Sluipmoordverdagte ou bekende in Nam

Estelle de Bruyn Ri Jong Chol, 'n Noord-Koreaan wat deur Maleisiese owerhede daarvan beskuldig word dat hy betrokke was by die sameswering om Kim Jong Nam, die halfbroer van Kim Jong Un, te vermoor, het die afgelope jare verskeie besoeke aan Namibië gebring.Dit blyk uit die jongste verslag van die spesiale paneel kundiges wat deur die veiligheidsraad van die Verenigde Nasies aangestel is om die verbreking van VN-sanksies deur Noord-Korea te ondersoek.Ri is volgens die VN-verslag die hoof van die sogenaamde eerste kantoor van Korea Overseas Mining Development (Komid), die kernwapenmaatskappy vir wie Mansudae Overseas Projects (MOP) as frontorganisasie in Namibië sake doen. Komid is die Noord-Koreaanse regeringsmaatskappy wat spesifiek in die VN-sanksies by die naam uitgesonder word. Lidlande van die VN wat gehoor gee aan sanksies, het alle bande met die maatskappy en sy filiale verbreek.Volgens die VN-verslag was die 47-jarige Ri in die Demokratiese Republiek van Kongo (DRK) gestasioneer en het tussen 2012 en 2016 Namibië, Iran en Uganda besoek. Hy het sy vliegtuigkaartjies in China en Namibië onderskeidelik gekoop.Ri is deur Maleisië gedeporteer ná die moord op Kim Jong Nam.Hy het sover bekend 'n doktorsgraad in chemie.Nóg 'n Noord-Koreaan wat Namibië in die vier jaar besoek het en deur die VN in die verslag genoem word, is Kang Ryong, wat in Sirië gestasioneer was.Uit die jongste VN-verslag blyk dit die ministerie van internasionale betrekkinge en samewerking se verklaring op 30 Junie verlede jaar dat alle kommersiële bande met Noord-Korea verbreek is, is vals.Ingeligtes wat vertroud is met die VN-sanksies, het aan Republikein gesê dit is onseker hoekom Namibië voortgaan om die sanksies willens en wetens te verbreek.'Geen respek vir VN'“Namibiese politici sê graag 'ons is 'n kind van die VN, want dit is deur middel van Resolusie 435 wat Namibië onafhanklik geword het.' Namibië het duidelik nie veel respek vir hierdie 'ouer' nie, want regstreekse resolusies word blatant geïgnoreer en dan word daar boonop daaroor gejok,” het 'n politieke kommentator gesê.Kommer bestaan in akademiese kringe oor wat Noord-Korea nog van Namibië gaan vra. Pjongjang is toenemend die muishond van die internasionale gemeenskap, veral ná die jongste ballistiese missieltoetse wat Maandag uitgevoer is. Dit het tradisionele vriendskaplike lande soos China nou ook hul posisie oor die land laat heroorweeg.Betrekkinge met Maleisië, een van min lande waar Noord-Koreane sonder visums kon gaan werk, is ook nou versuur met die Noord-Koreaanse ambassadeur wat gedeporteer is en Noord-Korea wat nie die bevindinge van die Maleisiese nadoodse ondersoek op Kim Jong Nam aanvaar nie.'n Voorbeeld van hoe Noord-Korea waarskynlik sy ballistiese missielprogram finansier, blyk uit 'n brief op 'n FNB Namibia-briefhoof, gedateer 27 Januarie 2015. 'n Afskrif van die brief is in die anneks tot die verslag aangeheg. Hierin word toestemming deur 'n valutabeheerkonsultant van die internasionale sakesentrum van die bank gevra om US$280 000 (N$3,3 miljoen) in eenhede van US$20 000 elk aan 14 Noord-Koreane onderweg huis toe uit te betaal.

Sluipmoordverdagte ou bekende in Nam

Kommentaar

Republikein 2026-02-04

Meld asseblief aan om kommentaar te lewer

Sluipmoordverdagte ou bekende in Nam

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.