Skole: Daar ís vir handboeke begroot

Elvira Hattingh - Meer as N$27 miljoen is in die onderwysbegrotingspos toegestaan vir die uitreiking, verkryging en verspreiding van graad 10-handboeke in die 2019-’20-boekjaar. Dít volg nadat die hersiene leerplan as deel van die Namibiese Senior Sekondêre Sertifikaat vir gewone vlak (NSSCO), vir dié graad vanjaar in werking getree het.Die ministerie van onderwys, kuns en kultuur het Dinsdag in ‘n nuusverklaring skerp gereageer op mediaberigte waarin beweer word die regering het nie vir handboeke begroot nie.Me. Sanet Steenkamp, uitvoerende direkteur van onderwys, kuns en kultuur, het gesê vir die 2019-’20-boekjaar is N$27 331 256 begroot en dit sal tussen al 14 streke verdeel word.Steenkamp het gesê vir die 2017-’18-boekjaar het die ministerie N$58 miljoen bestee aan die verkryging van graad 10-handboeke ingevolge die implementering van die hersiene leerplan, terwyl N$24 miljoen ook aan graad 9-handboeke bestee is.Me. Katrina Hanse-Himarwa, minister van onderwys, kuns en kultuur, het die onderwysbegrotingspos vir die 2019-’20-boekjaar op 26 April in die parlement ter tafel gelê. Altesaam N$13,2 miljard is vanjaar uit die nasionale begroting aan die ministerie toegestaan – sowat 4% meer as tydens die 2018-’19-boekjaar. Die ministerie kry jaarliks die grootste hap uit die nasionale begroting – sowat 21% daarvan is weer vanjaar aan die ministerie toegestaan. Hanse-Himarwa het gesê die geld sal gebruik word vir ses hoofprogramme van die ministerie, wat insluit beleidskoördinering en ondersteuningsdienste, voorskoolse onderrig, laerskoolonderrig, hoërskoolonderrig, lewenslange onderrig, asook die eenheid vir die bestuur van MIV/vigs (HAMU). Sowat N$ 8,4 miljard sal aan laerskoolonderrig bestee word, terwyl meer as N$4,1 miljard vir hoërskoolonderrig geoormerk is en meer as N$205 miljoen vir beleidskoördinering en ondersteuningsdienste.Volgens Hanse-Himarwa gee die ministerie vanjaar voorkeur aan die voltooiing van die 31 gevorderde filiaalsillabusse, asook die ontwikkeling van ondersteuningsmateriaal vir die leerplan wat teen 2021 vir graad 12-leerlinge geïmplementeer moet word. Sy het ook gesê die integrasie van inligtingkommunikasietegnologie (IKT) in onderrig is noodsaaklik en die hersiene leerplan vir graad 10 (NSSCO) sal vanjaar vir die eerste keer geïmplementeer word. In 2020 sal die ministerie die tweede NSSCO-jaar in graad 11 implementeer.Hanse-Himarwa het gesê die geld wat vanjaar aan die ministerie toegestaan is, dek personeeluitgawes en universele toelae aan skole ten volle. Tog word net 50% van die koste van voorraad in regeringskoshuise, skoolvoedselprogramme, munisipale dienste, skryfbehoeftes en skoonmaakbehoeftes gedek.

Skole: Daar ís vir handboeke begroot

Kommentaar

Republikein 2026-08-12

Meld asseblief aan om kommentaar te lewer

Skole: Daar ís vir handboeke begroot

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.