SME Bank Vrydag in die hof

Augetto Graig – Die likwidasie van die SME Bank dien Vrydag weer in die hoërhof wanneer besluit sal word of die tussentydse bevel verleng word en of dit 'n finale bevel van die hof gemaak word. Me. Liina Iyambo van die bank se bemarkingsdepartement het onlangs namens die likwidateurs, mnre. Ian Mclaren en David Bruni van Investment Trust Company, besonderhede van die proses verstrek. Iyambo sê die mate waartoe die bestuur en die direksie van die bankrot bank aangespreeklik gehou sal word, is nog nie finaal beslis nie. Vanweë die hofsaak wat voortduur, kan min inligting verskaf word; veral oor pogings om die vermiste geld in Suid Afrika op te spoor, sê sy. “Die SME Bank is tans onder voorlopige likwidasie en die saak sal op 15 September in die hoërhof gehoor word. Alle moontlike beleggersaanbiedinge is streng vertroulik en kan dus nie verstrek word nie,” het Iyambo gesê. Die hof mag Vrydag besluit om die likwidasiebevel 'n finale bevel van die hof te maak, of om die voorlopige proses te verleng, sê sy. Volgens haar is dit nie nou moontlik om te voorspel hoe lank die proses nog sal neem nie weens die ingewikkelheid daarvan. “As die bank as 'n lopende bedryf verkoop kan word, sal die proses vinnig voltrek wees. Die likwidering daarvan sal langer duur,” sê sy.Die voorlopige likwidasiebevel is op 11 Julie deur die hof uitgereik en daarna is die bank gesluit sodat die proses kon begin. “Terugbetalings op alle uitstaande lenings aan die SME Bank is tans aan die gang en sal voortduur. Leninghouers word dus aangemoedig om hul kontraktuele verpligtinge na te kom,” sê sy.Volgens haar behels die proses 'n standaardbenadering wat verseker die toepaslike stappe word gedoen om die bates van die bank te realiseer en die opbrengs aan krediteure en deposante te versprei volgens die wettige voorkeurorde. “Alle deposante word deur die wet beskerm tot N$25 000. Die eisproses sal mettertyd aan die publiek gekommunikeer word. Die mate van verhaling van deposito's wat N$25 000 oorskry, sal afhang van die uitkoms van die proses,” verduidelik sy.Die sentrale bank, die BoN, het al aan die begin van Maart beheer oor die SME Bank geneem nadat beweringe van wanbestuur van geld aan die lig gekom het. Die goewerneur van die BoN, mnr. Ipumbu Shiimi, het toe gesê nadat 'n belegging van nagenoeg N$175 miljoen wat die SME Bank in Suid-Afrika gemaak het na verwagting verlore is, was dié bank in 'n gevaarlike finansiële posisie. Die BoN se direkteur, mnr. Romeo Nel, sê op 27 Junie dat dit onvermydelik was dat die SME bankrot verklaar sou word, selfs al sou die geld verhaal word wat in twyfelagtige beleggings in Suid-Afrika geplaas is.Regter Hannelie Prinsloo het toe beslis dat die SME Bank in voorlopige likwidasie geplaas word. Sy het verder beslis dat enige belanghebbende party tot 15 September het om aan te dui hoekom die SME Bank nie finaal gelikwideer behoort te word nie.Senior advokaat Andrew Corbett, bygestaan deur advokaat Deon Obbes, het vir regter Prinsloo gesê slegs sowat N$3,8 miljoen se likiede bates was toe vir die SME Bank beskikbaar. Met totale laste van nagenoeg N$1,16 miljard word bates van N$998 miljoen met N$162 miljoen oorskry, het hy gesê. Die Nasionale Energiefonds en die staatspensioenfonds, wat onderskeidelik N$100 miljoen en ongeveer N$400 miljoen in die SME Bank gedeponeer het, wil beide hul geld terugeis.Mnr. Sisa Namandje het die twee Zimbabwiese minderheidsaandeelhouers, die Metropolitan Bank of Zimbabwe en World Eagle Properties, verteenwoordig.

SME Bank Vrydag in die hof

Kommentaar

Republikein 2025-11-05

Meld asseblief aan om kommentaar te lewer

SME Bank Vrydag in die hof

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.