Skole op hul knieë

Skrale subsidie van N$33 per leerling

11 July 2018 | Onderwys
Henriette Lamprecht – “Ons lê op die grond.”

Dít was die noodkreet gister by verskeie skole wat sedert die begin van die jaar steeds nie die subsidie van ’n karige N$33 per kind van die ministerie van onderwys, kuns en kultuur ontvang het nie.

Dié subsidie, wat eers N$66 per leerling was, is veronderstel om elke termyn aan skole uitbetaal te word.

Met die einde van die tweede termyn wat reeds in sig is, het verskeie skole gesê dit het ernstige gevolge vir onderrig én die daaglikse bestuur van hul skole.

Die grootste impak blyk by skole te wees waar ouers nie finansieel daartoe in staat is om enige vrywillige bydraes te lewer of geldinsamelings te ondersteun nie.

“Ons vra ouers om te help, maar hulle wil nie of hulle kan nie,” het ’n bron by so ’n skool gesê.

Volgens haar is dit juis dié bydraes wat moet help met die aankoop van alles van ink vir fotostaatmasjiene tot skryfbehoeftes en papier.

“Ons hande is afgekap. Ons moet kopieë van vraestelle vir die eksamen maak wat nou gaan begin en ons kan dit nie doen nie.”

Sommige leerlinge het ook nog nie handboeke of skryfboeke nie.

“Ons wil die boeke netjies en oorgetrek hê, maar die helfte van die skool kan nie bekostig om dit oor te trek nie.”

Volgens die bron beweeg dinge nou van sleg na slegste.

“Dit vat baie ink ensovoorts om eksamenvraestelle uit te druk. Die ink kos sowat N$4 000 en net vir die vraestelle alleen is dit ’n uitgawe van N$10 000 tot N$12 000. Dan moet handboeke nog uitgedruk word vir leerlinge wat nie handboeke het nie.”



Nog ’n skool sê hulle het nog geen subsidie vir die jaar ontvang nie, hoewel hulle tydens ’n ontmoeting tussen die minister en skoolhoofde oor die huidige situasie ingelig is.

“Die rede was dat die finansiële omstandighede nie so goed is nie,” het ’n bron by die skool gesê.

Vir dié skool is hul “sterk verhouding” met ouers hul redding.

“Ons kan cope danksy bydraes van ouers en ons geldinsamelings.”

Volgens die bron is die skool baie streng met die gebruik van enige geld.

“Ons praat met ons ouers oor vrywillige bydraes, maar die reaksie is maar traag. Ons het egter elke termyn ’n groot geldinsameling wat help dat ons met gemak darem kan aangaan.”

Volgens die bron het die ministerie voorskrifte vir die gebruik van die subsidies en ontvang personeel by skole opleiding oor “hoe om die geld te gebruik vir wat”.

“Dit mag nie vir enigiets gebruik word nie en is hoofsaaklik vir kleinskaalse onderhoud soos ’n kraan wat lek of ’n gloeilamp wat geblaas het.”

By skole waar die infrastruktuur oud is, help dié kleinskaalse onderhoud nie meer nie.

“Ons het groot goed wat ons moet dek, soos pype wat bars.”

Die subsidie mag ook nie as ’n “sagte lening” gebruik word om byvoorbeeld ’n onderwyser te ondersteun nie.

Skole moet ook ’n verslag by die ministerie indien oor waaraan die subsidie bestee is en alle skenkings insluit.

Die bron gee toe “ouer generasies” was traer om vrywillige finansiële bydraes te maak. Die bydrae by dié betrokke skool is N$200 per kind per jaar, en net sowat 40% van ouers het dit betaal.

“Nou het ons ’n jonger generasie ouers met ’n beter inkomste wat meer gewillig is om ’n bydrae te maak.”

Ouers sien ook eerstehands die verbeterings wat danksy die geld aangebring word.

“Hulle wil sien dit is tot die kind se voordeel.”

Volgens die bron ondersteun skole ook mekaar en help waar ’n ander iets nie kan bybring nie.

By nog ’n skool is die wan- en laatbetaling van subsidies as ’n “ernstige bron van kommer” beskryf.

“Ons is reeds sewe weke in die tweede termyn en nog niks is betaal nie,” het ’n bron hier gesê. Hier is die vrywillige bydraes vir ouers N$150 per kind per jaar, of N$50 per termyn.

“Daar is dié wat dit nie betaal nie, maar die meeste is egter gewillig om dit te doen.” Volgens dié bron is die betaling van aflosonderwysers ook vir die skool se rekening.

Teen druktyd het die permanente sekretaris, me. Sanet Steenkamp, nog nie op Republikein se vrae gereageer nie.

Soortgelyk

 

Honderde miljoene vir veevoer nodig

23 ure gelede | Landbou

Ronelle Rademeyer - Die 2019 droogte is ‘n omvangryke ramp en ten minste N$170 miljoen is nodig om net 5 persent van die nasionale veekudde...

Min of geen handboeke vir nuwe leerplan

23 ure gelede | Onderwys

Henriette Lamprecht – Óf drupsgewys óf glad nie. Dit is volgens verskeie skole oraloor die land die huidige stand van handboeke vir die nuwe leerplan...

Regional council must account for vandalised buildings

23 ure gelede | Infrastruktuur

AUSSENKEHR – The //Kharas Regional Council must account for government buildings that are vandalised and left to become white elephants, the minister of urban and...

Swapo beslis dorpsraadslede se lot

23 ure gelede | Politiek

Dorpsraadslede van Okahandja en Rundu moes Maandag ure lank by Swapo se hoofkantoor in Windhoek wag om te hoor wat hul lot is. Verskeie nasionale...

Groeiende stad druk rioolstelsel

23 ure gelede | Infrastruktuur

Elvira Hattingh - Die Windhoekse munisipaliteit erken sekere rioolpype in die stad moet opgradeer word om die groeiende getal stadsbewoners te akkommodeer. Terselfdertyd beloof hulle...

Weer vir 19 Februarie 2019

23 ure gelede | Weer

WEERWAAK: Bloedige hittetoestande word vir die res van die week in die binneland verwag.BINNELAND: Mooiweer en bloedig warm in die ||Kharasstreek. Elders sal dit gedeeltelik...

Gammams staan steeds stil

23 ure gelede | Regering

Elvira Hattingh – Windhoek se munisipaliteit (CoW) sê hul Gammams-watersuiweringsaanleg staan steeds stil nadat swaarbrandstofolie meer as twee weke gelede in die stad se rioolstelsel...

‘Vroue is sterk’

23 ure gelede | Maatskaplik

Mariselle Stofberg – TrueKrav Namibia het Donderdag, in samewerking met die Namibiese Vrouevereniging en Kosmos, ’n praatjie oor geslagsgeweld in die hoofstad aangebied.TrueKrav bied...

Namcor wil vry van sekere wette wees

23 ure gelede | Energie

Elvira Hattingh - Namibië se Nasionale Petroleumkorporasie (Namcor) het ‘n aansoek by die Namibiese Kompetisie-kommissie ingedien om vir die volgende 10 jaar vrygestel te wees...