Skuld sluit praktyk

Henriette Lamprecht 'n Plattelandse dokterspraktyk is ná meer as twee dekades van diens aan die gemeenskap op die rand van bankrotskap nadat uitbetalings van die staat se mediese fonds, Psemas, steeds nie ten volle gedoen is nie. Uitbetalings van sowat N$250 000 is uitstaande, met slegs sewe uit die afgelope 22 weke se eise wat wél betaal is.Die praktyk bestaan reeds die afgelope 27 jaar met 75% van die pasiënte wat lede van Psemas is. “Ons kan nie meer nie, dit is verby,” sê 'n personeellid van die praktyk. Dié personeellid verkies om naamloos te bly. “Ons water is ook nou afgesny omdat ons nie die rekening betaal het nie, maar ons kan nie.”Volgens die bron is skuld en lenings van duisende dollar aangegaan om die praktyk aan die gang te hou en medisyne te kan aankoop. Dié kraantjie kan egter nie meer oopgedraai word nie.“Ons het geld gaan leen om medisyne aan te koop en salarisse te betaal, maar ons kan nie meer leen nie, dit is nou die einde.”Die praktyk se skuld aan 'n verskaffer van medisyne staan op sowat N$100 000.“Ons kan dit nie betaal nie, want ons het nie geld nie. Hulle het ons ook reeds vir dié skuld gedagvaar.”Die bron sê voorts die praktyk beskik wel oor 'n dispenseringslisensie, maar moet nou noodgedwonge voorskrifte uitskryf vir pasiënte om dit by 'n apteek aan te koop.“Omdat die dokter jare reeds hier is, het hy 'n baie goeie vertrouensverhouding met sy pasiënte. Hy het 'n band met hulle gebou en baie van die pasiënte wil nie hul voorskrifte van sekere medisyne by 'n apteek ingee nie, omdat die inligting sensitief is en hulle net vir hom daarmee vertrou.”Die praktyk, wat oor twee dokters beskik, bedien op 'n besige dag tot 25 pasiënte. Die verlies aan inkomste omdat die praktyk weens 'n gebrek aan medisyne nie kan dispenseer nie, beloop volgens die bron tot N$10 000 per dag.“Die skuld wurg ons dood. Vir 'n plattelandse praktyk is dit 'n doodskoot.”Die bron sê voorts Psemas is volgens kontrak verplig om eise weekliks te betaal. “Dit is normaal om 'n maand agter te wees, maar nou is dit reeds etlike weke. As hulle net by die volgorde van die betalings gehou het, sou dit ons gered het.”Wanneer eise wél uitbetaal word, val die keuse ook op die laagste bedrag. Hernuwings van Psemas-kontrakte met diensverskaffers wat gewoonlik jaarliks in April hernu moet word, is glo ook vir eers op ys.“Deel van die hernuwing sluit in bewyse van 'n goeie reputasie en dat die vereniging, soos die Raad vir Gesondheidsberoepe in Namibië (HPCNA), betaal is. Die jongste brief van die permanente sekretaris van die ministerie van finansies, me. Erica Shafuda, sê dit is nou weer uitgestel tot 1 Julie.”Die eienaar van die praktyk woon op 'n kleinhoewe buite die dorp wat werk aan 13 mense verskaf. “Hy is verantwoordelik vir hulle en hul gesinne. Hy sal hulle egter moet laat gaan, want hy kan hulle eenvoudig nie meer betaal nie. Die praktyk se inkomste dra die kleinhoewe en sy mense.”Republikein het in Maart berig Psemas se uitstaande skuld aan verskaffers van gesondheidsdienste beloop reeds sowat N$500 miljoen. Dié bedrag sou egter steeds aansienlik styg tot in Mei toe die verwagting was dat die ministerie van finansies sy beloofde uitbetalings van agterstallige skuld in die nuwe finansiële jaar stuksgewys sou begin delg. Die N$500 miljoen dek slegs die tydperk van 16 Desember 2016 tot 28 Februarie vanjaar.

Skuld sluit praktyk

Kommentaar

Republikein 2025-05-02

Meld asseblief aan om kommentaar te lewer

Skuld sluit praktyk

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie