Sokkies met 'n kleurvolle skop

Tanja Bause – “Ons het nog nooit 'n lening aangegaan nie en het met ons eie geld begin. Ons het nog altyd gedink dit is beter om ons eie geld te gebruik en met ons eie geld foute te maak. Ons hoofdoelwit was altyd om bietjies-bietjies te groei,” sê Pinehas Shikulo, wat in die kreatiewe mode-, kuns- en musiekbedryf as Zulu Boy bekendstaan.Zulu Boy (29) is die man agter die Gweri Vintage Collection, waarvan Gweri Socks deel vorm.“My verlede is baie eenvoudig. Ek is in Windhoek gebore en het in die Noorde my hoërskoolloopbaan voltooi, waarna ek my diploma in visuele kunste by die Universiteit van Namibië (Unam) klaargemaak het.”Hy was die afgelope tien jaar in die musiekgroep Ama-Daz-Floor. Die groep het in 2016 die beste Soukous/Kwasa-toekenning by die jaarlikse Namibiese Musiektoekennings (NAMA's) gewen.Zulu Boy en die ander drie groeplede het reeds vyf albums vrygestel.“Ons het saam die 'vintage look' in die groep begin. Ons het 'n identiteit gesoek wat dit maklik vir mense sou maak om ons te onthou. Die vintage gee ons ons unieke voorkoms.”Ná tien jaar in die musiekbedryf het Zulu Boy op mode begin konsentreer en in 2018 by die Kasi Vibe-fees uitgestal. Dit is hier waar hy sy besigheidsvennoot, Carlos, ontmoet het en hulle begin het om idees uit te ruil.“Ek het die Gweri Vintage-stalletjie gehad. Gweri beteken iemand wat nie cool is nie, wat nie gewild is nie. Iemand wat nie met die cool mense geassosieer word nie. “Die stalletjie was 'n platform vir my om mense te verenig. By die huis is ons almal as een behandel, of jy nou deel van my familie was of nie; almal is gelyk behandel.”“Ek is gek oor kleurvolle sokkies. Ons het met die idee begin speel om ons eie sokkies te maak; Namibiese sokkies wat eendag internasionaal bekend sou wees. Sokkies wat jy byvoorbeeld in Amerika kan dra en iemand sien hulle raak jy 'n geselsie kan aanknoop. 'n Beginpunt wat jou 'n kans gee om oor ons land te praat en ons stories te vertel, want elke sokkie het sy eie storie,” het hy gesê.Die eerste jaar het hulle 200 paar sokkies laat maak en binne twee dae uitverkoop.“Ek het die sokkies ontwerp. Die heel eerste was die Odelela. Dit is die tradisionele Oshiwambo-patroon en -kleur. Die idee was dat ek 'n Oshiwambo-seun is wat buite die boks dink. Daarna het die Namibiese vlag gevolg om almal te verenig. Intussen is daar sowat 50 verskillende ontwerpe.”“Ons het sokkies met die land se verskillende kulture, diere en landskappe, asook sokkies met Namibië se helde en kleurvolle patrone op.”Zulu Boy sê hulle het geen idee gehad waar om te begin nie.“Niemand in Namibië maak sokkies nie! Ons moes na mense buite die landsgrense gaan soek. Ons het ons eie geld gevat en besluit om dit te doen. Tot vandag toe kyk ek nie terug nie.”Intussen het die Gweri Vintage Collection uitgebrei. Onder dié handelsnaam word nou ook skoene verkoop wat hier ontwerp en in Italië gemaak word. Gweri het ook 'n vennootskap met die hoedmaker Simon and Mary van Suid-Afrika gesluit.“Ons wil 'n eksklusiewe handelsmerk word; een wat mense die versekering van goeie gehalte gee. Ons einddoel is om 'n winkel te wees waar jy kan instap en wanneer jy uitstap, is jy van kop tot tone in vintage-klere geklee.”VENNOOTSKAPPEZulu Boy en sy vriende het uitgereik na inwoners in die informele nedersettings in en rondom Windhoek net nadat die Covid-19-pandemie uitgebreek het.“Ons het seep en water uitgedeel en noodsaaklike inligting versprei. Ons wou net die mense van Covid-19 en die gevare bewus maak. Ons het skenkings gekry en ons eie geld gebruik. Standard Bank het dit op sosiale media gesien en my genader om saam met hulle aan die Buy-a-Brick-veldtog te werk.“Hul veldtog stel mense wat in sinkhuise woon in staat om beter behuising te kry. Ek het onmiddellik belang gestel, omdat ek weet hoe dit voel om nie 'n dak oor jou kop te hê nie. Ek gee vir die mense om en wil help, dus het ons die Buy-a-Brick Footprints-veldtog begin. Vir elke paar sokkies wat verkoop word, gaan 'n gedeelte aan Buy-a-Brick. “Verlede jaar het ons amper N$500 000 ingesamel. Die sokkies, wat ook kindersokkies insluit, kan by Standard Bank-takke oraloor die land gekoop word,” sê Zulu Boy.Meer as 60 000 sokkies is tot dusver deur die Buy-a-Brick Footprints-veldtog verkoop. “Baie mense het 'n paar sokkies gekoop en nog 'n paar aan 'n kind in 'n nedersetting geskenk wat ons uitgedeel het. Op dié manier het die persoon nie net tot die Buy-a-Brick-veldtog bygedra nie, maar hulle het ook 'n minderbevoorregte kind in die land 'n paar warm sokkies gegee. “So kan ons almal 'n klein verskil maak.”Gondwana Collection Namibia het hom genader om 'n hele reeks spesifiek vir hulle te ontwerp wat by hul lodges landswyd beskikbaar is.Gweri Socks kan ook by Nictus-takke landswyd gekoop word. “Hulle is ons amptelike winkel totdat ons een dag ons eie winkel het.”BEGIN DADELIK“As ek raad vir mense daar buite kan gee, maak nie saak hoe oud hulle is nie, is dit nou tyd om te begin. Begin nou om jou idees te implementeer. “Geen idee is te klein of onbenullig nie. Om 'n lening aan te gaan, is nie 'n opsie nie. Begin liewer klein en begin met jou eie geld. As jy dìt doen en later 'n belegger benodig, kan hulle sien wat jy al gedoen het. Ek kan nie net my geld vir jou gee nie, maar as jy vir my kan wys wat jy al op jou eie gedoen het, is dit 'n ander storie. Glo altyd in jouself,” het Zulu Boy gesê.Sedert 2019 en die amptelike begin van Gweri Socks het hulle reeds meer as 100 000 paar sokkies verkoop. “Ons het as 'n besigheid gegroei met die bietjie wat ons aan die begin gemaak het. Ons bietjie het gegroei tot waar ons nou is.“In die toekoms wil ons 'n sokkiefabriek in Namibië begin. Ons doel is om alles hier in ons eie land te produseer, om werk te skep en die ekonomie te ondersteun. Om ons eie mense te bemagtig,” het Zulu Boy gesê.“Die eerste agt mense wat 'n e-pos stuur, kan 'n paar Gweri-sokkies wen. Die enigste voorwaarde is dat hulle 'n foto van hulself en die sokkies neem en na ons toe stuur.”- tanja@republikein.com.na

Sokkies met 'n kleurvolle skop

Kommentaar

Republikein 2026-09-09

Meld asseblief aan om kommentaar te lewer

Sokkies met 'n kleurvolle skop

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.