Skoonmaakveldtog op Werkersdag
Die president het 'n beroep op alle Namibiërs gedoen om die land skoon te maak.
Namibiërs gaan op 1 Mei, Internasionale Werkersdag, die land skoonmaak.
Pres. Hage Geingob het 'n beroep op alle Namibiërs gedoen om hul moue op te rol en aan die nasionale skoonmaakveldtog deel te neem.
Dit volg ná hy gesien het hoe vuil en met rommel bestrooi die hele land is.
"Dit is ook die president se wens dat Windhoek sy status as die skoonste land in Afrika moet terugwen," sê Staatshuis se nuussekretaris, dr. Alfredo Hengari, in 'n nuusverklaring.
Kigali in Rwanda is tans die skoonste stad in Afrika met Windhoek wat na die tiende plek op die ranglys van 2016 geval het.
Op 'n vraag aan Hengari waarom die skoonmaakveldtog op juis Werkersdag gaan plaasvind, het hy gesê "Meidag is ideaal om ten gunste van so 'n veldtog te mobiliseer".
Werkersdag word vanjaar op Khorixas gevier.
Oor wie en watter ministerie verantwoordelik vir die organisasie van die skoonmaakveldtog is, het Hengari gesê "ons is besig om die fynere besonderhede van die skoonmaakveldtog voor te berei oor hoe dit uitgevoer gaan word".
Hy sê die fokus van die veldtog sal op die land se dorpe, nedersettings en stede wees.
Hengari het nie geantwoord of daar wel vir die veldtog begroot is nie, maar gesê meer besonderhede sal binnekort verstrek word.
STEUN VAN NCE
Die Namibiese Kamer van die Omgewing (NCE) het by monde van sy uitvoerende hoof, dr. Chris Brown, die skoonmaakveldtog verwelkom. Hy het gesê die NCE sal die veldtog met N$50 000 ondersteun met N$5 000 elk aan 10 plaaslike owerhede, berig Namibian Sun.
Die internasionaal-bekende Namibiese kwaito-kunstenaar, EES, se onlangse versoek dat die geld wat vir vanjaar se onafhanklikheidsvieringe op 21 Maart op Tsumeb opsy gesit is, eerder vir ‘n skoonmaakveldtog gebruik moet word, het 'n storm op sosiale media ontketen.
“Voorstelle dat ‘n skoonmaakveldtog in die plek van onafhanklikheidsvieringe gehou moet word, is misplaas. Die gees van Onafhanklikheidsdag is vir alle Namibiërs om saam te kom, in diversiteit te verenig en onafhanklikheid te vier,” het Hengari in reaksie op EES se #itsup2us-beweging gesê.
Die president is glo nie gekant teen EES se kernboodskap van 'n skoonmaakveldtog nie, maar het nie saamgestem dat dit op Onafhanklikheidsdag gehou word nie.
Voorts het die ministerie van die omgewing en toerisme aan die begin van Maart sy nasionale soliede afvalbestuur-strategie amptelik bekend gestel waartydens die minister, mnr. Pohamba Shifeta, gesê het rommelstrooiery hou ook 'n bedreiging vir die toerismesektor in.
“Die agteruitgang van ons landskappe en stedelike gebiede weens rommelstrooiery sal ons beeld as 'n toeristebestemming skaad en toeriste ontmoedig om terug te keer. As ons nie ons strate kan skoonhou nie, sal toeriste wonder oor die gehalte van ons water en die veiligheid van ons kos,” het hy gesê.
Shifeta sê wat die meeste kommer wek, is burgers se houding teenoor rommel.
“Ons het 'n samelewing geword wat net rommel strooi. Ons sien elke dag hoe rommel uit voertuie of langs die straat gegooi word. Dit dui aan ons is nie trots op ons omgewing nie.”
Shifeta het gesê sy ministerie gaan 'n bewusmakingsveldtog van stapel stuur en rommelstrooiers kan volgens die omgewingsbestuurwet ook boetes opgelê word.
