Sluiting van SA olieraffinadery raak Namibië nie

Ronelle Rademeyer - Die gedwonge staking van bedrywighede by Suid-Afrika se grootste olieraffinadery sal nie die beskikbaarheid van brandstof in Namibië beïnvloed nie.
Sapref, Shell en BP se raffinadery in Durban, het Dinsdagaand ‘n force majeure verklaar en gesê kommer oor die veiligheid van sy werknemers en bates soos voertuie weens die onluste in KwaZulu-Natal, dwing hom om te sluit.
Dit volg nadat Natref, Sasol en Total se raffinadery, vroeër ook sy werksaamhede by Durban gestaak het.
Mnr. Harald Schmidt, uitvoerende hoof van die Namibië Oliebedryfvereniging se sekretariaat, sê die maatskappye wat vir Namibië brandstof invoer, het die afgelope jare toenemend die land se afhanklikheid van Suid-Afrika verminder en op ander invoermarkte begin fokus.
“Namibië het geen rede tot kommer nie. Die markte waarvandaan ons invoer, beleef nie die probleme wat Suid-Afrika het nie en ons invoere is veilig,” sê hy.
“Verder is ons bestaande voorrade in pas met die verbruik en die aankope word gedoen na gelang van die behoefte.”
Schmidt sê die oliebedryf se kontinuïteitsplan vir die land vereis dat daar altyd ’n sekere hoeveelheid brandstof in voorraad moet wees.

Foto: Nampa/Reuters