SOE’s sonder leiding

Ogone Tlhage - Uit amper 100 staatsondernemings is verskeie, wat miljarde werd is, sonder topbestuur. Meatco, Telecom Namibia, Namibia Post and Telecommunications Holdings (NPTH), die Namibiese Instituut vir Patologie (NIP), die Namibië Burgerlugvaartowerheid (NCAA), die Finansiële Hulpfonds vir Namibiese Studente (NSFAF), Air Namibia, Namibia Wildlife Resorts (NWR), die Agentskap vir Nywerheidsontwikkeling in Namibië (Nida), die Namibiese Nuusagentskap (Nampa), die Namibië Universiteit van Wetenskap en Tegnologie (Nust), die Paaiekontrakteursmaatskappy (RCC), New Era Publication Corporation (NEPC), die Zambezi Waterfront-maatskappy, die Owerheid vir Sake- en Intellektuele Eiendom (Bipa), asook MTC funksioneer almal tans sonder uitvoerende hoofde. Mnr. Leon Jooste, die minister van staatsondernemings, sê hy wil die arbeidswet inspan om die struikelblok van permanente aanstellings by staatsondernemings te bowe te kom. “Ons oorweeg die arbeidswet, ek wag nog vir ’n mening,” sê Jooste, wie se hande afgekap is wat die aanstelling van uitvoerende hoofde betref. “Ek kan maar net smeek en aan medeministers en raadvoorsitters skryf en vra dat hulle dit asseblief afhandel. Daar is baie min waarop ek my kan beroep. Wanneer ons nuwe wet in werking is, sal daar baie ammunisie wees,” het hy gesê. Jooste het bygevoeg dit is uiteindelik steeds rade se verantwoordelikheid om die aanstellingsproses te bestuur.“Die beginsel wat ons volg, is dat ons altyd in die belang van die staatsonderneming optree. Ek kan letterlik net opdrag gee, maar as ek moet opdrag gee, het ons reeds nie daarin geslaag om die regte raad aan te stel nie. Indien ons ’n professionele raad het, is dit nie nodig om briewe te skryf nie,” sê Jooste. Entiteite koersloosVolgens Namibian Sun, Republikein se susterkoerant, is 16 staatsondernemings tans sonder uitvoerende hoofde.Dit ondanks die regering se bykomende finansiering. Die Paaiekontrakteursmaatskappy (RCC) is sedert 2014 sonder ’n hoofbeampte. Dié onderneming het vier waarnemende hoofbeamptes sien kom en gaan, elk met hul eie plen om sake te beredder. Air Namibia het reeds drie waarnemende uitvoerende hoofde gegroet sedert mnr. Theo Namises die lugredery verlaat het. Die Zambezi Waterfront is ook sonder baas sedert 2016. By MTC was twee waarnemende besturende direkteurs sedert die Portugese burger mnr. Miguel Geraldes die lugredery in 2017 verlaat het, terwyl Meatco ook sedert 2017, ná die opperhoof van die Ovaherero- tradisionele owerheid, mnr. Vekuii Rukuro, weg is, geen uitvoerende hoof aangestel het nie. Bipa is ook leierloos sedert mnr. Tileinge Andima in Maart 2018 geskors is. NSFAF se hoofbeampte, me. Hiliya Nghiwete, in is April 2018 geskors, gevolg deur die NIP se uitvoerende hoof, mnr. Augustinus Katiti, in Junie verlede jaar.Staatsondernemings wat onlangs hul leiers verloor het, sluit in die NEPC, waar ’n waarnemende uitvoerende hoof in Februarie aangestel is, en die NWR, waar me. Zelna Hengari in April vanjaar geskors is. Nust se nuwe raad moes aan die begin van Oktober gevestig wees, maar dié lede is nog nie aangestel nie. Nuwe lede moet die nuwe visekanselier dan aanstel.Die nuutgestigde staatsonderneming Nida vind dit ook sedert sy ontstaan moeilik om ’n hoof te vind.Voorsitters verduidelik vertragings Telecom Namibia se raadvoorsitter, mnr. Fernando Somaeb, sê die soektog na die maatskappy se uitvoerende hoof vorder. “Ons is besig om ’n werwingsmaatskappy te soek om te help, en ons beraadslaag met die aandeelhouer oor die aanstelling van ’n hoofbeampte,” het hy gesê. MTC-raadvoorsitter mnr. Elvis Nashilongo sê hulle is ook aktief betrokke by die soektog na Geraldes se vervanger. “Die proses van werwing van MTC se uitvoerende hoof gaan voort en die raad sal aankondig wanneer al die fases voltooi is,” het hy gesê.Nampa se raadvoorsitter, mnr. Rector Mutelo, sê interne beraadslaging duur voort. “As die waarnemende uitvoerende hoof se ampstermyn verstryk, sal die vergoedingskomitee aanbevelings maak. Dan sal ons ’n raadsvergadering hou en dit bespreek voor ons die publiek volgens wet inlig,” sê Mutelo.Volgens berigte het Air Namibia se raad opdrag gekry om die werwingsproses te staak. Die NIP se raadsvoorsitter, me. Dina Shuuluka, is twee keer gevra om lig te werp op die aanstelling van ’n uitvoerende hoof, maar het nog nie gereageer nie. Die NEPC- en NWR-raadsvoorsitters het teen druktyd nie op vrae gereageer nie. - ogone@namibiansun.com

SOE’s sonder leiding

Kommentaar

Republikein 2026-08-04

Meld asseblief aan om kommentaar te lewer

SOE’s sonder leiding

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.