SME Bank hoor lot in November

Jacqueline Louw – In ’n aansoek vir die finale likwidasie van die SME Bank deur die Bank of Namibia (BoN) het regter Hannelie Prinsloo haar uitspraak tot 29 November voorbehou.Advokaat Anthony Bishop, bygestaan deur mnr. Sisa Namandje, het Donderdag sy betoë namens die Zimbabwiese minderheidsaandeelhouers in die SME Bank, die Metropolitan Bank of Zimbabwe en World Eagle Properties, afgehandel.Dié aansoek om die bankrot SME Bank te likwideer, word deur die BoN teen die SME Bank, die regering, Namibia Financing Trust, die Metropolitan Bank of Zimbabwe, World Eagle Properties, die minister van nywerheidsontwikkeling, handel en SME-ontwikkeling, en die minister van finansies gebring. Die sentrale bank het aan die begin van Maart beheer van die SME Bank geneem nadat vermoed is ’n belegging van N$174 miljoen is in Suid-Afrika verloor.Bishop het betoog die BoN se aansoek het nie aan sekere bepalinge van die maatskappyewet en die wet op bankinstellings voldoen nie en die voorlopige likwidasiebevel is nooit gepubliseer nie. Hy het die hof versoek om die voorlopige likwidasiebevel van 11 Julie op te hef.Hy het ook aangevoer behoorlike prosedures is nie met die aanstelling van die twee voorlopige likwidateure, mnre. Ian McLaren en David Bruni gevolg nie. Volgens Bishop het hulle geen ondervinding van die bankwese nie en het die BoN hulle daarvan weerhou om ’n deskundige aan te stel om beheer oor die SME Bank se sake te neem.Bishop sê verder die SME Bank is gestig met die doel om Namibiërs op te hef en dit sou ongrondwetlik wees om die instelling finaal te likwideer. Volgens hom moes die SME Bank die geleentheid gekry het om sy finansiële posisie om te keer. Volgens hom maak die BoN beswaar teen die belegging van N$174 miljoen wat glo in Suid-Afrika verloor is, maar dit op sigself is nie genoeg rede vir die totale oorname van die bank nie.Bishop het ook aangevoer die SME Bank se 18 000 rekeninghouers bewys dié bank kon die kommersiële bankmark betree en die deponeerders is nou in die steek gelaat. Hy sê verder daar is geen bewyse dat die BoN stappe gedoen het om die bank te herkapitaliseer en weer op sy voete te kry nie.Senior advokaat Andrew Corbett, bygestaan deur advokaat Deon Obbes, het namens die BoN aangevoer die SME Bank het nie die N$174 miljoen-belegging in Suid-Afrika teruggekry nie, en die SME Bank se posisie het geensins sedert die voorlopige likwidasie verander nie.In antwoord op Bishop se argument dat die SME Bank veronderstel was om ’n instrument vir die opheffing van Namibiërs te wees, het hy gesê dit het op ’n enorme verlies van belastingbetalers se geld uitgeloop. Corbett het die mislukking van die SME Bank as ’n groot ramp beskryf – “die grootste fiasko van ’n instelling sedert onafhanklikheid”. Hy het verder aangevoer totale chaos en moontlike grootskaalse onttrekking van deponeerders se geld sal volg indien die SME sy deure weer open - wat geensins voordelig vir aandeelhouers sal wees nie.“Die hoop om die SME Bank te laat herleef, is op verkeerde uitgangspunte gebaseer,” het Corbett hom verder uitgelaat.Die BoN het die SME Bank in Mei vanjaar verwittig daarvan dat ’n kapitale inspuiting van nagenoeg N$359 miljoen benodig word om die bank weer solvent te kry. Die Namibiese regering, ’n 65%-aandeelhouer van die SME Bank, wat deur die jare bykans N$450 miljoen in die bank ingeploeg het, het reeds aangedui hy sal nie weer tot dié bank se redding kom nie en die BoN moet voortgaan met die finale sluiting daarvan.

SME Bank hoor lot in November

Kommentaar

Republikein 2025-11-05

Meld asseblief aan om kommentaar te lewer

SME Bank hoor lot in November

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.