Sleutelfiguur in N$30 miljoen-transaksie getuig

Jacqueline LouwMnr. Nico Josea was laas week weer in die getuiebank in Windhoek se hoërhof voor regter Christie Liebenberg. Josea het 'n sleutelrol gespeel in die hantering van die Maatskaplike Voorsorgkommissie (SCC) se N$30 miljoen-belegging in die beleggingsmaatskappy Avid Investment Corporation (Avid).Josea staan tereg op 'n klag van diefstal nadat Avid, waarin die SSC N$30 miljoen in Januarie 2005 belê het, nie die belegging en beloofde opbrengs aan die einde van die ooreengekome beleggingsperiode kon terugbetaal nie.Avid het N$30 miljoen van die SSC ontvang waarvan N$29,5 miljoen oorgedra is na die rekening van Namangol Investments (Namangol), 'n maatskappy waarvan Josea die enigste aandeelhouer was. Josea het deurtentyd getuig dat hy hierdie geld van wyle mnr. Lazarus Kandara, die stigter van Avid, ontvang het en nooit enige besigheidstransaksies met lede van Avid gehad het nie. Volgens Josea het hy N$20 miljoen aan 'n aandelehandelaar in Suid-Afrika, ene Alan Rosenberg, oorbetaal.Josea het aan die hof vertel Kandara het aan hom gesê die geld was sy eie en dat hy Josea versoek het om ook N$6,3 miljoen van die oorspronklike bedrag volgens sy eie diskresie te belê en N$3,2 miljoen vir Kandara “terug te hou”. Rosenberg het Josea glo nie van 'n kontrak, kwitansie of beleggingsverslag vir die N$20 miljoen voorsien nie. Rosenberg is toe gedagvaar. 'n Skikking is bereik en 'n bedrag van N$15 miljoen is in Maart 2005 aan Josea terugbetaal. 'n Verdere N$15 miljoen sou in paaiemente terugbetaal word.Volgens Josea het Rosenberg ingestem dat Namangol 'n 50%-belang in 'n belegging van US$35,8 miljoen sou hê. Josea het Kandara van hierdie ooreenkoms vertel en op grond daarvan het Kandara aangebied om die N$15 miljoen wat Rosenberg terugbetaal het, aan Josea te leen. Kandara sou glo later 40% van die opbrengs van die belegging van US$35,8 miljoen ontvang.Josea het getuig dat hy slegs van Avid se bestaan bewus geword het gedurende 'n ondersoek in die hoërhof in Julie 2005 na Avid se ineenstorting as gevolg van sy onvermoë om die SSC-belegging terug te betaal. Josea is egter deur mnr. Sisa Namandje, die regsverteenwoordiger van mnr. Paulus Kapia, 'n voormalige Swapo-jeugleier, adjunkminister en Avid-direkteur, gekonfronteer in 'n brief wat hy self aan Kandara gedurende Januarie 2005 geskryf het. Die naam van Avid Investment Corporation, asook 'n verwysing na die maatskappy se bankrekening, verskyn in die brief wat aan Kandara geadresseer was.Josea het verduidelik dat hy nie geweet het wie Avid was nie en dat hy deur Kandara versoek was om die brief so te adresseer. Hy het ook aangeneem die bankrekening waarna verwys word in die brief dié van Kandara was.Josea is Donderdag 23 Maart deur mnr. Petrie Theron, regsverteenwoordiger van me. Inez /Gâses, 'n direkteur van Avid, onder kruisverhoor geneem. Josea is oor verskeie lenings wat hy glo aan Kandara gemaak het, ondervra. Theron het Josea gevra oor groot bedrae wat hy na bewering aan Kandara geleen het slegs twee maande ná hul ontmoeting.Volgens Josea het hy dit nie vreemd gevind dat Kandara, wat hom as 'n suksesvolle besigheidsman aan Josea voorgestel het, nie 'n persoonlike bankrekening gehad het nie. Hy het verder getuig dat hy nie bekommerd was oor 'n bedrag van meer as N$1 miljoen wat hy na bewering tussen November 2004 en Janaurie 2005 aan Kandara geleen het nie, want hy het hom vertrou.

Sleutelfiguur in N$30 miljoen-transaksie getuig

Kommentaar

Republikein 2025-12-16

Meld asseblief aan om kommentaar te lewer

Sleutelfiguur in N$30 miljoen-transaksie getuig

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.