Sowat N$300 miljoen vir Kaza

Ronelle Rademeyer - Die ekologiese en sosioëkonomiese ontwikkeling van die wêreld se grootste oorgrensbewaringsgebied, die Kavango-Zambezi (Kaza), het 'n reusehupstoot gekry danksy 'n skenking van meer as N$300 miljoen van die Nederlandse Poskode Lotto.Die Dream Fund-skenking is verlede week tydens 'n glansdinee in Amsterdam, Nederland, aan die World Wide Fund for Nature (WWF Nature), Peace Parks Foundation en African Parks oorhandig. Dié drie nieregeringsorganisasies vir bewaring het kragte saamgesnoer om die vyf Kaza-lande by te staan. Dit sluit in die bewaring van 'n beduidende deel van die wêreld se wildlewebevolking om die moontlike impak van klimaatsverandering teen te werk, om hulpbronne oor grense volhoubaar te benut en om na die welsyn van die plaaslike gemeenskappe om te sien, lui 'n verklaring deur Kaza se sekretariaat.Dié oorgrensbewaringsgebied sluit Namibië, Botswana, Zimbabwe, Zambië en Angola in, en nagenoeg 2,5 miljoen mense woon in die gebied. Dit is in die hartjie van die Kavango- en Zambezirivier se komme geleë. Dié tamaai oorgrensekostelsel is die grootte van Frankryk en huisves omtrent die helfte van Afrika se olifante, 25% van die wildehonde, 20% van die vasteland se leeubevolking en omtrent 15% van die wêreld se jagluiperdbevolking.Om na die bewaringsbehoeftes om te sien, word skenkers en vennote betrek. Die Dream Fund-projek word deur die Duitse ministerie vir ekonomiese samewerking ondersteun.Dr. Nyambe Nyambe, uitvoerende direkteur van die Kaza-sekretariaat, sê dié gebied het tot stand gekom in die gees van samewerking en danksy vennootskappe. Hy het namens die sekretariaat sy dank betuig aan die mense wat die Nederlandse Poskode Lotto speel.Hy sê WWF Nature, Peace Parks en African Parks sal ten nouste met die sekretariaat saamwerk om veilige tuistes vir wildlewe te skep, deurgangsroetes langs ekologiese korridors te vestig en seker te maak die riviere en hul opvangsgebiede word skoon en gesond gehou ter wille van die voorsiening van vars water aan landbou en ander aktiwiteite in die gebied.– ronelle@republikein.com.na

Sowat N$300 miljoen vir Kaza

Kommentaar

Republikein 2025-11-05

Meld asseblief aan om kommentaar te lewer

Sowat N$300 miljoen vir Kaza

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.