SMN: Bewaar jou menswees

Wat is dit om mens te wees? Wat maak van ons anders as die res van die wonderskepping? Wat maak ons uniek? Menswees is iets wat maklik vanselfsprekend aanvaar word, en nog makliker vergete of geïgnoreer word. Dit word maar min in amptelike kennisgewings in ag geneem. Iemand soos ek sou selfs so ver gaan as om te sê dat menswees deesdae in die gedrang kom. Kom ons kyk na die impak wat die Covid-19-inperking en die reëls wat tans van toepassing is op menswees het.Ons moet eers kyk na wat menswees behels. Volgens my bestaan menswees uit twee gekoppelde en wedersyds beïnvloedbare helfdes: Die innerlike en die uiterlike. Binne in jouself is jy mens. Jy voel soos ’n mens, jy dink soos ’n mens, jy ervaar soos ’n mens en redeneer soos ’n mens. Jy sien jouself as mens. Jy glo, jy twyfel, jy verbeel jou. Dit is die innerlike helfde van menswees en dit vorm die kern.Die probleem met ons omstandighede in hierdie tyd van die coronavirus is sy impak op die uiterlike en die gevolglike impak wat die uiterlike weer op die innerlike afdwing. Al die menslikheid binne jou beeld homself uit in jou interaksie met die wêreld, en veral met die mense met wie jy interaksie het. Hoe gaan jy nou jy vreugde uitbeeld as niemand jou glimlag agter jou masker kan sien nie? Hoe gaan jy nou jou liefde uitleef sonder drukkies gee of soentjies op die wang? Kan jy nog die blydskap van ’n ontmoeting met ’n ou vriend toon sonder om hande te skut, of hom ’n ligte klap agter die skouer te gee nie? Soentjies, drukkies, vriendelike groete is almal noodsaaklik tot ons menswees, maar die gedrag word nou ontmoedig. Reg so, ek verstaan die gevaar waarmee ons moet saam leef, en dat hierdie maatreëls nodig is. Hoe lank sal dit so bly? Ek weet nie. Nou moet ons net aanvaar en gevoellose robotte word? Nee! Dit is nou die tyd om ons tussenverhoudings in die soeklig te plaas. Ons moet goed kyk na hoe ons mekaar behandel, hoe ons met mekaar kommunikeer, wat ons vir mekaar sê en doen. So baie wat ons gewoonlik sonder denke sou doen, is nou verbode. Ons moet meer doen met die interaksie wat steeds toegelaat word. Dit beteken ons moet dieper dink in opsigte van ons medemens. Ons moet doelbewus optree om verhoudings te bou, en te behou. Ons moet ons ervaring met mekaar deel, al is dit tans moelik. Ons moet met mekaar praat.Deur met mekaar te praat gee ons die mens binne in jou ’n geleentheid om uit te kom. Terselfdertyd word die innerlike mens beïnvloed deur die wêreld se reaksie teenoor hom. So vorder die lewe van ’n mens met gedurige verandering en ontwikkeling soos die mens teenoor die wêreld verander, en die wêreld teenoor die mens. Doen die moeite om te sien dat daardie daaglikse veranderinge ’n beter mens van jou maak, en as gevolg daarvan maak dit die wêreld ook ’n beter plek. Ons het dit almal nou brood nodig.

SMN: Bewaar jou menswees

Kommentaar

Republikein 2025-06-13

Meld asseblief aan om kommentaar te lewer

SMN: Bewaar jou menswees

Kommentaar

Republikein 2025-06-13

Meld asseblief aan om kommentaar te lewer

MELD AAN

Advertensie