suid-Afrika kom van plekke so ver as Plettenbergbaai. “Ons is op soek na Namibië se beste kontreikosmakers,” sê die wakker vrou aan die spits van die organisasie, Tinkie Cornelissen.Volgens haar word na deskundige uitsprake gestreef, nie net goed soos “jou kaas is lekker” nie. Sy gee wel toe Namibië beskik oor 'n taamlike kontingent kaasmakers met produkte van goeie gehalte.Terselfdertyd is daar fantastiese tuisgemaakte produkte uit eie spense en koelkaste, goed soos kouevleis en gepreserveerde kos. Die fees vir die kaasmakers en die bereiders van kontreikos word deur dieselfde organiseerders as vir die kunstefees in Augustus aangebied. Volgens dié span is die doel van die fees om 'n verbond tussen kaasmakers, vleisbereiders, plaaslike markte, kleinhandelaars en die publiek te smee. Deelnemers sal wel teen mekaar kompeteer sodat die gehalte van die produkte bepaal kan word en wenke en inligting onder mekaar gedeel kan word.KATEGORIEËDie vyf kategorieë waarin meegeding gaan word, is suiwel (veral kaas), smeergeregte, fynproewers se vleisgeregte en seekos, gebak en drooggebakte produkte, alkoholiese en nie-alkoholiese dranke, en spenskos en gepreserveerde kos.Kontreikos sal handel oor produkte wat eiehandig gemaak word, klein voorrade met spesiale bestanddele, tradisionele geregte wat met liefde voorberei word en produkte wat met die hand verpak word.Massaproduksie sal nie beoordeel word nie. Dit moet handgemaak word en dit moet uit die tuiskombuis of uit die tuisomgewing kom. Klem sal op handgemaakte produkte val en beroepstoerusting sal nie in die maakproses toegelaat word nie. Deelnemers kan ook die streek en agtergrond verstrek wat as basis vir hul produkte gedien het. Beoordeling sal op 22 Junie afgehandel word met 23 Junie wat 'n ope dag gaan wees waar die publiek met die deelnemers kan skakel en sake kan doen. Beoordeling sal in vyf kategorieë gedoen word met veral die kaasmakers wat oor 'n wye veld gaan deelneem. Van die kaassoorte wat beoordeel gaan word, is mozarella, camembert, gorgonzola, limburger, gouda, cheddar en feta. In 'n tweede kategorie sal patees, vleissoorte en seekos beoordeel word, in 'n derde drooggebak soos beskuit, koekies en lekkers, in 'n vierde alkoholiese en nie-alkoholiese dranke en in die vyfde spenskos soos konfyte, blatjang en souse, en ingemaakte produkte. Cornelissen kan gekontak word by omaruruart@gmail.com of 081 236 2951.

Spensdeure klap oop oor kaas en kontreikos

Kommentaar

Republikein 2025-05-01

Meld asseblief aan om kommentaar te lewer

Spensdeure klap oop oor kaas en kontreikos

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie