Spanje se krisis verdiep

Spanje het Saterdag drastiese stappe geneem om Katalonië te verhinder om weg te breek. Planne is aangekondig om die separatistiese regering te verwyder en nuwe verkiesings te hou. Katalonië se leier het hierdie optrede van Madrid met die bewind van die diktator Francisco Franco vergelyk.Katalonië se president, Carles Puigdemont, en sy ministers, wat Spanje in die ergste politieke krisis in dekades gedompel het deur ‘n verbode onafhanklikheidsreferendum te hou, sal hul werk verloor en die posisies sal deur die regering van eerste minister Mariano Rajoy oorgeneem word.Nadat honderdduisende betogers Saterdag die strate van Madrid ingevaar het om hul teenkanting teen Madrid te toon, het Puigdemont gesê Rajoy is skuldig aan die “ergste aanval op die instansies en mense van Katalonië” sedert Franco. Hy het gevra die Katalaanse parlement moet as ‘n saak van dringendheid vergader.Franco het Spanje van 1939 tot 1975 met ‘n ystervuis geregeer en onder meer onderdrukkende maatreëls ingestel waarvolgens Katalonië se magte weggeneem is en die amptelike gebruik van die Katalaanse taal verbied is.Puigdemont was versigtig en het nie een keer die woord “onafhanklikheid” gebruik nie, met Spanje en die res van Europa wat wag om te sien of hy sy dreigemente sal uitvoer om ‘n wegbreekstaat af te kondig.Madrid kan regstreekse beheer oor Katalonië se polisiemag oorneem en staatsmediahoofde vervang, met Rajoy wat sê hy het geen ander keuse gehad in die lig van die ernstige bedreiging vir Spaanse eenheid nie.Verkiesings in die semi-outonome streek moet binne ses maande gehou word.Die maatreëls moet nou deur die Spaanse senaat aanvaar word, ‘n proses wat ongeveer ‘n week sal neem. Rajoy se konserwatiewe Gewilde Party (PP) het ‘n meerderheid in die senaat en sy pogings om die wegbreekaksie te verhoed, geniet ander groot partye se ondersteuning.Katalonië is die tuiste van 7,5 miljoen mense. Die welaf Katalaners is vurige verdedigers van hul taal en kultuur en het voorheen beheer oor polisiëring, onderwys en gesondheidsorg gehad. – Nampa/AFP

Spanje se krisis verdiep

Kommentaar

Republikein 2025-08-05

Meld asseblief aan om kommentaar te lewer

Spanje se krisis verdiep

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie