Skrikwekkende 150 sterftes, gevalle eerste keer nie viersyfergetal

Maandag is volgens die Wêreldgesondheidsorganisasie (WHO) en die ministerie van gesondheid en maatskaplike se daaglikse situasieverslag oor die Covid-19-pandemie net 730 nuwe gevalle van Covid vir Namibië gerapporteer, maar dit sluit 'n angswekkende 150 sterftes in. Dit is die eerste keer sedert die verslag vir 13 Junie dat nuwe gevalle nie 'n viersyfergetal is nie.
Die gedetailleerde, daaglikse verslag word eers later vandag verwag, wat byvoorbeeld sal wys op watter datums die sterftes plaasgevind het en in watter distrikte, asook die ouderdomme van oorledenes. Per streek is die nuwe sterftes soos volg: Omaheke 34, Oshana 33, Khomas 17, Otjozondjupa 15, Oshikoto 13, Ohangwena 8, Erongo 7, Kavango-Oos 7, Omusati 6, Kunene 5, Zambezi 4, Hardap 1. Net in twee streke, Kavango-Wes en //Kharas, is geen nuwe sterftes op rekord geplaas nie.