Spencer al byna ’n jaar vermis

Jana-Mari Smith – Tien maande nadat die tóé driejarige Spencer Mandela Nakale skielik op Lüderitz vermis geraak het, sê die polisie is daar nog geen spoor van die seun of besonderhede van die omstandighede rondom sy verdwyning nie. “Die ondersoek is steeds aan die gang, maar daar is geen leidrade wat kan help om die seun te vind nie,” het adj.komm. Chrispin Mubebo, die koördineerder van misdaadondersoeke in die ||Kharasstreek, vandeesweek gesê. Spencer het op 28 Desember verlede jaar spoorloos verdwyn vanaf sy tannie se huis in Area 7 op Lüderitz, terwyl hy saam met ander kinders gespeel het. Sy vierde verjaardag was in Februarie vanjaar. Volgens Mubebo het die polisie ‘n deeglike ondersoek gedoen, ondanks die gebrek aan resultate of vordering om die seun te vind. As deel van die ondersoek, het die polisie onderhoude met bure en vriende gevoer, passasiersrekords by Lüderitz se hawe en lughawe gefynkam en na Interpol uitgereik.“Niks hiervan het enige resultate opgelewer nie,” het hy gesê. Mubebo het gesê die gebrek aan enige bewyse rondom Spencer se verdwyning is “verpletterend, nie net vir die ouers nie, maar selfs vir ons. Om ’n kind te verloor, is nie maklik nie. Ons doen voorts ’n dringende beroep op die publiek om enige inligting te deel – selfs al voel dit vir hulle onbelangrik – om ons te help om hom te vind.” Hy het die publiek ook herinner aan die beloning van N$50 000 wat steeds in plek is vir enige inligting wat kan help om vir Mandela op te spoor. SOMBERTerwyl die eenjaarherdenking van hul seun se onverklaarbare en hartseer verdwyning nader kom, klou Spencer se pa, mnr. Nelson Nakale, steeds vas aan die hoop dat hy huis toe sal kom.“Ek het steeds hoop dat ek hom eendag weer sal sien. Ek wil hom sien en hom vasdruk. Hierdie kan nie aangaan nie,” het hy gesê. Nakale voel om vir Spencer op te spoor behoort ‘n prioriteit te wees – nie net vir die polisie en die familie nie, maar vir die Namibiese gemeenskap as geheel.“Ons moet hom vind. ‘n Kind behoort nie net aan ‘n ouer, ‘n vader en ‘n ma nie, maar ook aan die gemeenskap. Spencer is my seuntjie, maar hy is ook ‘n Namibiër. Ons moet ons mense, ons kinders beskerm.”Afgesien van die hoop, erken albei ouers die tragedie wat 10 maande gelede ontvou het, het diep letsels op hul lewens gelaat.VERANDER“Hierdie is die ergste ding wat al in my lewe gebeur het. Ek was iemand met baie hoop. Ek was opgewonde oor die lewe, maar sedert Desember het alles net verander. Ek weet nie eers meer wat die doel van die lewe is nie. Die afgelope maande voel ek leeg aan die binnekant,” het Spencer se ma, me. Julia Ndafyaalako, gesê.“Ek is net vol woede, pyn, hartseer en spyt. Ek probeer om elke dag te leef soos dit kom, en ek probeer om nie te dink aan wat môre gaan gebeur nie.”Nakale het gesê hy probeer sterk bly sodat hy gereed kan wees wanneer Spencer gevind word. “Sedert daardie dag is ek nie meer die persoon wat ek was nie, maar ek moet sterk wees, sodat ek kan veg om my seuntjie weer te sien.”Vir wanneer baie Namibiërs oor twee maande Kersfees saam met vriende en familie vier, het Nakale net een wens. “Ek wens vir die geskenk om hom weer te sien, dit is al waarvoor ek wens. Om hom te sien en hom te omhels.”Ndafyaalako sê sy is angstig oor die eerste herdenking van haar seun se verdwyning. “Ek hoop net ek oorleef die volgende twee maande.”‘HELP ONS’Albei ouers doen ‘n beroep op die polisie, die publiek en spesialiste om hulle te help in hul voortdurende pogings om hul seun te vind en om nuwe invalshoeke vir die ondersoek te vind.Hulle vra enigiemand wat enige inligting oor die dag van sy verdwyning het – hoe onbenullig dit ook al mag lyk – dit met hulle of die polisie deel.Bokse waarin anonieme wenke gelaat kan word, is by winkels op Lüderitz beskikbaar, waar die publiek enige inligting kan deel wat kan help om Spencer op te spoor. “Jy weet nooit, die inligting kan ons help om hom te vind,” het Nakale gesê.Hulle doen ook ‘n dringende beroep op enige private speurders wat bereid is om te help, om na Lüderitz te kom en die aanvanklike ondersoek se stappe weer na te gaan om te kyk of enige nuwe bewyse gevind kan word.Ndafyaalako hoop ‘n nuwe ondersoek, waaronder van hawe- en lughawerekords, kan moontlik Spencer se bewegings van daardie dag vasstel.Beide het lede van die publiek en ander organisasies geloof wat aangehou het om Spencer se foto's en inligting te versprei om te help om die soektog aan die gang te hou.Nietemin sê hulle terwyl die polisie aanvanklik gehelp het, word hulle nie op hoogte gehou van die huidige ondersoek nie, en is hulle nie seker of daar voortgesette pogings was om vir Spencer op te spoor nie. Kontaknommers: Nelson Nakale: 081 219 3691Julia Ndafyaalako: 081 695 4974Adj.komm. Chrispin Mubebo: 081 268 88888 – republikein@republikein.com.naFOTO’s VerskafSpencer se ouers, Julia en Nelson, het nog hoop dat hulle geliefde seun teruggevind sal word.

Spencer al byna ’n jaar vermis

Kommentaar

Republikein 2025-12-26

Meld asseblief aan om kommentaar te lewer

Spencer al byna ’n jaar vermis

Kommentaar

Republikein 2025-12-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.