Sokker gebruik om bewaring te bevorder

Tammy Kleinhans ’n Groep sokkerspelers wat onlangs uit die internasionale en professionele spel getree het, verleen nou hul stem tot ’n positiewe invloed vir die stryd teen klimaatsverandering.Die FNB Global United Climate Kick afvaardiging is onlangs deur ses primêre skole by die Mariental skougronde verwelkom. Die spelers het saam met die kinders sokker gespeel, vir foto’s poseer en ook saam met hulle gedans.Die burgermeester van Mariental, mnr. Alex Kamburute, het gesê die dorp is bewus van die impak van klimaatsverandering en dat elkeen sy deel moet doen om die aarde te beskerm.“Klimaatsverandering moet ernstig opgeneem word deur elkeen wat op die planeet woon,” het hy gesê.Volgens Kamburute wil die munisipaliteit binnekort ’n projek bekendstel waar groentetuine in mense se agterplase aangelê word. Die munisipaliteit het ook skoonmaakveldtogte (spesifiek die opruim van vullis) waarmee hulle besig is.Deur die loop van die sokkerdag is 35 bome by verskeie skole op die dorp geplant. Kamburute het gesê bome verander koolstofdioksied in suurstof, verskaf koelte, help om gronderosie te verminder en lok voël- en dierelewe. Hy meen die teenwoordigheid van meer bome sal ook die hoeveelheid stof wat tot gesondheidsprobleme kan bydra, help verminder. Volgens hom is die plant van bome nie genoeg nie, maar moet dit met 'n volhoubare leefwyse gepaardgaan. Kamburute het 'n beroep op die gemeenskap gedoen om voort te gaan om bome te plant en nie net bome vir vuurmaakhout af te kap nie. Hy het voorts gesê die herwinning van glasbottels sorg nie net vir 'n ekstra geldjie in inwoners se sakke nie, maar verminder ook die gevaar van stukkende bottels wat rondlê. Hy het ’n beroep op inwoners gedoen om aanhoudend aan die omgewing te dink in alles wat hulle doen, sodat dit vir toekomstige geslagte bewaar word.Mnr. Wolfgang Schenck van Nuevas Ideas cc, konsultante in volhoubare stelsels vir omgewingsbestuur, het met die leerlinge oor herwinning, die vermorsing van water asook oor die gebruik van elektrisiteit gepraat.Mnr. Dixon Norval, hoof van strategiese bemarking en kommunikasie van FNB, het gesê die bank se slagspreuk “Hoe kan ons jou help” verwys nie net na geld nie, maar ook die gemeenskap, omgewing en die aarde.“Kom ons maak dit ’n beter plek om in te leef,” het Norval gesê. Global United is die breinkind van Lutz Pfannenstiel, gewese doelwagter van spanne op byna elke vasteland, insluitend die Windhoekse klub, Ramblers.Pfannenstiel het sedert 2008 reeds ’n indrukwekkende 380 oudspelers oortuig om as vrywilligers by Global United te registreer om wêreldwyd aan vertoonwedstryde deel te neem. Die span se wedstryde word altyd met ’n sentrale boodskap aangebied.“Ons almal is lief vir sokker en ons is lief vir ons planeet,” sê Pfannenstiel. “Vanjaar wil ons klem plaas op die bestuur van afval en op die bestuur van hulpbronne.“Sokker is nie net ’n doeltreffende medium om belangrike boodskappe oor te dra nie, dit kan help om oorloë te stop (soos in die Ivoorkus) of om rassisme uit te wis. Vanjaar is ons leuse: Gebruik jou hulpbronne oordeelkundig.“Ons almal kan daagliks iets prakties doen om klimaatsverandering en aardverwarming teen te werk. Om jou selfoon die hele dag aan die laaier te koppel, vermors dalk net ’n bietjie energie, maar as baie mense sulke dinge doen, neem die gesamentlike totaal gou problematiese afmetings aan.”

Sokker gebruik om bewaring te bevorder

Kommentaar

Republikein 2025-07-04

Meld asseblief aan om kommentaar te lewer

Sokker gebruik om bewaring te bevorder

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie