Slim, nootvas en goedhartig

Mariselle Stofberg - Agt deelnemers het vroeër vandeesweek hul beste voetjie voorgesit om uiteindelik met vanjaar se gesogte kroon en titel van Standard Bank: Miss High weg te stap. Die spoggeleentheid is in die Maerua-inkoopsentrum in Windhoek gehou.Uiteindelik sou die keuse val op Reschelle Beukes, die huidige Mej. Windhoek Hoërskool, met Reschelle wat ook met die prys vir Mej. Gemeenskapsprojek weggestap het. Tylo Blaauw, Mej. Windhoek Gimnasium, is die eerste prinses en Judite Corriea, Mej. Walvisbaai Privaat Hoërskool, is as die tweede prinses aangewys. Corriea het ook die pryse vir Mej. Persoonlikheid en Mej. Kreatiewe Drag ontvang. Sylvi Iipinge van die Sekondêre Skool Shaanika Nashilongo is as Mej. Sosiale Media aangewys.Elke deelnemer het ’n gemeenskapsprojek gehad waaraan hulle met die aanloop tot die kroningsaand moes werk. Dit het bygedra tot die fokus op ’n skoonheidskompetisie wat die meisies wil aanmoedig om terug te ploeg in die gemeenskap. “Ek glo hierdie titel gaan my help om verder te werk aan my projek. Ek voel opgewonde, bevoorreg en ek glo werklik dat enige van hierdie pragtige en beeldskone meisies verdien het om die titel te ontvang. Nie net het ek soveel geleer nie, maar ek het kosbare vriendinne langs die pad gemaak,” het 'n oorstelpte Beukes gesê nadat sy as wenner aangewys is. Met vanjaar se Namibië Toerisme Ekspo (NTE) se tema van herwinning het die kompetisie vanjaar ook 'n afdeling gehad waarin deelnemers een van hul uitrustings uit koerantpapier moes ontwerp. Standard Bank het aan die algehele wenner ’n prys van N$10 000 oorhandig om aan te wend soos hulle verkies. “Die kompetisie wat op meer as net skoonheid fokus en jong meisies aanmoedig om terug te gee aan hul onderskeie gemeenskappe, is in ooreenstemming met Standard Bank se projekte wat op korporatiewe sosiale verantwoordelikheid fokus. Ons sal graag in die toekoms steeds by die kompetisie wil betrokke bly,” het mnr. Sindano Nekundi van Standard Bank gesê. Nekundi, die bekende sanger en koormeester mnr. Joe Besser, me. Josephine Silas van Coca-Cola en die huidige Mej. Namibië, Selma Kamanya, was die beoordelaars vir die aand. Deel van vanjaar se kroningsaand was die Chamber of Choirs-kompetisie en vir die tweede agtereenvolgende jaar het die Sekondêre Skool Kuisebmond met die louere weggestap. In die tweede plek was die stemme van die Hoërskool Jan Jonker Afrikaner in Windhoek, terwyl die Sekondêre Skool Swakopmund in die derde plek geëindig het. Besser was veral beïndruk met die talent wat tydens die kompetisie te sien en te hore was. “Vanaand wys net weer dat jy nie ’n enorme koor nodig het om suksesvol te wees nie,” het hy gesê. Die kore het as deel van 'n grand finale almal die volkslied gesing.

Slim, nootvas en goedhartig

Kommentaar

Republikein 2026-05-05

Meld asseblief aan om kommentaar te lewer

Slim, nootvas en goedhartig

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.