Skokfliek oor aborsie

Uit die pen van Cary Solomon en Chuck Konzelman, die skrywers en medevervaardigers van God's Not Dead, kom 'n rolprent wat die mees kontroversiële en polariserende onderwerpe van ons tyd aanspreek: Aborsie.

Na tientalle aanlyn petisieveldtogte span Downtown Entertainment en TruthTV kragte saam om vanaf 28 Februarie 2020 Unplanned in uitgesoekte Ster Kinekor-teaters in Suid-Afrika, Namibië en Zambië te wys.

Unplanned is ‘n inspirerende ware verhaal van een vrou se reis van transformasie.

In die eerste vyf minute van die fliek ontmoet ons vir Abby Johnson en haar gesin. Al wat Abby (gespeel deur Ashley Bratcher) ooit wou doen, was om vroue te help.

Sy is een van die jongste direkteure vir die beplanning van ouerskapklinieke in Amerika wat talle vroue raad gee oor hul voortplanting- en ouerskapkeuses. Haar passie vir 'n vrou se reg om te kan kies, spruit uit die feit dat sy self as jong vrou baie seer moes verwerk en keuses moes maak; goeie voorbereiding vir die rol wat sy in ander vroue se lewe sou vertolk.

Abby het beide kante van die aborsiegesprek verstaan en was subjektief by meer as 22 000 aborsies betrokke. Tot op 'n dag en ‘n eerstehandse ervaring in ‘n teater wat tot lewensveranderende nagevolge lei.

Minuut 7 van die fliek merk die begin van transformasie vir ‘n vrou wat nooit weer dieselfde sou wees nie. In so 'n mate dat sy haar lewe en reputasie op die spel plaas om as passievolle en ywerige pro-lewe-woordvoerder op te staan en die wanbegrip oor aborsies en lewe te verander.

Unplanned word deur resensente en kritikuste beskryf as ‘n eerlike verhaal met skokkende feite wat nie geïgnoreer kan word nie en persepsies sal skud.

Klik op die skakel https://youtu.be/EgzZGLa1_n4 om na die lokprent van Unplanned te kyk.