Soektog na renosterkalf eindig tragies

Tanja Bause – Die renosterkalf wat sedert die dood van haar ma, Zanna, op 16 Mei soek was, is Vrydag dood in die bosse gevind.

Volgens mnr. Martin Rust van die Ghaub Nature Reserve & Farm het die kalf ’n koeëlwond aan haar agterbeen gehad.

“Sy moes stadig doodgegaan het.”

Stropers het haar ma doodgeskiet en haar horings gestroop.

“Ons het onmiddellik nadat ons vir Zanna gevind het na die kalf begin soek. Terwyl ons na haar gesoek het, het ons die karkas van nóg 'n renosterkoei Grosse Kuh gevind. Sy is in die maag geskiet en het sowat 5 kilometer verder pynlik gevrek. Ons het haar kalf gevind en hy is nou saam met sy ouer broer en pas goed aan.”

Die soektog na Zanna se kalf was sonder ophou en daar is van helikopters en hommeltuie gebruik gemaak om die soektog op te skerp.

“Ons wil almal bedank wat gehelp het en is hartseer dat die kalf dood is. Ons het ook ’n jong bul gevind wat gekwes is. Die wond is ontsteek, maar die veearts wil nie nou die bul verdoof en opereer nie, omdat dit te gevaarlik is en die ander renosters weer kan ontstel.”

’n Beloning van N$50 000 is uitgeloof vir enige leidrade wat tot die inhegtenisneming en suksesvolle skuldigbevinding van die stropers sal lei.
– [email protected]