Pres. Hage Geingob het 'n beroep op alle Namibiërs gedoen om hul moue op te rol en aan die nasionale skoonmaakveldtog deel te neem.
Dit volg ná hy gesien het hoe vuil en met rommel bestrooi die hele land is.
"Dit is ook die president se wens dat Windhoek sy status as die skoonste land in Afrika moet terugwen," sê Staatshuis se nuussekretaris, dr. Alfredo Hengari, in 'n nuusverklaring.
Kigali in Rwanda is tans die skoonste stad in Afrika met Windhoek wat na die tiende plek op die ranglys van 2016 geval het.
Op 'n vraag aan Hengari waarom die skoonmaakveldtog op juis Werkersdag gaan plaasvind, het hy gesê "Meidag is ideaal om ten gunste van so 'n veldtog te mobiliseer".
Werkersdag word vanjaar op Khorixas gevier.
Oor wie en watter ministerie verantwoordelik vir die organisasie van die skoonmaakveldtog is, het Hengari gesê "ons is besig om die fynere besonderhede van die skoonmaakveldtog voor te berei oor hoe dit uitgevoer gaan word".
Hy sê die fokus van die veldtog sal op die land se dorpe, nedersettings en stede wees.
Hengari het nie geantwoord of daar wel vir die veldtog begroot is nie, maar gesê meer besonderhede sal binnekort verstrek word.
STEUN VAN NCE
Die Namibiese Kamer van die Omgewing (NCE) het by monde van sy uitvoerende hoof, dr. Chris Brown, die skoonmaakveldtog verwelkom. Hy het gesê die NCE sal die veldtog met N$50 000 ondersteun met N$5 000 elk aan 10 plaaslike owerhede, berig Namibian Sun.
Die internasionaal-bekende Namibiese kwaito-kunstenaar, EES, se onlangse versoek dat die geld wat vir vanjaar se onafhanklikheidsvieringe op 21 Maart op Tsumeb opsy gesit is, eerder vir ‘n skoonmaakveldtog gebruik moet word, het 'n storm op sosiale media ontketen.
“Voorstelle dat ‘n skoonmaakveldtog in die plek van onafhanklikheidsvieringe gehou moet word, is misplaas. Die gees van Onafhanklikheidsdag is vir alle Namibiërs om saam te kom, in diversiteit te verenig en onafhanklikheid te vier,” het Hengari in reaksie op EES se #itsup2us-beweging gesê.
Die president is glo nie gekant teen EES se kernboodskap van 'n skoonmaakveldtog nie, maar het nie saamgestem dat dit op Onafhanklikheidsdag gehou word nie.
Voorts het die ministerie van die omgewing en toerisme aan die begin van Maart sy nasionale soliede afvalbestuur-strategie amptelik bekend gestel waartydens die minister, mnr. Pohamba Shifeta, gesê het rommelstrooiery hou ook 'n bedreiging vir die toerismesektor in.
“Die agteruitgang van ons landskappe en stedelike gebiede weens rommelstrooiery sal ons beeld as 'n toeristebestemming skaad en toeriste ontmoedig om terug te keer. As ons nie ons strate kan skoonhou nie, sal toeriste wonder oor die gehalte van ons water en die veiligheid van ons kos,” het hy gesê.
Shifeta sê wat die meeste kommer wek, is burgers se houding teenoor rommel.
“Ons het 'n samelewing geword wat net rommel strooi. Ons sien elke dag hoe rommel uit voertuie of langs die straat gegooi word. Dit dui aan ons is nie trots op ons omgewing nie.”
Shifeta het gesê sy ministerie gaan 'n bewusmakingsveldtog van stapel stuur en rommelstrooiers kan volgens die omgewingsbestuurwet ook boetes opgelê word.
Kommentaar
Republikein
Geen kommentaar is op hierdie artikel gelaat nie