Sowat 20 000 onwettige dobbelmasjiene in die land

Estelle de Bruyn - Namibië het te veel dobbelmasjiene. Hierbenewens is die meeste dobbelaars in Namibië plaaslik en afkomstig uit lae-inkomstegroepe. Toeriste wat die land besoek, stel grootliks in die natuurskoon en kulturele aktiwiteite belang en is nie hier om te dobbel nie.Dít volgens die Damaseb- presidensiële kommissie van ondersoek van 1997. Nou, ná 21 jaar, word uiteindelik op hierdie bevindinge ag geslaan in die oorweging van nuwe wetgewing.Dít blyk uit mnr. Pohamba Shifeta, die minister van die omgewing en toerisme, se motivering van die wetsontwerp op die beheer van dobbelary en vermaak in die Nasionale Vergadering (NV).Dié wetsontwerp vervang die Ordonnansie op die Lisensiëring van Totalisators van 1938 en die Wet op Kasino's en Dobbelhuise van 1994.bedreig openbare gesondheid Volgens Shifeta is die nuwe wetgewing noodsaaklik vanweë groot tekortkominge wat in die verslag van die Damaseb-kommissie in bestaande wetgewing geïdentifiseer is, asook vanweë die globalisering van moderne ekonomieë en nuwe tegnologie in die dobbelbedryf.Ander bevindinge van die kommissie was dat al word sporadiese dobbelary nie as problematies beskou nie, dit onderhewig is aan komplekse faktore soos persoonlikhede en die maatskaplike omgewing. Enige dobbelary het die potensiaal om verslawend en patologies te word, wat dit 'n probleem vir openbare gesondheid maak.Boonop word bestaande wetgewing nie behoorlik gemonitor en afgedwing nie.Van die aanbevelings was 'n onmiddellike moratorium op die uitreiking van nuwe lisensies vir dobbelhuise, die beskerming van dobbelaars en die gemeenskap, streng vereistes vir kwalifisering vir dobbellisensies, deursigtigheid, integriteit en doeltreffende wetstoepassing in die bedryf, asook die afdwingbaarheid van dobbelskuld.maatreëls verander niks Shifeta sê die nuwe wetsontwerp is daarop gemik om dobbelaktiwiteite in Namibië te reguleer, beginsels vir dobbel en dobbelaktiwiteite daar te stel, die dobbelaar en die gemeenskap te beskerm, inkomstegenerering en -invordering te verseker, asook om 'n raad op dobbelary en 'n dobbelary-trustfonds op die been te bring.Hy sê die wet op kasino's en dobbelhuise is in 1996 gewysig om 'n einde te maak aan dobbelhuise wat soos paddastoele opgeskiet het. 'n Moratorium is op die toekenning van lisensies vir dobbelhuise geplaas wat ook die tydelike opskorting van dobbellisensies behels het.Ondanks hierdie maatreëls het die situasie nie verander nie, omdat die wet ook ander tekortkominge het.Volgens Shifeta is daar tans 260 lisensiehouers, ses vir kasino's en 264 vir dobbelhuise, en altesaam 2 845 geregistreerde dobbelmasjiene waaruit die staat ongeveer N$22 miljoen per jaar ontvang. Tog is daar 'n geskatte 1 600 ongelisensieerde en onwettige dobbelhuise en ongeveer 20 000 onwettige dobbelmasjiene landswyd.Hy sê die wetsontwerp maak voorsiening vir streng beheermaatreëls om die bedryf te reguleer.Ingevolge daarvan sal die minister die reg hê om standaarde vir die bedryf van 'n sentrale moniteringstelsel voor te skryf, om data te ontleed wat deur die stelsel ingesamel word, en om seker te maak 'n elektroniese moniteringstelsel word aan dobbelmasjiene gekoppel.Die minister van finansies, mnr. Calle Schlettwein, het kapsie gemaak teen 'n klousule in die wetsontwerp wat voorsiening maak dat wengeld uit dobbelary van belasting onthef word. Die debat duur voort.

Sowat 20 000 onwettige dobbelmasjiene in die land

Kommentaar

Republikein 2026-03-10

Meld asseblief aan om kommentaar te lewer

Sowat 20 000 onwettige dobbelmasjiene in die land

Kommentaar

Republikein 2026-03-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.