Skole sluit, universiteite vat kort breek

Ronelle Rademeyer



Alle skole en koshuise in die land sluit met onmiddellike effek, wat beteken die land se leerlinge gaan vir die volgende vier weke nie skool bywoon nie.

Dié aankondiging is pas deur die waarnemende minister van onderwys, kuns en kultuur, mnr. Martin Andjaba, in die lig van die Covid-19-pandemie gemaak.

Dieselfde geld die Kollege van die Kunste (Cota), biblioteke, museums, hulpbronsentrums, die Nasionale Kunsgalery van Namibië en die ministerie se nasionale geletterdheidsprogramme.

Beide die Universiteit van Namibië (Unam) en die Namibië Universiteit van Wetenskap en Tegnologie (Nust) se studente het vandeesweek 'n midtermynbreek. Volgens Nust sal geen toetse geskryf of werksopdragte afgehandel word nie.

Laasgenoemde universiteit het ook sy gradeplegtigheid op 29 en 30 April gekanselleer, terwyl Unam nog besluit hoe hy sy gradeplegtigheidseremonies in April gaan hanteer.

Andjaba het koshuishoofde versoek om dadelik reëlings tref dat kinders gehaal en huis toe geneem word.

Namibië se tweede semester vir skole sal van 14 April tot 29 Julie duur.

Die waarnemende minister benadruk groot uitdagings wag in die tweede semester op onderwysers aangesien die eksamen aan die einde daarvan oor die werk van beide die eerste en die tweede semester sal handel.

Verder moet die skole se bestuur seker maak wanneer die nuwe semester begin, is skole blinkskoon en ontsmet. Dieselfde geld biblioteke en ander onderrigsentrums.

Alle skole moet die inwerkingstelling van die Water-, Sanitasie- en Higiëne-inisiatief (Wash) verskerp en seker maak daar is genoeg vloeibare seep.

Daarbenewens word ouers en voogde versoek om seker te maak die nodige voorsorgmaatreëls word tuis getref om te verhoed dat kinders met die virus besmet word.

Hulle moet ook toesien dat kinders tuis studeer en hulle daarmee help.

 – [email protected]